Levitikọs 16 - Edo Bible (E Baibol Ẹdo) Version 1996

Ẹdẹ Erinmwian

¹ E Nọyaẹnmwa keghi gu e Mosis guan iyeke vbe ivbi Errọn eveva ghi wulo nẹ, iran ne a gbele ua vbe ẹghẹ ne iran na zẹ ọhẹ erhẹn awua gie Nọyaẹnmwa.

² Ọ keghi kha wẹẹ, “Tama Errọn ne ọtuẹn wẹ ẹghẹ ne ọ khẹ ke ọ re ọ gha ya gha fian ukpọn onurho gberra la uwu Ehe Nọhuansẹ hia, rhunmwuda evba nii ọre I na la uwu okuku rhiegbe ma vbe odukhunmwu ugue Ẹkpẹti Ile. Deghẹ ọ ma họn, a gha gbe ẹe rua.

³ Ọ gha mu ovbi ẹkhuia ẹmila ya zọ ese orukhọ nẹ, kevbe ogho ne ọ ya zọ ese na giẹn uan, iyeke ọnii, ọ sẹtin la uwu Ehe Nọhuansẹ Ehia nii.”

⁴ E Nọyaẹnmwa keghi vbe tama iran ne iran ru vbenian wẹ. Vbe Errọn te la uwu Ehe Nọhuansẹ Ehia nii, ọ ghi khuẹ, ọ ghi vbe viọ avbe ẹwu ohẹn yegbe, ẹwu eto ovbiohuẹ, utalawẹ, ugbẹkun kevbe ukugba ọghe uhunmwu.

⁵ Ivbi Izrẹl ghi viọ ovbukhọ eva ne Errọn ya zọ ese orukhọ kevbe ogho ọkpa ne ese na giẹn uan.

⁶ Ọ ghi ye ẹkhuia ẹmila zọ ese ye orukhọ ọghe emwa ẹgbẹe ẹre kevbe ọghe egbe ẹre.

⁷ Iyeke ọnii ọ ghi viọ ovbukhọ eva nii gha rrie onurho Owa Ukpọn Ile.

⁸ Ọ gha sẹ evba, ọ ghi viọ okuta eva ya yan uta, a ghi ye ọkpa ru ama wẹẹ, “Ọghe Nọyaẹnmwa” ke nọkpa “Ọghe Ẹziza.”

⁹ Errọn ghi ya ẹwe ne uta zẹẹ vbọ zọ ese ghe Nọyaẹnmwa, zẹ vbe ese orukhọ.

¹⁰ Ne a zọ ọre ọghe Azazẹl nii, a ghi mu ẹẹn gie Nọyaẹnmwa vbe ne a ma na gbe ẹe rua, a ghi zọrobọ ne ọ la ato bu Azazẹl ne ọ miẹn ehe na viọ orukhọ emwa nii gha rrie.

¹¹ Errọn ghi gbe ẹkhuia ẹmila nii ye orukhọ ọghọe kevbe ọghe emwa rẹn,

¹² ọ ghi ya ọkpan erhẹn wan erhẹn ẹyin ne ọ yan ke aka rre, ọ ghi vbe viọ uguobọ eva ọghe eturari ne ọ maa, ọ ghi viọ ehia gha die uwu Ehe Nọhuansẹ Ehia nii.

¹³ Evba nii i, ọ ghi viọ eturari nii ye erhẹn vbe odaro Nọyaẹnmwa, ighogho eturari nii gha degue ugue Ẹkpẹti Ile nii ne ọ ghẹ miẹn ehe na dẹghe ẹre, ne ọ ghẹ ya wu.

¹⁴ Ọ ghi rhie vbe esagiẹn ẹkhuia ẹmila nii, ọ ghi ya ikpinhianbọ ẹre sanmwẹ ọẹn ye odaro ugue ẹkpẹti nii, ọ ghi sanmwẹ eso ye odaro Ẹkpẹti Ile nii igba ihinrọn.

¹⁵ Vbe iyeke ọnii, ọ ghi gbe ẹwe izọese orukhọ ọghe emwa nii, ọ ghi mu esagiẹn ọnrẹn gha die Ehe Nọhuansẹ Ehia, ọ ghi sanmwẹ ọẹn yan ugue ẹkpẹti nii kevbe odaro Ẹkpẹti Ile nii, zẹ vbene ọ vbe ru esagiẹn ẹkhuia ẹmila nii.

¹⁶ Odẹ vberriọ, ọre ọ gha ru iruemwi ne a ya kpe awua kua hin Ehe Nọhuansẹ Ehia rre, hin obọ emwi awua ivbi Izrẹl rre, kevbe hin obọ orukhọ iran hia rre. Ọ ghi ru Owa Ukpọn Ile vberriọ rhunmwuda adesẹneva agọ ne awua ye nii ọre ọ ye.

¹⁷ A ghẹ gie a miẹn ọmwa rhọkpa vbe uwu Owa Ukpọn Ile nii ke ẹghẹ ne Errọn ya lao uwu Ehe Nọhuansẹ Ehia nii ne ọ ya ru iruemwi akpehuan, rhinrin ọ te do ladian. Ọ ghi ka ru emwi ne egbe ẹre, kevbe ẹgbẹe ẹre kevbe avbe emwa nii nẹ,

¹⁸ ọ ghi vbe gha rrie aka ese na giẹn uan ne ọ vbe ya họnmwẹ ọẹn ruan, ọ ghi rhie vbe esagiẹn ẹkhuia ẹmila nii kevbe esagiẹn ẹwe nii, ọ ghi ya ẹe woo ehe ne aka na sukpẹ ladian vbe igienenẹ.

¹⁹ Ọ ghi vbe ya ikpinhianbọ ẹre sanmwẹ esagiẹn yan rẹn igba ihinrọn. Odẹ vberriọ, ọre ọ gha ya họnmwẹ awua orukhọ ivbi Izrẹl hin rre, ọ ghi ya ẹe khian ne ọ huansẹ.

Ẹwe Erriẹrriẹ

²⁰ Errọn ghẹ ghi ru iruemwi ọkpehuan ọghe Ehe Nọhuansẹ Ehia nii nẹ, kevbe ehe ne ọ ghi kẹe vbe Owa Ukpọn Ile, kevbe aka, ọ ghi mu ẹwe ne ọ ma he wu ne a wẹ ne a mu ne Azazẹl nii gie Nọyaẹnmwa.

²¹ Ọ ghi viọ obọ re eveva yan ẹwe nii uhunmwu, ọ ghi miẹn rẹn kue uyimwẹ dan hia, ke avbe orukhọ kevbe uyinmwẹ isọtẹ ne ivbi Izrẹl ru yan ẹre uhunmwu, ọ ghi la ekpa odẹ vberriọ werriẹ ehia yan ẹwe nii uhunmwu. Iyeke ọnii, ọmwa ne a zẹ ye otọ ne ọ ru ẹe ghi khu ẹwe nii la uwu ato.

²² Ẹwe nii ghi mu orukhọ iran hia; gha rrie otọ ne ẹvbo ma yin.

²³ Errọn ghi la uwu Owa Ukpọn Ile, ọ ghi kie ẹwu ohẹn ne ọ yọe ọ te la uwu Ehe Nọhuansẹ Ehia, ọ ghi sọrae ye evba.

²⁴ Ọ ghi ya khuẹ vbe ehe ne ọ huanrẹn, ọ ghi yọ ẹwu obọ ẹre, vbe iyeke ọnii, ọ ghi ladian ya zọ ese na giẹn uan, ne ọ ya kpe orukhọ egbe ẹre kua, kevbe ọghe avbe emwa nii.

²⁵ Ọ ghi ya giẹn ẹvbi aranmwẹ ne a ya zọ ese orukhọ vbe aka.

²⁶ Ọmwa ne ọ khu ẹwe la ato gie Azazẹl nii ghi họ ukpọn irẹn, ọ ghi vbe khuẹ ọ te werriegbe la agọ.

²⁷ Ẹkhuia ẹmila kevbe ẹwe ne a gbele ya zọ ese orukhọ nii, ne a mu esagiẹn ọnrẹn ye uwu Owa Ukpon Ile ne ọ kpe orukhọ kua, a ghi viọ iran lahin ore agọ rre, a ghi giẹn iran uan, ke ohian kevbe efun, kevbe ibiẹ ọre, a ghi giẹn ehia a.

²⁸ Ọmwa ne ọ giẹn iran uan, ghi ya họ ukpọn irẹn, ọ ghi khuẹ, ọ ke dọlegbe gha die agọ.

Ugamwẹ Ẹdẹ Erinmwian

²⁹ Emwamwa na, a ghi da ẹe yi ẹdẹdẹmwẹdẹ. Vbe ikpẹdẹ ne ogigbe ọghe uki ne ogihinrọn, ivbi Izrẹl hia, deba orhunmwuyẹn ni rre uwu ẹbu iran ghi yo aguẹ, iran ghẹ winna iwinna rhọkpa.

³⁰ Vbe ẹdẹ nẹdẹrriọ, a ghi ru iruemwi na ne a ya khuẹ iran hia hin orukhọ rre, ne iran miẹn ehe na gha re ne ẹ i ghi mwẹ awua.

³¹ Ẹdẹ nẹdẹrriọ, a ghi gie ẹe gha re ẹdẹ ne ọ huanrẹn ẹsẹse ne emwa gha na lọ unu vbe ne a i na winna iwinna rhọkpa. Emwamwa na, a ghi da ee yi ẹdẹdẹmwẹdẹ.

³² Ogie Ohẹn, ne a ya rri ohẹn ẹse, a na vbe ya fi ohan ne ọ di ukpo erha ẹe ya, ọ re ọ gha ru iruemwi akpehuan. Ọ ghi yọ ẹwu ohẹn.

³³ Ọ ghi ru iruemwi ya họnmwẹ Ehe Ne Ọ Huan Sẹẹ Ehia, ehe ne ọ ghi ke ẹe vbe Owa Ukpọn Ile, aka, avbe ohẹn, kevbe avbe emwa nii hia.

³⁴ Emwamwa na, te a ra gha ru ẹe khian ẹdẹdẹmwẹdẹ. A ghi gha ru iruemwi na uhukpa vbe ukpo ne a ya gha kpe ivbi Izrẹl huan hin orukhọ rre. E Mosis keghi ru vbene Nọyaẹnmwa khare.