Levitikọs 26 - Edo Bible (E Baibol Ẹdo) Version 1996

Afiangbe Ne Ọ Lele Ahọn Ẹmwẹ

¹ E Nọyaẹnmwa keghi kha wẹẹ, “Ghẹ ma amazẹ ra ama ọmwa, ọ re okuta ra okuta na a kare, ne uwa gha gae. Mẹ ọ re Nọyaẹnmwa Osanobua rua.

² Wa gha ru avbe emwiukpo ugamwẹ nii, wa ghi vbe ya ọghọ ne Owa Ukpọn mwẹ ne ọ huanrẹn. Mẹ ọre Nọyaẹnmwa.

³ “Deghẹ wa rhie owẹ lele uhi mwẹ wa na vbe gha ya ilele mwẹ ru emwi.

⁴ I gha gie amẹ gie uwa vbe ẹghẹ ne ọ khẹ ke, vbene otọ gha na gha ma emwiokọ, avbe erhan ghi vbe gha mọ ọmọ.

⁵ Emwiokọ rua gha bun sẹrriọ wẹ, ọka wa gha ye gha fian vbe ọ sẹ ẹghẹ ne a ya kpẹn iyan, wa ghi ye gha kpẹn iyan vbe ọ sẹ ẹghẹ ne a ya fian igbin. Wa gha mwẹ evbare ne uwa ho ne uwa re hia, wa ghi vbe gha rri ọe vbe ne ẹ i na mwẹ ẹbe vbe otọe rua.

⁶ “I gha rhie ọfumwegbe ne uwa vbe otọ rua, wa ghi vbe gha vbiẹ vbe ne uwa i na fian afianma, I gha fuẹn avbe aranmwẹ dan ni rre otọe nii, okuo i ghi ra vbe gha rrọọ vbe evba.

⁷ Wa gha khọn avbe eghian uwa hia muotọ.

⁸ Isẹn vbe uwu uwa gha sẹtin khọn arhin iyisẹn, iyisẹn gha sẹtin khọn arriaisẹn igbe (10,000).

⁹ I gha fiangbe uwa, I ghi vbe viọ emọ ni bun ne uwa, I ghi mu e nọkanmwasẹ vbe ile ne ima gba ta sẹ.

¹⁰ Emwiorhọ rua gha bun sẹrriọ wẹ, ọ gha gbe ukpo ohoho, a ghi vbe miẹn wẹ te uwa ghi kpolo ni dekẹe vbe ne uwa ka rhọ kua, ne uwa miẹn ehe na rhie otọ ne ne uwa da rhọ.

¹¹ I gha gu uwa yin vbe uwu Owa Ukpọn mwẹ ne ọ huanrẹn, ẹmwẹ uwa i ra vbe khan mwẹ.

¹² “Mẹ gha re Osanobua uwa, wa ghi vbe gha re emwa mwẹ.

¹³ Mẹ ne Nọyaẹnmwa Osanobua rua ọ re ọ viọ uwa ke Igipt ladian ne uwa ghẹ ghi gha re eviẹn ọvbehe. I guọghọ ẹtin ne ọ te de uwa ginna otọ, I na gie uwa gha khian vbe ne uwa na tọn uhunmwu uwa mu ẹsẹse.”

Oya Ne Ọ Rre Iyenhọ

¹⁴ E Nọyaẹnmwa keghi kha wẹẹ, “Deghẹ wa ma họn ẹmwẹ mwẹ, a gha rri uwa oya.

¹⁵ A deghẹ wa rhie obọ gberra ile ne I gu uwa ta vbe ekpa avbe uhi mwẹ,

¹⁶ I gha rri uwa oya. I gha si ọkhọ yan uwa uhunmwu, emianmwẹ ni i mwẹ ukhunmwu kevbe emwirraro ne ọ gha rhu uwa aro, kevbe ne ọ gha ya uwa gha rri ororo. Wa gha kọ emwiokọ uwa sokpan ẹ i ra ma ne uwa rhunmwuda eghian uwa gha khọn miẹn uwa otọ, iran ghi rri emwi ne uwa kọ ẹe.

¹⁷ I gha werriẹ aro da uwa, vbe ne a gha na miẹn wẹ a khọn miẹn uwa otọ, iran ni khuiwu uwa ghi gha khaemwisẹ yan uwa, wa gha runran sẹrriọ wẹ wa ghi gha lẹ vbene ọmwarhọkpa ma na khu uwa.

¹⁸ “Deghẹ a ghi miẹn wẹ vbe iyeke ena hia, wa ma ye họn ẹmwẹ mwẹ, I gha fian ukhukhu ihinrọn ba oya ne uwa gha re.

¹⁹ I gha guọghọ uhiomwẹ izevbudu rua, amẹ i ra rhọ, otọe rua ghi do ka, ọ ghi ye kakaaka vbe ẹrọnmwọ.

²⁰ Ẹsọn ne uwa gha miẹn hia, ọma ọkpa i ra kọe ladian, rhunmwuda, otọ ruẹ i ra ma emwiokọ, erhan ruẹn i ra vbe mọ.

²¹ “A deghẹ te uwa ye gha ze vbudu khian vbene uwa i na họn ẹmwẹ mwẹ, I gha dọlegbe fian ba oya ne I gha rri uwa ẹre ukhukhu ihinrọn.

²² I ghi gie aranmwẹ oha dan la uwu uwa, iran ghi gha gbele avbe ivbi uwa, iran gha fuẹn avbe ẹmila uwa a, wa ne ọ gha sẹ rae ghi gha re ibozẹghẹ sẹrriọ wẹ a i ghi ra gha miẹn emwa vbe urodẹ rua.

²³ A deghẹ vbe iyeke avbe oya na hia ighẹ wa ma ye zẹ yọ mwẹ re, wa na ye gha họhọ mwẹ uan.

²⁴ Ẹghẹ nii, I ghi werriẹ aro da uwa, I gha rri uwa oya ukhukhu ihinrọn sẹ ayọ.

²⁵ I ghi si okuo yi uwa egbe ne I ya rri uwa oya ye ne uwa na rhie obọ gberra ile ne ima gba ta, wa na ya si egbe koko ye ẹvbo uwa ne obọ ghẹ vba uwa, I ghi gie emianmwẹ nẹ i mwẹ ukhunmwu gie uwa, ẹ i re aro sẹẹnrẹn wa gha ya de ye igue vbe odaro avbe eghian uwa.

²⁶ I gha gbe odẹ ehe ne a la viọ evbare gie uwa sẹrriọ wẹ aroewu ọkpa gha sẹ ikhuo igbe na le ebrẹd hia ne iran mwẹ, iran ghi ghae ẹre umwọmwẹ, wa gha ghi rri ọe fo nẹ, ohanmwẹ ghi ye gha gbe uwa.

²⁷ A deghẹ ena hia yevbe sunu, wa na ya aro họhọ mwẹ uan, ighẹ wa ma họn ẹmwẹ mwẹ.

²⁸ Ẹghẹ nii ohu gha mu mwẹ I ghi werriẹ aro da uwa, I ghi dọlegbe rhie ukhukhu ihinrọn ba oya ne I gha rri uwa re.

²⁹ Ohanmwẹ gha gbe uwa sẹrriọ wẹ wa ghi gha gbele ivbi uwa re.

³⁰ I gha guọghọ ehe ne uwa na ga vbe uhunmwu oke hia, I ghi dunmwu aka ne uwa na giẹn eturari hia sẹ otọ. I ghi filo ikun orinmwi uwa yan amazẹ uwa ni dele. Vbe uwu ne emwi hia na khan mwẹ.

³¹ I gha ya ẹvbo uwa hia khian ni rẹnkhẹn uan, I gha guọghọ ehe ne uwa na ga. I ghi vbe he ese ne uwa zọre.

³² I gha rẹnkhẹn ẹvbo rua sẹrriọ wẹ, ọ gha kpan avbe eghian ni di evba ya udu, vbe iran a miẹn vbene a dunmwu ẹn ruan hẹ.

³³ I gha mu okuo da uwa. I gha zagha uwa a lele otọe ọrriọvbe. Otọe uwa ghi khian ne a lẹ sẹrae, ẹvbo uwa ghi vbe rẹnkhẹn uan.

^34-35 Ẹghẹ nii, otọe nii ghi do hẹko hẹwẹ egbe ne uwa ma te rhie ẹghẹ ọre nẹ. Ọ ghi gha rre evba vbe ne a na kpao sẹ ọe rae, ọ ghi hẹwẹ vbe ẹghẹ ne uwa gha ya gha rre imu vbe ẹvbo avbe eghian uwa.

³⁶ “I gha runran uwa ni rre imu vbe ẹvbo ẹrrẹe sẹrriọ wẹ, owogho ebe ne ẹhoho mu khian ghi si ulẹ ye uwa egbe. Wa ghi rhulẹ zẹ vbene a miẹn wẹ odaro okuo ọre a na khu uwa khian, wa ghi vbe dele vbe eghian ma sikẹ uwa.

³⁷ Wa ghi gha dele yan egbe vbene ọmwarhọkpa ma na khu uwa, wa i ra vbe sẹtin gu eghian rhọkpa gbinna.

³⁸ Wa gha wulo ye imu vbe ẹvbo ẹrrẹe, otọe eghian uwa ghi minọ uwa ree.

³⁹ Ibozẹghẹ ne ọ gha miẹn uhunmwu vbe ẹvbo eghian uwa gha la ọrhiae rrie rhunmwuda orukhọ obọ uwa kevbe ọghe avbe erha uwa odede.

⁴⁰ “Sokpan avbe ivbi uwa gha miẹn orukhọ iran kue, ọghe avbe erha iran odede kue, emwa ni muan mwẹ ẹmwẹ, iran na vbe sọtẹ ghe mwẹ.

⁴¹ Ne I na rhunmwuda ọnii mu aro da iran, ne I na viọ iran oghunmwu gha rrie ẹvbo eghian iran. Ọ gha sẹ okiekie, vbe a ghi vbokho avbe ivbi uwa nẹ iran mu egbe rrie otọ nẹ, ighẹ iran vbe rri oya ye orukhọ kevbe isọtẹ iran nẹ.

⁴² I ghi ye ile mwẹ ne I gu Jekọb, Aizik kevbe Ebraham ta rre, I ghi dọlegbe su eyan nii igie wẹ I gha mu otọe nii ne emwa mwẹ.

⁴³ Sokpan vbe okaro ehia, a gha ka viọ emwa nii hin otọe nii rre nẹ ne ọ miẹn ehe na hẹwẹ khuerhẹ, iran ghi vbe rri oya nọ khẹke ye ne iran na he uhi mwẹ kevbe emwamwa mwẹ.

⁴⁴ Ọ rhe ye vberriọ, ugbẹn vbe iran a gha rre ẹvbo eghian iran, I i ra wa fi iyeke gbe iran fo, ra ne I fuẹn iran an fẹẹrẹ. Ọnii gha rhie ufomwẹ ye ile ne imẹ gu iran ta sevba mẹ ọre Nọyaẹnmwa Osanobua iran.

⁴⁵ gha dọlegbe so igie ye ile ne imẹ gu avbe erha iran odede ta vbe I rhie ẹtin ma avbe uhunmwu ẹvbo hia vbe ekpa ne I na viọ emwa mwẹ ke Igipt ladian ne imẹ ne Nọyaẹnmwa miẹn ehe na gha re Osanobua iran.”

⁴⁶ Ena ọrọre avbe nene uhi kevbe emwamwa ne Nọyaẹnmwa viọ ne Mosis vbe Oke Sainai ne ọ viọ ne ivbi Izrẹl.