Levitikọs 6 - Edo Bible (E Baibol Ẹdo) Version 1996

¹ E Nọyaẹnmwa keghi yi avbe uhi na hia ma e Mosis:

² “Te ọmwa gha zọ ese yọ a deghẹ igho ne ovbi Izrẹl rhie nẹẹn rhiemwẹ khian ne ọ ma ghi rhie werriegbe ne nọyan rẹn, ra vbe ọ gha rha ẹre, ra te ọ mu ẹẹn ru.

³ Ra te ọ ta ohoghe ye ẹmwẹ emwi ne ọ wiri, vbene ọ gha na vẹn ihẹn wẹ rẹn ma miẹn ọẹn.

^4-5 Ọmwa gha ru orukhọ vbenian, ọ ghi ha emwikemwi ne ọ la ekpa ibeleku miẹn nii. Ẹdẹ ne a gha miẹn wẹ ọ rri abe, ọ ghi ha obọkpa vbe a gha wa emwi nii ye ihe ugie, gbe ọmwa nii re vbe ọ gha ha ehia fo nẹ.

⁶ “Ọ ghi mu ogho ra ovbukhọ ne ẹ i mwẹ okan gie ohẹn zẹ vbe emwi izọ ese ne a ya ha emwi werriegbe. Omwa ne agbọn hia kue yi ọre a gha ya fian ive yọ.

⁷ Ohẹn ghi zọ ese nii ye orukhọ ne ọmwa nii ru, a ghi ya bọe.”

Ese Ne A Giẹn Uan Fo

⁸ E Nọyaẹnmwa keghi tama e Mosis:

⁹ Ne ọ viọ avbe uhi na ne Errọn kevbe avbe ivbi ẹre vbe ekpa ese ne a giẹn uan fo. “A ghi gha sẹ ese na giẹn uan rae ye aka la asọn hia, a ghi gie erhẹn nii gha baa.

¹⁰ Ohẹn ghi yọ ẹwu eto ovbiohuẹ kevbe utalawẹ eto ovbiohuẹ, ọ ghi kpolo emuẹn ne ọ yevbe ọdan ne ọ rrọ hinrre, ọ ghi viọ ẹre ye asefẹn aka.

¹¹ Ọ ghi ya fi ẹwu werriẹ, ọ ghi viọ emuẹn nii lahin agọ rre gha rrie ehe ne ẹ i mwẹ awua.

¹² A ghi gie erhẹn nọ rre aka gha baa, vbe ne ẹ i na dọyọ. Owiẹ owiẹ ọre ohẹn gha ya gha viọ erhan yọ, ọ ghi mwamwa ese na giẹn uan nii yọ, ọ ghi vbe giẹn efun emwi isara.

¹³ A ghi gie erhẹn nii gha baa vbe aka, a ghẹ giẹ dọyọ.

Izọhẹ Ọka

¹⁴ “Vbenian ọre a gha ya gha ru izọhẹ ọka. Ohẹn ghi mu ọka nii gie Nọyaẹnmwa vbe odaro aka.

¹⁵ Ọ ghi zẹ uguobọ ọkpa ọghe irhuarhua nii kevbe ofigbọn kevbe eturari hia, ọ ghi giẹn ọnrẹn vbe aka zẹ vbe ama wẹ e Nọyaẹnmwa ọ re a ya ẹe zẹ ọhẹ gie, uwinhinmwẹ izọese vbenian yẹ e Nọyaẹnmwa.

^16-17 Avbe ohẹn ghi rrie ni dekẹe vbọ. A ghi ya ẹe ru ebrẹd, a ghi rri ọe vbe ehe ne ẹ i mwẹ awua, vbe orere ọghe Owa Ukpọn e Nọyaẹnmwa. A ghẹ ye eyist gbe ẹe, te Nọyaẹnmwa rhie ẹre ne iran zẹ vbe ne ọ sẹ iran egbe vbe izẹ ọhẹ evbare nii. Te ọ wa huan ẹsẹse, zẹ vbe izọese orukhọ kevbe izese a hae werriegbe.

¹⁸ Vbe ẹghẹ nọ dee hia, ivbi Errọn ni ikpia ne ọrhirhi gha khin sẹtin rri ọe zẹ vbe oghae ne ọ kan iran vbe evbare ne a ya zẹ ọhẹ ne Nọyaẹnmwa. Ọmwaikọmwa ra emwikemwi ọvbehe ne ọ ya egbe kan emwi ne a ya zẹ ọhẹ gie Nọyaẹnmwa emwi guẹe.”

¹⁹ E Nọyaẹnmwa keghi viọ avbe ilele na ne Mosis:

²⁰ “Vbene a gha ya gha ma ohẹn Errọn hẹ. Vbe ẹdẹ ne a gha ma ẹre ohẹn nii ọ ghi mu uwan ọkpa ọghe irhuarhua ya zẹ ọhẹ gie Nọyaẹnmwa (zẹ vbene izọhẹ ọka ọghe ẹdẹgbegbe vbe bun sẹ) ukhiọnmwẹ vbe owiẹ, ukhiọnmwẹ vbe ota.

²¹ A ghi ya ofigbọn gbe ẹe, a ghi mu ọkpan ye erhẹn ya le ẹe, a ghi guọguọe, a ghi ya ẹe zọhẹ zẹ vbe emwi izẹ ọhẹ ọghe ọka, emwi ne ọ winhin yẹ e Nọyaẹnmwa.

²² Ovbi Errọn ne ọ rhirhi gha rre ukpo Ogie Ohẹn, te ọ gha zẹ ọhẹ na ke orre ya sẹ orre. A ghi wa giẹn ọnrẹn uan fẹẹrẹ zẹ vbe emwi izese ghe Nọyaẹnmwa.

²³ A ghẹ zẹdẹ re vbe izẹọhẹ ọka ne ohẹn ru hiehiere, a ghi wa giẹn ehia a.”

Izọse Orukhọ

²⁴ E Nọyaẹnmwa keghi tama e Mosis:

²⁵ “We ne ọ ma Errọn kevbe ivbi ẹre, emwamwa na, ọ ghe vbene a zọ ese ye orukhọ hẹẹ. Aranmwẹ ne a ya zọ ese ye orukhọ, odẹ okuọ ọghe aka ọre a gha na gha gbe ẹe, odẹ ehe ne a na gbele aranmwẹ eso ne a giẹn uan, izọese ne ọ huansẹ ẹsẹse ọre ọna khin.

²⁶ Ohẹn ne ọ ya aranmwẹ nii zọọ ese ghi rri ọe vbe ehe ne ọ huanrẹn, vbe orere Owa Ukpon Nọyaẹnmwa.

²⁷ Ọmwaikọmwa ra emwikemwi ne ọ ya egbe kan emiowo aranmwẹ nii, uhuanmwẹ aranmwẹ nii ghi ya ẹe khian ọmwa ne emwi gue. Esagiẹn ọnrẹn gha sanmwẹ ye ukpọn, a ghi ye amẹ ne ọ huansẹ họ ẹre.

²⁸ Uwawa ne a rhirhi ya le ẹe, a ghi gbe ẹe rua sokpan deghẹ ẹgere nọ, a ghi khiakhia ẹe, a ghi ye amẹ rria ẹre.

²⁹ Ọmọ okpia ike ọmọ okpia vbe ẹgbẹe ọghe ohẹn sẹtin rri emwi izọese nii, emwi ne ọ huansẹ ẹsẹse nọ.

³⁰ Sokpan, a gha mu esagiẹn ẹnrẹn la uwu Owa Ukpọn Ile, a na ya ẹe ru emwi akpehuan ọghe orukhọ, a ghẹ rri emiowo nii, a ghi wa giẹn ọnrẹn uan.