Levitikọs 18 - Edo Bible (E Baibol Ẹdo) Version 1996

Itiovbe Ne A Wua

¹ E Nọyaẹnmwa tama e Mosis wẹ,

² ne ọ tama ivbi Izrẹl wẹẹ, “Mẹ ọrọre Nọyaẹnmwa ne Osanobua rua.

³ Ghẹ lele uyinmwẹ emwa Igipt, ehe ne uwa te gha ye ra ọghe emwa Kenan, ehe ne I viọ uwa rrie.

⁴ Wa gha ya uhi mwẹ ru emwi ne uwa vbe gha ru vbene I kha re. Mẹ ọrọre Nọyaẹnmwa ne Osanobua uwa.”

⁵ Wa gha ru emwi zẹ vbene I mwamwa uhi ẹre ye otọ ne uwa. Te uwa ra ya ẹe sinmwi uhunmwu uwa ye agbọn deghẹ wa ru vberriọ. Mẹ ọrọre Nọyaẹnmwa.

⁶ E Nọyaẹnmwa keghi mu avbe ilele na ye otọ. Ghẹ gu ọmwa ne ọ re ọtuẹn ru emwi ọdọ vbe amwẹ.

⁷ Ghẹ yagha erha vbene u gha na gu iye uẹ ru emwi vberriọ. Ghẹ yagha iye uẹ.

⁸ Ghẹ yagha erha a vbene u gha na gu avbe amwẹ ọnrẹn nekpa ru emwi ọdọ vbe amwẹ.

⁹ Ghẹ gu ivbiye uẹ nokhuo ra ovbi erhaa nokhuo ru emwi ọdọ vbe amwẹ, ọ re owa ọkpa ọre a na koko uwa ra ẹ i re ọre.

¹⁰ Ghẹ gu eyẹ ruẹ ru emwi vberriọ. Ifaegbua ọ re ọnii gha khin ne uẹn.

¹¹ Ghẹ gu ọtuẹn nokhuo, ne okhuo ọvbehe biẹ ne erha ru emwi ọdọ vbe amwẹ, gha ya obọ ne u ya mu ovbiye uẹ nokhuo mu ẹẹn.

^12-13 Ghẹ gu ovbiye evbibiẹ ọ nokhuo ru emwi ọdọ vbe amwẹ, ọre obọ erha nọ ra obọ iye.

¹⁴ Ghẹ gu amwẹ ivbiye erhaa ru emwi, ka ẹe yọ zẹvbe ovbiye erhaa.

¹⁵ Ghẹ gu ovbi ọvbokhan ruẹn ru emwi vberriọ.

¹⁶ Ghẹ gu amwẹ ovbiye uẹ ru emwi vberriọ.

¹⁷ Ghẹ gu ọmọ iwu ra eyẹ okhuo ne uwẹ ka gu ru emwi ọdọ vbe amwẹ nẹ ru emwi vberriọ, iran sẹtin gha re etuẹn, ẹki uyinmwẹ ovbukhọ ọre ọnii khin.

¹⁸ Ghẹ rhie ovbiye amwẹ ọn rọnmwẹ vbe amwẹ ọn nii a ye gha rre agbọn.

¹⁹ Ghẹ gu okhuo ne ọ mu obọ mwẹ ru emwi, rhunmwuda, awua guẹe.

²⁰ Ghẹ gu amwẹ ẹrrẹe ru emwi, rhunmwuda ọ ni gha si awua yuẹ egbe.

²¹ Ghẹ rhie ovbi uẹ rhọkpa ne iran ya gho ẹbọ Milkọm rhunmwuda ọnii gha yagha eni Osanobua ne ọ re Nọyaẹnmwa.

²² Okpia ghẹ gu okpia ru emwi. Ọ sọnnọ Osanobua.

²³ Ọ re ọkpia nọ ra okhuo nọ, ọmwarhọkpa ghẹ gu aranmwẹ ru emwi. A i ghẹru vberriọ gha mu awua guẹ.

²⁴ Wa ghẹ yin avbe uyinmwẹ na ya mu awua gie egbe uwa. Odẹ vbenian, ọre avbe ni ga ẹbọ ni ka gha rre otọe na khẹ uwa ya mu awua gie egbe iran, te Nọyaẹnmwa ghi khulo iran kua na ne uwa miẹn ehe na larọ.

²⁵ Uyinmwẹ iran keghi mu awua ye otọe nii, rhunmwuda ọnii, ọre Nọyaẹnmwa na rria otọe nii ikhi, vbe ne ọ na ya ẹe gha zẹ emwa ni yin ẹnrẹn owẹ.

^26-27 Iran ke ru a i ghẹru na hia, iran na mu awua ye otọe nii, sokpan wa ghi rhie owẹ lele uhi kevbe ilele ọghe Nọyaẹnmwa, a ghẹ gie a miẹn ọmwarhọkpa vbe uwu uwa, ọre ovbi Izrẹl nọ ra orhunmwuyẹn ni rre ẹbu uwa, ne ọ gha ru avbe emwi na.

²⁸ Odẹ vberriọ ọre otọe nii i ra na zẹ uwa owẹ, zẹ vbe ne ọ zẹ iran owẹ avbe eni ga ẹbọ ni ka gha rre evba khẹ uwa.

²⁹ Wa rẹnrẹn wẹ ọmwaikọmwa ne ọ ru emwi ifaegbua na, a i ghi ka ẹe ba emwa Osanobua.

³⁰ E Nọyaẹnmwa ke kha wẹẹ, “Wa gha rhie owẹ lele ilele ne I rhie ne uwa, wa ghẹ yin uyinmwẹ avbe iran ni ka gha rre otọe nii khẹ uwa, wa ghẹ mu awua gie egbe uwa vbe ekpa ne uwa gha na ru avbe emwi na. Mẹ ọre Nọyaẹnmwa ne Osanobua rua.”