Levitikọs 19 - Edo Bible (E Baibol Ẹdo) Version 1996

Uhi Uhuanmwẹ Kevbe Ẹmwata

¹ E Nọyaẹnmwa keghi tama e Mosis,

² ne ọ tama ivbi Izrẹl wẹẹ, “Wa gha re ni huanrẹn rhunmwuda ọmwa ne ọ huanrẹn mẹ khin. Mẹ ọ re Nọyaẹnmwa Osanobua uwa.

³ Dọmwadẹ ọghọe ghi gha ya ọghọ ne erha ẹe kevbe iye ẹe, wa ghi vbe gha ru avbe ugamwẹ Ẹdẹ Ikẹtin zẹ vbene I khare. Mẹ ọre Nọyaẹnmwa Osanobua uwa.

⁴ “Wa ghẹ sẹ mwẹ rae ya gha gho amazẹ, wa ghẹ vbe ye oze ma ẹbọ ne uwa gha gho. Mẹ ọre Nọyaẹnmwa Osanobua uwa.

⁵ “Wa gha gbe aranmwẹ ya sisara, wa ghi gha lele emwamwa ne I rhie ye otọ ne uwa, mẹ gha rhan obọ miẹn ese ne uwa zọ re.

⁶ A ghi rri emiowo ẹre fo vbe ẹdẹ ne a gbe ẹe, ra ẹdẹ ne ọ lele ẹe. Emiowo ne ọ ghi kẹ rre ya sẹ ẹdẹ ne ogieha, a ghi giẹn ọnrẹn uan.

⁷ Rhunmwuda awua rrọọ, a deghẹ ọmwaikọmwa ye rri ọe, mẹ i ghi rhan obọ miẹn ese nii.

⁸ Ọmwaikọmwa ne ọ rri ọe, ọ gha rri abe ọghe wẹ ọ kegha ru emwi ne a ya fi ohan mẹ zẹ vbe ne a miẹn wẹ ọ ma sẹ emwirhọkpa, a i ghi vbe dọlegbe ka ẹe ba emwa mwẹ.

⁹ “Wa gha rhọ emwi okọ ugbo rua, wa ghẹ rhọ avbe ọka ni rre ọkhioha, wa ghẹ vbe dọlegbe ya rhọ avbe ọka ne a te sẹrae.

¹⁰ Wa ghẹ dọlegbe la ugbo emwi okọ ayọn nọbaa ne uwa rhọ ọmọ rẹn ne ọ te kharha kua. Wa sẹ enii rae ne avbe ivbiogue kevbe avbe orhunmwuyẹn. Mẹ ọ re Nọyaẹnmwa Osanobua rua.

¹¹ “Ghẹ rha ra ne u gbe ọmwa rhu, ra ne u ta ohoghe.

¹² Ghẹ ya eni mwẹ ru eyan a deghẹ ẹ i re te u ho ne u mu ẹẹn sẹ, te ọnii fa eni mwẹ uan. Mẹ ọre Nọyaẹnmwa Osanobua rua.

¹³ “Ghẹ gu ọmwa do ẹki a sẹ ọmwa, ra ne u gbe ẹe miẹn re emwi. Ghẹ da igho ne u hae ne ọmwa ne ọ winna nuẹn yi, ghẹ da ẹe yi la asọn ọkpa kẹkan.

¹⁴ Ghẹ tie ihẹn ne ayin ehọ ra ne u mu emwi gbe odẹ ne arhuaro miẹn ehe na rua owẹ. Gha mu ohan mwẹ. Mẹ ọrọre Nọyaẹnmwa ne Osanobua ruẹ.

¹⁵ Gha re ne ọ ta ẹmwata kevbe uhunmwu ẹmwẹ; u gha ra bu ohiẹn, ghẹ yaba ovbiogue ra ne u mu ohan enọfe.

¹⁶ Ghẹ ba ọmwarhọkpa ohoghe. A deghẹ te a gu ọmwa gui ẹzọ uhunmwu, ya guan a deghẹ osẹe ruẹ gha sẹtin yọre obọ. Mẹ ọ re Nọyaẹnmwa.

¹⁷ “Ghẹ mwẹ irhiaẹko ghe ọmwarhọkpa, sokpan guẹe dọlọ kugbe ne u ghẹ ya la ekpa ẹre mu orukhọ.

¹⁸ Ghẹ rria ọmwarhọkpa ikhi ra ne u gha mu ohu ẹre yọ khian, sokpan, gha ho ẹmwẹ emwa ọvbehe vbene u hoẹmwẹ egbe ruẹ, mẹ ọ re Nọyaẹnmwa.

¹⁹ “Gha ya uhi mwẹ ru emwi. Ghẹ gie emwirri ni i re ọkpa gha mu egbe ne iran miẹn ehe na biẹlẹ azẹguagua. Ghẹ kọ emwi okọ ughughan eva ye otọ okpa. Ghe rhuan ukpọn ne a ya emwi ughughan eva do.

²⁰ “A deghẹ a rẹn ọviẹn ye egbakhian orhunmwuyẹn ọkpa, a deghẹ a ma he ha osa yọ, ọ na faẹn fua, a deghẹ ọmwa ọvbehe ghi guẹe ru emwi, a ghi rri iran oya, sokpan, a i ghi gbele iran an, ugbẹn vbe a miẹn wẹ ọviẹn ọmwa nọ.

²¹ Okpia nii ghi mu ogho gha die onurho Owa Ukpọn Ile ne ọ ya zọ ese a hae werriegbe.

²² Ohẹn ghi ya ẹe ru iruemwi akpehuan, ne a ya rhie orukhọ okpia nii hin rre, Osanobua gha vbe ya bọ ẹe.

²³ “Wa gha sẹ otọe Kenan wa na kọ erhan ne ọ mọ, wa ghi ka ọmọ rẹn ye ne awua ye la ukpo eha vbe ukpo eha nii, wa ghe rri ọe.

²⁴ Vbe ukpo nogienẹ, a ghi ye ọmọ rẹn hia fi ohan mẹ zẹ vbe emwi izẹọhẹ ne uwa ya kpọnmwẹ imẹ ne Nọyaẹnmwa.

²⁵ Sokpan vbe ukpo ne ogisẹn, wa sẹtin gha rri ọmọ erhan nii. Wa gha ru vbenian, erhan uwa ghi kakabọ gha mọ yọ. Mẹ ọre Nọyaẹnmwa Osanobua ruẹ.

²⁶ “Wa ghẹ rri emiowo ke ẹe kevbe esagiẹn. Ghẹ zẹ ọbo imamase rhọkpa.

²⁷ Ghẹ zẹ eto okhiẹ uhunmwu ra ne u gia ẹtu ruẹ ya gha khiẹ orinmwi.

²⁸ Wa ghẹ gbẹnnẹ egbe ra ne u wa giagia egbe ya gha khiẹ orinmwi. Mẹ ọ re Nọyaẹnmwa.

²⁹ “Wa ghẹ fa ivbi uwa ne ikhuo ua vbe ekpa ne uwa gha na ya iran ru ebabotu aroẹbọ, a deghẹ wa ru vberriọ, te uwa ghi khian mu aro da osa ọvbehe gha gho, uyimwẹ ohọhọ ghi gba otọe nii hia.

³⁰ Wa gha ru ugamwẹ Ẹdẹ ikẹtin, wa vbe gha ya ọghọ ne owa ukpọn mwẹ ne ọ huanrẹn. Mẹ ọ re Nọyaẹnmwa.

³¹ “Wa ghẹ yo ọghe iran ni gu avbe emwa ni wu nẹ guan. Wa gha ru ẹe. wa gha mu awua. Mẹ ọ re Nọyaẹnmwa Osanobua rua.

³² “Wa gha daa ne avbe ọmaẹn, gha ya ọghọ ne iran, rhunmwuda ighẹ wa mu ohan mwẹ. Mẹ ọ re Nọyaẹnmwa.

³³ “Wa ghẹ ru avbe orhunmwuyẹn ni rre ẹvbo uwa khọ.

³⁴ Wa gha ya obọ ne uwa ya mu ivbi Izrẹl ne iho uwa mu iran, wa ghi vbe gha ho ẹmwẹ iran vbene uwa ho ẹmwẹ egbe uwa. Wa yerre ighẹ orhunmwuyẹn wa gha khin vbe otọe Igipt. Mẹ ọ re Nọyaẹnmwa ne Osanobua rua.

³⁵ “Wa ghẹ mu ọmwa rhọkpa ru vbe ekpa ne uwa gha na gha ya omwa ne ọ ma sẹ omwa mwa emwi, ọre ọ ghe utanmwẹ nọ, ukhuamwẹ ra ubunmwẹ.

³⁶ Wa gha lo uwan ẹmwata, ukhuamwẹ ẹmwata ke omwa ẹmwata. Mẹ ọre Nọyaẹnmwa Osanobua rua, te I dẹ uwa ke otọ Igipt gha dee.

³⁷ Wa gha ya uhi kevbe ilele mwẹ hia ru emwi. Mẹ ọ re Nọyaẹnmwa.”