Levitikọs 25 - Edo Bible (E Baibol Ẹdo) Version 1996

Ukpo Nogihinrọn

¹ E Nọyaẹnmwa keghi gu e Mosis guan vbe Uhunmwu oke Sainai Ọ na wẹẹ,

² “Ne ọ viọ avbe emwamwa na ne ivbi Izrẹl. Ugbẹn vbe uwa a ghi sẹ otọ nii ne Nọyaẹnmwa ra mu ne uwa ne, wa ghi ya ọghọ ne Nọyaẹnmwa vbe kpa ne a gha na miẹn wẹ wa ma mu ugbo vbe otọe nii vbe ukpo ne ogihinrọn vbọ.

³ Vbe ukpo ehan vbọ, wa ghi kọ emwiokọ ye ugbo uwa, wa ghi gbe iku ye emwiokọ ayọn ne ọ baa ọghe uwa, wa ghi vbe rhọ emwiokọ uwa si koko.

⁴ Sokpan ukpo ne ogihinrọn ghi gha re ukpo ne a ya hẹwẹ nọ ne otọe nii, ukpo ne a ya fi ohan ne Nọyaẹnmwa. Wa ghẹ kọ emwi ye ugbo rua, wa ghẹ vbe gbe iku ye emwiokọ ayọn nọbaa ọghe uwa.

⁵ Wa ghẹ rhọ avbe ọka ni de zọọ ra ne uwa kọlọ ọmọ emwiokọ ayọn nọbaa ne uwa ma gbe iku yi. Ukpo ọghe a hẹwẹ kpẹe ọ re nọ ne otọe nii.

⁶ Vbe ukpo vberriọ, oha ne a ma mu ẹre ugbo gha ya evbare koko uwa, avbe eviẹn uwa, emwa ne uwa viọ ye iwinna, avbe orhunmwuyẹn ni rre ẹvbo uwa.

⁷ Emwirri uwa kevbe aranmwẹ ni rre oha uwa. Emwikemwi ne otọe ne a ma kọ emwi yi nii ghi mọ ladian, wa rri ọe.

Ukpo Afanvbirri

⁸ “Wa ghi ka ukpo ihinrọn igba ihinrọn, ọ ghi do gha re ukpo ọkpairrọ vbe kigbesiyeha vberriọ,

⁹ ọ gha ghi sẹ ikpẹdẹ ne ogigbe ọghe uki ne ogihinrin, ẹdẹ Erinmwian nọ, u ghi giẹ ọmwa ne ọ si orhu la ẹvbo hia.

¹⁰ Odẹ vberriọ, wa ghi zẹ ukpo ne ogie ekigbe siyeha kọ, wa ghi tie avbe emwa ni ghi rre otọe nii hia ni yan egbe iran vbe uwu ukpo nii, vbe ukpo vberriọ, emwi hia ne a te khiẹnnẹ kua, a ghi dọlegbe viọ ne ni yan iran ra uniẹn ivbi ẹre.

¹¹ Wa ghẹ kọ emwi ye ugbo, wa ghẹ rhọ avbe ọka ni de zọọ, ra na uwa ya kọlọ ọmọ emwiokọ ayọn nọbaa ne uwa ma gbe iku yi.

¹² Ukpo nii hia ghi gha re ukpo ne ọ huanrẹn ne uwa, emwi ne oha ne a ma kọ emwi yi mọẹn, ọre uwa gha re.

¹³ Vbe ukpo na, emwi ne a te khiẹnnẹ kua, a ghi dọlegbe hẹ ne nọyan rẹn.

¹⁴ Rhunmwuda ọnii, u gha khiẹn otọ ne ovbi Izrẹl ne ihua, ra te uwẹ guẹe de otọ, ghẹ yin ẹre ọghe ẹkpe.

¹⁵ A ghi ta ive ẹre ye inu ukpo ne otọe gha ya mọ ọmọ ọ te ya sẹ ukpo afanvbirri ne ọ lele ẹe.

¹⁶ “Deghẹ ukpo nii bun, a ghi gie ẹe vbe ghan. Sokpan a deghẹ omwa ukpo eso nọ, a ghi vbe gie igho ẹre sikẹ otọ, rhunmwuda emwiokọ ne otọe nii gha mọ ọre a khiẹn.

¹⁷ Ghẹ mu ovbi Izrẹl ne ihua ru. Sokpan mu ohan e Nọyaẹnmwa Osanobua ruẹ.

Olọghọ Ukpo Nogihinrọn

¹⁸ “Gha rhie owẹ lele uhi kevbe emwamwa ọghe Nọyaẹnmwa ne u miẹn ehe na yin otọ nii vbe ne a i na mwẹ ẹbe.

¹⁹ Otọ nii gha mọ, wẹ gha vbe mwẹ sẹ vbene u gha re, ne u vbe gha rri ọe vbe ọfumwegbe.

²⁰ “Sokpan emwa eso gha kha wẹ, de emwi ne a ra re yi vbe ukpo ne ogihinrọn nii ne a ma na kọ emwi ye ugbo, a ma vbe rhọ emwiokọ?

²¹ E Nọyaẹnmwa gha fiangbe otọe nii vbe ukpo ne ogiehan sẹ rriọ ne ọ gha ma emwiokọ ne ọ gha sẹ uwa re la ukpo eha.

²² “Wa gha kọ emwiokọ ye ugbo uwa vbe ukpo ne ogierẹnrẹn, wa ghi he ye gha rri emwiokọ ne uwa rhọ re vbe ukpo ne ogiehan, ọ gha vbe sẹ uwa re rhinrin a te do rhọ emwiokọ ne uwa kọ ẹe vbe ukpo nii.

Amuweriegbe Emwi Ewe

²³ “Wa ghẹ khiẹn otọ uwa fua fẹẹrẹ, rhunmwuda ẹ i re ọwuẹ ọghe Osanobua nọ, te uwa ye vbe orhunmwuyẹn ne a kue yọ ẹre ne ọ gha lo ẹre.

²⁴ A gha khiẹn otọ, a ghi rhie ye ekhọe wẹ ọmwa ne ọ ka yan rẹn mwẹ ase ne a ya dẹ ọe werriegbe.

²⁵ A deghẹ ovbi Izrẹl khian ovbiogue ọ na ghi mu otọ ẹre khiẹn, ọtiọnrẹn ne ọ ghi sikẹ ọre sẹ ghi dẹ ọe werriegbe.

²⁶ “Ọmwa ne ẹ i mwẹ ọtẹn ne ọ gha dẹ ọe werriegbe, sẹtin do khian ne ọ ghi mwẹ emwi vbe okiekie, ọ ghi do miẹn ya tobọ ẹre dẹ ọe werriegbe.

²⁷ Ọ gha ye vberriọ, ọ ghi roro inu ukpo ne ọ ghi ke ẹe, a ke sẹ ukpo afanvbirri ne ọ lele ẹe ne ọ ha ẹre ne ọmwa ne ọ guẹe de otọ nii, ukpo ne ọ gha te do dẹ ọe werriegbe.

²⁸ Sokpan a deghẹ ọ ma miẹn igho ya dẹ ọe werriegbe, ọ ghi gha gue ọmwa ne ọ dẹ ọe nii ọ te ya sẹ ukpo afanvbirri ne ọ lele ẹe. Vbe ukpo nii a ghi mu ẹẹn werriegbe ne nọyan rẹn.

²⁹ “A deghẹ ọmwa khiẹn owa vbe uwu ẹvbo ne a gbe ekẹn lẹga, ọ sẹtin dẹ ọe werriegbe vbe iyeke ukpo ọkpa ne a ghi dẹ ọe.

³⁰ Sokpan a deghẹ ọ ma dẹ ọe werriegbe vbe uwu ukpo nii, ọ mu asẹ ne a ya dẹ ọe werriegbe fua, owa nii ghi khian ọghe ọmwa ne ọ dẹ ọe kevbe ẹdẹ ke emwa uniẹn ọnrẹn. A i vbe mu werriegbe nẹ vbe ukpo Afanvbirri.

³¹ Sokpan avbe owa ni rre ẹvbo na ma gbe ekẹn ga, a ghi ka ẹe ye vbene oha ye. Ọmwa ne ọ ka yan rẹn mwẹ asẹ ne ọ ya dẹ ọe werriegbe, a ghi vbe viọ ẹre werriegbe vbe ukpo Afanvbirri.

³² “Vbene ọ rhirhi a gha ye hẹ, avbe Livai mwẹ asẹ ne a ya dẹ emwi iran werriegbe vbe ẹghẹ ne ọ rhirhi gha khin vbe ẹvbo avbe Livai.

³³ A deghẹ e Livai khiẹn owa vbe ẹvbo ne a gbe ekẹn lẹga, ighẹ a ma vbe dẹ ọe werriegbe, a ghi mu ẹẹn werriegbe nẹẹn vbe ukpo Afanvbirri, rhunmwuda owa ne avbe Livai mwẹ vbe ẹvbo, ọ ghe iran nọ rhinrin vbe uwu ẹbu ivbi Izrẹl.

³⁴ Sokpan otọ ne a na rri ẹmila ni lẹga ẹvbo Livai, a ghẹ khiẹn ọẹn iran ọ yan rẹn rhinrin ẹdẹ.

Igho Ne A Rhie Ne Ovbiogue Mọmọ

³⁵ “A deghẹ ovbi Izrẹl ne ihua ne ọ yin diake uẹ khian ovbiogue ighẹ ẹ i ghi sẹtin koko egbe ẹre, u ghi gha koko ẹe zẹ vbe ne u gha koko ọmwa ne u rhie vbe iwinna ne ọ miẹn ehe na sẹtin gha yin diake uẹ.

³⁶ Ghẹ fian igho isu nẹ, sokpan gha mu ohan Osanobua ne u vbe gie ovbi Izrẹl ne ihua gha yin diake uẹ.

³⁷ Ghẹ rhie igho isu nẹẹn mọmọ, ghẹ vbe khiẹn evbare nẹẹn ne u miẹn ere vbọ.

³⁸ Vbene Nọyaẹnmwa Osanobua ruẹ khare ọre ọna khin, ọmwa ne ọ viọ uwa ke Igipt ladian, ne ọ miẹn ehe na rhie otọ Kenan ne uwa kevbe ne ọ vbe gha re Osanobua uwa.

Eviẹn Ne A Fannọ Kua

³⁹ “A deghẹ ovbi Izrẹl ne ihua ne ọ yin diake uẹ khian ovbiogue, ọ na khiẹn egbe ẹre nuẹn zẹ vbe ọviẹn, ghẹ ya ẹe winna iwinna ọviẹn ọmwa.

⁴⁰ Ọ ghi gha guẹe zẹ vbe ọmwa ne a rhie vbe iwinna, ọ ghi gha gaa ọ tedo sẹ ukpo Afanvbirri ne ọ lele ẹe.

⁴¹ Ọ gha sẹ ẹghẹ nii rẹn vbe ivbi ẹre ghi sẹ uẹ rae, iran ghi dọlegbe gha rrie ẹgbẹe iran, iran ghi gha rrie ehe ne emwi ewe avbe erha iran odede ye.

⁴² “Eviẹn ọghe Nọyaẹnmwa ọ re ivbi Izrẹl khin, rẹn ọ re ọ viọ iran ke Igipt ladian, a ghẹ khiẹn iran ya ru ọviẹn hiehiere.

⁴³ Ghẹ ya obọ ọkhọ mu iran, sokpan mu ohan Osanobua.

⁴⁴ A deghẹ wa gualọ ọviẹn, wa sẹtin ya dẹlẹ vbe ẹvbo nii lẹga uwa.

⁴⁵ Wa sẹtin vbe dẹ ivbi ọrriọvbe nii rre uwu ẹbu uwa. Egbe emọ vberriọ ne a biẹlẹ ẹe vbe ẹvbo uwa sẹtin khian emwi ne uwa yan rẹn.

⁴⁶ Wa sẹtin vbe ya iran ru ukhu ne a sẹ rae ye otọ ne ivbi uwa, ne iran gha ga iran vbe ẹdẹ agbọn iran hia. Sokpan, wa ghẹ ya obọ ọkhọ mu ivbi Izrẹl ne ivbi ẹvbo rua.

⁴⁷ “A gha miẹn wẹ ọrriọvbe ra ọmwa ne uwa rhie vbe iwinna ne ọ rre ẹbu u wa do khian ọmwa ne ọ fe, vbene ovbi Izrẹl ne ọ rre ehe ne u ye na khian ovbiogue, ọ na khiẹn egbe ẹre ne ọrriọvbe ra ọmwa ne a rhie vbe iwinna nii dẹ.

⁴⁸ Iyeke vbe a ghi khiẹn ọẹn nẹ, a ye mwẹ asẹ ne a ya dẹ ọe werriegbe. Ọkpa vbe uwu avbe etiọnrẹn ni ikpia,

⁴⁹ ra ọtẹn erha ẹe nokpia ra ọmwa ne iran gba re eyẹ, ra ne ọ rhirhi a gha khin vbe uwu etẹn nii sikẹ ọre sẹtin dẹ ọe werriegbe, ra deghẹ rẹn tobọ ẹre miẹn igho bun sẹ, ọ sẹtin de egbe ẹre lahin ọviẹn rre.

⁵⁰ Rẹn vbe ọmwa ne ọ dẹ ọe ghi gba ta ẹe, ọ ghi ke ẹghẹ ne a na dẹ ọe ke inu ukpo ne ọ rrọ ya sẹ ukpo Afanvbirri ne ọ lele ẹe, ọ ghi ta igho ẹre ye igho ne a hae ne ọmwa ne a rhie vbe iwinna.

^51-52 Ọ ghi hae eso vbe igho ne a ya dẹ ọe werriegbe zẹ vbe inu ukpo ne ọ ghi ke ẹe.

⁵³ Zẹ vbe ne a miẹn wẹ te a rhie ẹre vbe iwinna ne a ta ye ukpo ọkpọkpa. We ne arowa ẹre ghẹ ye obọ ọkhọ mu ẹẹn.

⁵⁴ A deghẹ a ghi la odẹ na hia, a ma miẹn ne a ghi la dẹ ọe werriegbe vbọ, ọ gha sẹ ukpo Afanvbirri ne ọ lele ẹe, a ghi faẹn fannọ ivbi ẹre kua.

⁵⁵ Ovbi Izrẹl i sẹtin gha re ọviẹn etẹbitẹ, rhunmwuda eviẹn Nọyaẹnmwa ọ re ivbi Izrẹl khin, rẹn ọ re ọ viọ iran ke otọ Igipt ladian, rẹn ọ re Nọyaẹnmwa Osanobua iran.”