Levitikọs 5 - Edo Bible (E Baibol Ẹdo) Version 1996

Emwi Ne A Gha Zọ Ese Orukhọ Yi

¹ “Avbe emwi vbenian ọre a gha zọ ese orukhọ yi. A gha la odẹ ne a ru ẹe la tie ọmwa ne ọ do sẹ osẹe vbe iko, a deghẹ ọ ma ta ẹmwẹ nii zẹ vbene aro ẹre sẹ ọe, ra vbene a tama irẹn hẹ, ọ rri abe.

² A deghẹ ọmwa la ekpa a i gbe aro ke otọ ya ye obọ kan emwi awua zẹ vbe ne aranmwẹ ne ọ wu ye, awua gue ẹe, ọ vbe rri abe vbe ọwarọkpa nii ne ọ ya rẹn emwi ne irẹn ru.

³ “A deghẹ ọmwa la ekpa a i gbe aro ke otọ ya obọ kan emwi ne ọ ma huan ne ọ ke egbe ọmwa rre, awua gue ẹe, ọ vbe rri abe vbe ọwarọkpa ne ọ ya rẹn emwi ne irẹn ru.

⁴ “A deghẹ ọmwa la ekpa a i gbe aro ke otọ vẹn ihẹn oguegue, ọ rri abe vbe ọwarọkpa ne ọ ya rẹn emwi ne irẹn ru.

⁵ Ọmwa gha rria abe, ọ ghi miẹn orukhọ nii kue.

⁶ Ọ ghi mu iye ohuan ra ẹwe gie Nọyaẹnmwa zẹ vbe oya ne a ghi rri ọre re ye orukhọ ne ọ ru. Ohẹn ghi ya zọ ese nẹẹn, ne ọ kpe orukhọ ọre kua.

⁷ “A deghẹ obọ ọmwa na gba ẹwe ra iye ohuan, ọ ghi viọ idu eva ra elikhukhu eva gie Nọyaẹnmwa, ọkpa ne a ya zọ ese ye orukhọ, nọkpa ọghe ese ne a giẹn rẹn uan.

⁸ “Ọ ghi viọ iran bu ohẹn gha dee ne ọ ka ye ọkpa vbọ zẹ ese ye orukhọ. Ọ ghi bun ẹnrẹn ẹyaẹn vbe ne ẹ i na vbọ uhunmwu ẹnrẹn hin rre.

⁹ Ọ ghi vbe sanmwẹ esagiẹn ọnrẹn eso ye ikinnegbe aka. Ọ ghi da esagiẹn ọnrẹn nekpa ye otọ vbe ẹzi aka. Ese ne a ya kpe orukhọ kua nọ.

¹⁰ Ọ ghi ye ahianmwẹ nọkpa zọ ese ne a giẹn uan zẹ vbene a mwamwa ẹẹn. Odẹ vbenian ọre ohẹn gha na zọ ese ye orukhọ ọmwa nii, a ghi vbe ya bọe.

¹¹ “A deghẹ obọ ọmwa ma gba idu eva ra elikhukhu eva, ọ ghi mu uwan irhuarhua ọkpa rre ne ọ ya zọ ese ye orukhọ. We ne ọ ghẹ sa ofigbọn ọliv yọ ra eturari, rhunmwuda ẹ i re izọhẹ ọghe ọka sokpan izọhẹ orukhọ nọ.

¹² Ọ ghi mu ẹẹn bu ohẹn gha dee, rẹn ghi zẹ uguobọ ọkpa vbọ zẹ vbe ama wẹ te a ya ẹe zẹ ọhẹ gie Nọyaẹnmwa, ọ ghi giẹn ọnrẹn ruan vbe aka zẹ vbe izọ ese evbare. Ese ne a zọre ne ọ kpe orukhọ kua nọ.

¹³ Odẹ vberriọ ọre ohẹn gha na zọ ese ye orukhọ ọmwa nii, a ghi vbe ya bọe. Irhuarhua ni ghi dekẹe, ọghe ohẹn nọ, zẹ vbene ovbe ye vbe ọghe izẹọhẹ ọka.”

Izọhẹ Ne A Ya Ha Osa Werriegbe

¹⁴ E Nọyaẹnmwa keghi yi uhi na ma e Mosis:

¹⁵ “A deghẹ ọmwa rukhọ vbe ne ẹ i na re ẹmwẹ ọnrẹn vbene ọ ma na ha osa ne ọ huansẹ ne ọ khẹke Nọyan ladian, ọ ghi mu ogho ne ẹ i mwẹ okan gha de do ya zẹ ọhẹ a hae werriegbe gie Nọyaẹnmwa. Omwa ne agbọn hia rhan obọ miẹn ọre a gha ya fian ive yọ.

¹⁶ Ọ ghi do dọlegbe ha avbe emwi ne ọ te ke ya nii, ọ ghi vbe hae obọkpa vbe a gha emwi nii ye ihe ugie gbe ẹe. Ọ ghi mu gie ohẹn, ohẹn ghi ye aranmwẹ nii zọ ese ye orukhọ ọmwa nii, a ghi ya bọe.

¹⁷ “A deghẹ ọmwaikọmwa la ekpa a i gbe aro ke otọ ru orukhọ vbe ẹghẹ ihaoko a hae werriegbe gie ohẹn,

¹⁸ Vbene ọ gha na mu ogho ra ovbukhọ ne ẹ i mwẹ okan rre, ọmwa ne agbọn hia rhan obọ miẹn ọre a gha ya fian ive yọ, ohẹn ghi zọ ese nii ye orukhọ ọmwa nii, a ghi vbe ya bọe.

¹⁹ Emwi izọhẹ ne ọ ya ha osa orukhọ ne ọ ru ghe Nọyaẹnmwa nọ.”