Levitikọs 2 - Edo Bible (E Baibol Ẹdo) Version 1996

Ihaoko Ọka

¹ “Omwa gha yo imuohan ọka gie Nọyaẹnmwa, ọ ghi ka dunmwu ẹre irhuarhua nẹ, ọ ghi sa ofigbọn ọliv kevbe eturari ba ẹre.

² Ọ ghi mu ẹẹn bu ohẹn Errọn gha dee. Ohẹn ne ọ ru ugamwẹ ghi zẹ uguobọ ọkpa irhuarhua nii, ọ ghi giẹn ọnrẹn uan vbe aka ne a ya rhie ma wẹ te a ya ẹe zọ ese ghe Nọyaẹnmwa. Uwinhinmwẹ emwi ihaoko evbare vbenian yẹ Nọyaẹnmwa.

³ Ni ghi dekẹe vbe emwi imuohan ọghe ọka nii, avbe ohẹn ne ivbi Errọn ọre ọ ghi yaẹn, emwi ne ọ huansẹ ẹsẹse wa nọ rhunmwuda usun evbare ne a ya fi ohan ne Nọyaẹnmwa nọ.

⁴ A deghẹ ebrẹd ne a ru vbe aroewu nọ ighẹ nene emwi izọese nii, a ghẹ rhie eyist yọ. Ọ sẹtin gha re ebrẹd ne ọ mwẹ imi ne a ya irhuarhua ne a ye ofigbọn ọliv gbe, ra ne fẹrhẹfẹrhẹ ne a ye ofigbọn ọliv woo.

⁵ “A deghẹ emwi ihaoko nii ighẹ ọghe ebrẹd ne a mu ọkpan ye erhẹn ya fian nọ, a ghi ya irhuarhua ne a ye ofigbọn ọliv gbe fian ẹn sokpan ne a ghẹ rhie eyist yọ.

⁶ U gha ra ya zọ ese, u ghi guọghọe ne u vbe sa ofigbọn nii yan rẹn.

⁷ A deghẹ ebrẹd ne a le vbe akhe ọre emwi ihaoko nii khin, a ghi ya irhuarhua ke ofigbọn ọliv ru ẹe.

⁸ U ghi mu ẹẹn bu e Nọyaẹnmwa gha dee zẹ vbe emwi ihaoko, u ghi mu ẹẹn ne ohẹn ne ọ mu ẹẹn gha rrie aka.

⁹ Ohẹn ghi rhie ekherhe vbọ zẹ vbe ama wẹ a ya ehia ha oko gie Nọyaẹnmwa nẹ, ọ ghi giẹn ọnrẹn vbe aka. Uwinhinmwẹ emwi ihaoko evbare vbenian yẹ Nọyaẹnmwa.

¹⁰ Ni ghi dekẹe vbe emwi iha oko nii, ọghe avbe ohẹn nọ, emwi ne ọ huansẹ ẹsẹse wa nọ vbene a na miẹn wẹ evbare ne a ya haoko gie Nọyaẹnmwa ọre a na rhie ẹre rre.

¹¹ A ghẹ ya eyist gbe ebrẹd ne uwa ya ha oko gie Nọyaẹnmwa, wa ghẹ ya eyist ra owọn le evbare ne a ya ha oko gie Nọyaẹnmwa.

¹² Wa ghi ha oko ọka ne uwa ka gha rhọ gie Nọyaẹnmwa ukpukpo, sokpan a ghẹ giẹn ọnrẹn vbe aka.

¹³ Wa ghi ya umwẹ ye ọka hia ne uwa ya ha oko gie Nọyaẹnmwa rhunmwuda te umwẹ mudia ye ihe ile ne uwa vbe Osanobua ta ne egbe wa ghi gha ya umwẹ ye emwi iha oko hia.

¹⁴ Wa gha viọ emwi iha oko ọghe ọka ne uwa ka gha rhọ gie Nọyaẹnmwa, wa ghi ya emwiokọ ne a tọẹn ha oko ra evbare ne a lọ ẹe.

¹⁵ Wa ghi rhie ofigbọn ọliv kevbe eturari ba ẹre.

¹⁶ Ohẹn ghi giẹn ekherhe ne a rhie vbọ kevbe ofigbọn, ne ọ gha re ama kevbe eturari hia zẹ vbe iha oko evbare gie Nọyaẹnmwa.