Levitikọs 22 - Edo Bible (E Baibol Ẹdo) Version 1996

Uhuanmwẹ Emwi Izẹọhẹ

¹ E Nọyaẹnmwa keghi tama e Mosis,

² ne ọ tama Errọn kevbe ivbi ẹre wẹẹ, “Wa ghẹ fa eni mwẹ ne ọ huanrẹn uan, rhunmwuda ọnii wa gha ya ọghọ ne avbe emwi izẹ ọhẹ ne ọ huanrẹn ne ivbi Izrẹl ya fi ohan mẹ. Mẹ ọ re Nọyaẹnmwa.

³ A deghẹ a miẹn orhiọnkpa vbe uwu avbe ivbi uẹ ne ọ sikẹ emwi izẹọhẹ nihuanrẹn ne ivbi Izrẹl ya fiohan mẹ vbe awua rre ọre egbe, a ghẹ gie ẹe dọlegbe ladian vbe odaro mwẹ do ga mwẹ ọvbehe. Iyi ẹdẹdẹmwẹdẹ ọna khin. Mẹ ọ re Nọyaẹnmwa.

⁴ “Vbe uwu avbe ivbi Errọn, a deghẹ a miẹn ne ọ khuọnmwi emianmwẹ ikpakpa egbe ra egbe ne ọ gin vbọ, a ghẹ gie ẹe re vbe uwu izẹọhẹ nihuanrẹn a te do miẹn wẹ awua i ghi guẹe. Ohẹn ne ọ rhirhi ya obọ kan emwi ne awua ye rhunmwuda ne ọ na dekan orinmwi ra ne eku ladian vbe egbe ẹre.

⁵ Ra ne ọ ya obọ kan aranmwẹ awua, ra ọmwa ne awua gue,

⁶ awua guẹe, ọ te yasẹ ota, uhin vbe ọ gha vbe sẹ ẹghẹ ota nẹ, wẹ ne ọ ghẹ rri emwi nihuanrẹn na ya zẹ ọhẹ vbe ẹ i re te ọ khuẹ nẹ.

⁷ Owẹn gha defua nẹ, ọ khian ne awua i ghi gue, ẹghẹ nii, ọ sẹtin rri emwi izẹọhẹ ni huanrẹn ni rre evbare ọghọe.

⁸ We ne ọ ghẹ rri emiowo aranmwẹ ne ọ wu uwu ẹhi, ra ne aranmwakọn gbe. Ọ gha mu awua gie ẹe. Mẹ ọ re Nọyaẹnmwa.

⁹ “Avbe ohẹn hia ghi lele emwamwa ne I mu ye otọ. De ghẹ ẹ i re vberriọ iran gha rrie abe, a ghi vbe gbele iran an, rhunmwuda, iran rra uhi emwamwa ne ọ huanrẹn. Mẹ ọ re Nọyaẹnmwa, mẹ ọ re ọ vbe ya iran khian ne ọ huanrẹn.

¹⁰ “Ọmwarhọkpa ghẹ rri avbe emwi izẹ ọhẹ ni huanrẹn nii, ugbẹn vbe a miẹn wẹ ẹ i re ẹgbẹe ohẹn, ọ gha khọnrẹn ne a miẹn wẹ ohẹn ọre ọ gu dia ra te ọ rhie ẹre vbe iwinna.

¹¹ Sokpan ọviẹn ohẹn ne ọ ya igho de ra ne a biẹ ẹe vbe owa ẹre sẹtin re vbe evbare ne a viọ gie ohẹn.

¹² Ovbi ohẹn ne okhuo ne ọ rọnmwẹ ọmwa ne ẹ ire ohẹn, a ghẹ gie ẹe re vbe izẹọhẹ ni huanrẹn.

¹³ Sokpan, ọmọ okhuo ne ọ dẹgbẹ ra ne ọ sẹ ọdọ rae, ẹ i vbe mwẹ emọ, ọ na vbe do gha rre owa erha ẹe zẹ vbe ọmọ ne orre owa, sẹtin re vbe evbare ne ọ sẹ erha ẹe obọ zẹ vbe ohẹn. Ọmwa ne ẹ i re ovbi ẹgbẹe ohẹn, a ghẹ giẹ re vbọ.

¹⁴ “A deghẹ ọmwa ne ẹ i re ovbi ẹgbẹe ohẹn re vbe emwi izẹọhẹ ni huanrẹn nii, vbe ne ọ ma na rẹn, ọ ghi ha ẹre werriegbe gie ohẹn, ọ ghi vbe zẹ ukhukhu eva gbe ẹe.

¹⁵ A ghẹ gie avbe ohẹn fafa emwi izẹọhẹ ni huanrẹn uan.

¹⁶ Vbe ne iran gha na gie emwa ni ma khẹ ke re vbọ, emwi vberriọ gha ya ọmwa nii rri abe, a ghi vbe rri ọre oya. Mẹ ọ re Nọyaẹnmwa, mẹ ọ re ọ vbe ya emwi izẹ ọhẹ nii khian nihuanrẹn.”

¹⁷ E Nọyaẹnmwa keghi tama e Mosis,

¹⁸ ne ọ mu avbe emwamwa na ye otọ ne Errọn kevbe ivbi ẹre kevbe emwa Izrẹl hia, “Ọmwa ne ọre ovbi Izrẹl ra orhunmwuyẹn ne ọ rre Izrẹl gha zẹ ọhẹ ese na giẹn uan, ọre te ọ ya ẹe mu eyan sẹ ra ọghe ne ọ ke ekhọe rre, ọ ma ke ne aranmwẹ nii gha mwẹ okan.

¹⁹ Ọ kere ne ọ gha re ọwẹ ne ẹ i mwẹ okan adeghẹ a gha rhan obọ miẹn rẹn.

²⁰ Wa gha ye aranmwẹ ne ọ mwẹ okan zẹ ọhẹ, e Nọyaẹnmwa i rhan obọ miẹn rẹn.

²¹ Deghẹ ọmwa ya emwi sisara gie Nọyaẹnmwa, ọre ne ọ ya mu eyan sẹ nọ ra ọghe ọ ke ekhọe rre, ọ kere ne aranmwẹ nii gha rre ne ẹ i mwẹ okan, adeghẹ a gha rhan obọ miẹn rẹn.

²² Wa ghẹ ye aranmwẹ ne ọ rhu aro zẹ ọhẹ gie Nọyaẹnmwa, ra ne ọkunse, ne ọ fian ut ukhunmwu, ra ne ọmwa ẹtẹ ne ọ gin amẹ ne egbe ẹre vbuavbuae ra ne ọ bolo ikpakpa. Wa ghẹ ya egbe aranmwẹ vberriọ zọ ese vbe aka zẹ vbe izẹọhẹ evbare.

²³ U sẹtin ye aranmwẹ ne ọ kpẹrri ra ne a yi khọ, sisara sokpan a i miẹn ọmwa ọnii zẹ vbe emwi ne a ya mu eyan sẹ.

²⁴ Ghẹ ya aranmwẹ ne a guọghọ ẹre ivin ekuẹ, ra na a fian ẹre re, ra ne a kuanrẹn ẹre, ra na a wa fian ẹre fua, zẹ ọhẹ gie Nọyaẹnmwa. A ma fan obọ ọna ne ọmwa vbe otọe ruẹ.

²⁵ “Ghẹ ye aranmwẹ ne a miẹn orhunmwuyẹn re zẹ ọhẹ evbare, aranmwẹ ne egbe ma gba na ọ re a ka egbọre baa, a i vbe rhan obọ miẹn rẹn.

^26-27 A gha da bie ovbi ẹmila, ovbi ohuan ra ovbi ẹwe, a ghẹ mu ẹẹn hin egbe iye ẹe rre ọ te gba vbe ẹdẹ ihinrọn, sokpan vbe iyeke ọnii, a sẹtin rhan obọ miẹn ẹnrẹn zẹ vbe izẹ ọhẹ evbare.

²⁸ Ghẹ ya ẹmila vbe ovbi ẹre ra ohuan vbe ovbi ẹre ra ẹwe vbe ovbi ẹre zọ ese ẹdẹ ọkpa.

²⁹ “U gha zọ ese ekpọnmwẹ ghe Nọyaẹnmwa, u ghi lae vbe ne a mwamwa ẹn ye otọ na, ne a miẹn ehe na rhan obọ miẹn ruẹn ẹre.

³⁰ Wa rri ehia a ẹdẹ rriọ, ghẹ vbe sẹrae vbọ khẹ owiẹ nọ lele ẹe.”

³¹ E Nọyaẹnmwa keghi kha wẹẹ, “Wa gha ya uhi mwẹ ru emwi, mẹ ọ re Nọyaẹnmwa.

³² Wa ghẹ rhie efaa gie eni mwẹ ne ọ huanrẹn. Ọ kere ne emwa Izrẹl hia rẹn mwẹ ye ọmwa ne ọ huanrẹn. Mẹ ọ re Nọyaẹnmwa, mẹ ọ re ọ ya uwa khian ni huanrẹn.

³³ I keghi dẹlẹ uwa ke otọe Igipt rre ne I do gha re Osanobua rua. Mẹ ọre Nọyaẹnmwa.”