Levitikọs 8 - Edo Bible (E Baibol Ẹdo) Version 1996

Vbene A Ya Errọn Ke Ivbi Ẹre Ma Ohẹn Hẹ

¹ E Nọyaẹnmwa keghi tama e Mosis wẹẹ,

² “Rhie Errọn kevbe ivbi ẹre gha rrie onurho Owa Ukpọn Ile, u ghi vbe viọ avbe ẹwu ohẹn rre, ofigbọn ne a sa ye emwa uhunmwu, ovbi ẹkhuia ẹmila ne a ra ya zọ ese orukhọ, ogho eveva ke ẹe kevbe okhuae ebrẹd ne ọ ma hue.

³ U ghi tie emwa nii hia sikoko ye evba.”

⁴ E Mosis keghi ru zẹ vbene Nọyaẹnmwa tama rẹn, ugbẹn vbe emwa nii ghi sikoko nẹ.

⁵ Ọ tama iran wẹẹ, “I ra ru zẹ vbene Nọyaẹnmwa khare.”

⁶ E Mosis keghi viọ Errọn ke ẹe kevbe ivbi ẹre rri odaro ne iran do khuẹ akhuẹ iruemwi.

⁷ Ọ keghi mu ẹwu iruemwi nii yọ ẹe, ọ keghi ye ugbẹkun ne mose ne a do nii gba ẹe ginna ẹẹn vbe ẹkun.

⁸ Ọ keghi mu uhanhan ẹwẹe yọ ẹe, ọ keghi vbe viọ Urim kevbe Tumin yọ.

⁹ Ọ keghi mu ukugba uhunmwu yọ ọre uhunmwu, ọ keghi vbe mu emwi itegbe igoru ne a gbẹnnẹ emwi yi ya fi ohan ne Nọyaẹnmwa, ye ọre odaro zẹ vbene Nọyaẹnmwa tama rẹn.

¹⁰ E Mosis keghi mu ori ne a sa ye emwa uhunmwu la uwu Owa Ukpọn Ile, ke ẹe kevbe emwi hia ni rre uwu ẹre, odẹ vberriọ, ọ keghi ya ehia fi ohan ne Nọyaẹnmwa.

¹¹ Ọ keghi rhie vbe ori nii, ọ keghi sanmwẹ ọẹn igba ihinrọn yan aka kevbe emwi ne a ya ru emwi vbọ hia, deba ọkpan nọkhua kevbe emwi ne a mu ẹẹn yan, ne a miẹn ehe na ya ehia fi ohan ne Nọyaẹnmwa.

¹² Ọ keghi ya Errọn ma ohẹn vbe ne ọ na sa eso vbe ori ne a sa ye ọmwa uhunmwu ye ọre uhunmwu.

¹³ Iyeke ọnii, e Mosis keghi viọ ivbi Errọn hia rrie odaro, ọ na viọ ẹwu yọ iran, ọ na gbalọ iran ebuluku, ọ na vbe gbalọ ẹrhu ye iran uhunmwu zẹ vbene Nọyaẹnmwa khare.

¹⁴ E Mosis keghi do mu ovbi ẹkhuia ẹmila ọghe ese orukhọ, Errọn kevbe ivbi ẹre keghi viọ obọ iran yan ẹre uhunmwu.

¹⁵ E Mosis keghi gbe ẹe, ọ keghi rhie vbe esagiẹn ọnrẹn, ọna ya ikpinhianbọ ẹre rhie ẹre ye ukpẹ aka ni rre okhiẹ ọre, ne a miẹn ehe na ya ẹe fi ohan, ọ na hihiẹ esagiẹn ni dekẹe ye ẹzi aka. Odẹ vberriọ ọ keghi ya ẹe fi ohan, ọ na ya ẹe khian ne ọ huansẹ.

¹⁶ E Mosis keghi viọ ẹvbi ni rre ẹkpokhurhu ẹre hia, ititi ẹvbi ne ọ rre udu ẹre kevbe ihẹnmwẹ ọnrẹn kevbe ẹvbi ni rrọ, ọ na giẹn ọnrẹn uan vbe aka.

¹⁷ Ọ keghi mu ne ọ ghi dekẹe vbe ẹkhuia nii, ke ẹe kevbe ohian rẹn, efun kevbe ẹkpokhurhu ẹre, ọ keghi ya giẹn ọnrẹn uan vbe a ghi lahin agọ rre nẹ zẹ vbene Nọyaẹnmwa wẹ ne a ru ẹe.

¹⁸ Iyeke ọnii, e Mosis keghi mu ogho ne a ya zọ ese ne a giẹn uan rre, Errọn kevbe ivbi ẹre keghi viọ obọ iran yan ẹre uhunmwu.

¹⁹ E Mosis keghi gbe ẹe, ọ na sanmwẹ esagiẹn ọnrẹn ye igienenẹ ọghe aka.

^20-21 Ọ keghi va ogho nii, ọ keghi ye amẹ kpe ibiẹ ọre kevbe owẹ ọre eveva, ọ keghi giẹn uhunmwu ẹnrẹn, ẹvbi ẹre kevbe ne ọ ghi dekẹe vbe ogho nii vbe aka zẹ vbene Nọyaẹnmwa khare. Ese na giẹn uan na, izọhẹ evbare nọ, uwinhinmwẹ ọnrẹn wa yẹ Nọyaẹnmwa.

²² Ẹre Mosis na mu ogho ne ogieva rre, ne a wẹ ne a ya ma avbe ohẹn, Errọn kevbe ivbi ẹre keghi viọ obọ iran yan ẹre uhunmwu.

²³ E Mosis keghi gbe ẹe, ọ na rhie vbe esagiẹn ọnrẹn ye etọghọ ehọ ọghe obọ erha ọmwa Errọn, ke ikpinhianbọ ne ogie ọghe obọ erha ọmwa kevbe ikpinhianwẹ ne ogie ọghe owẹ erha ọmwa.

²⁴ Ọ keghi vbe viọ ivbi Errọn ladian, ọ na rhie vbe esagiẹn nii ye iran etọghọ ehọ obọ erha ọmwa, kevbe ikpinhianbọ ne ogie ọghe obọ erha ọmwa iran, kevbe ikpinhianwẹ ne ogie ọghe owẹ erha ọmwa iran. Ẹre Mosis ghi na mu esagiẹn ne ọ dekẹe rhurhẹ ye igienenẹ ọghe aka.

²⁵ Ọ keghi mu ẹvbi ẹre, ẹrhunrhun ẹnrẹn nọkhua, ẹvbi hia ni rhu gue ẹkpokhurhu ẹre, kevbe ititi ẹvbi ne ọ rre avbe ihẹnmwẹ ke ẹvbi ni rhu yan iran, ke owẹ erha ọmwa rẹn,

²⁶ ọ keghi rhie ududu ebrẹd ọkpa vbe uwu okhuae ne a viọ ebrẹd ne ọma hue ne a ya fi ohan ne Nọyaẹnmwa yi, ebrẹd ne a ya ofigbọn ru kevbe ebrẹd ne fẹrhẹfẹrhẹ ọkpa, ọ keghi viọ ẹre yan ẹvbi kevbe owẹ erha ọmwa rẹn nii.

²⁷ Ọ keghi viọ evbare na hia ye Errọn vbe ivbi ẹre obọ, iran keghi viọ ẹre gie Nọyaẹnmwa, zẹ vbe emwi izọhẹ kpataki.

²⁸ E Mosis keghi miẹn iran evbare na, ọ na giẹn ọnrẹn uan vbe uhunmwu aka ese na giẹn uan, zẹ vbe ese ne a ya ma ohẹn. Ọna ke gha re izọhẹ evbare, uwinhinmwẹ ọnrẹn ke gha yẹ e Nọyaẹnmwa.

²⁹ Ẹre Mosis na mu ewẹn ọnrẹn, ọ na mu ẹẹn gie Nọyaẹnmwa zẹ vbe ọhẹ kpataki. Eso ne ọ sẹ Mosis obọ nọ vbe ogho ne a ya ma ohẹn. E Mosis keghi ru emwi hia zẹ vbe ne Mosis tama rẹn.

³⁰ E Mosis keghi rhie vbe ori ne a sa ye emwa uhunmwu ne ọ rre aka, ọ ke sanmwẹ ọẹn ku Errọn ke ẹe kevbe ivbi ẹre kevbe ukpọn. Odẹ vberriọ, ọ keghi ya iran kevbe ukpọn iran fi ohan ne Nọyaẹnmwa.

³¹ E Mosis keghi tama Errọn kevbe ivbi ẹre wẹẹ, “Wa mu emiowo nii gha rrie onurho Owa Ukpọn Ile, wa le ẹe, ne uwa vbe rri ọe vba ba ebrẹd ni ne ọ rre okhuae emwi izọhẹ ohẹn ne a maa, zẹ vbene Nọyaẹnmwa tama mwẹ ne I wẹ uwa ru.

³² U ghi giẹn emiowo ra ebrẹd ne ọ kẹrre.

³³ Wa ghẹ kpao vbe onurho Owa Ukpọn nii rre vbe ọwara ẹdẹ ihinrọn, a te do miẹn wẹ iruemwi ne a ya ye uwa rri ohẹn gba ẹe.

³⁴ E Nọyaẹnmwa ọre ọ tama ima ne ima ru emwi ne ima ru ẹrẹna ne a ya kpe orukhọ rua kua.

³⁵ Wa ghi wa gha rre onurho Owa Ukpọn ile nii asọn kevbe avan la ikpẹdẹ ihinrọn, wa ghi gha ru vbene Nọyaẹnmwa khare, deghẹ wa ma ru vberriọ, wa gha wulo.” Emwi ne Nọyaẹnmwa tama mwẹ ọre ọna khin.

³⁶ Ẹre Errọn kevbe ivbi ẹre na wa ru emwi hia ne Nọyaẹnmwa gie Mosis do kha.