Levitikọs 15 - Edo Bible (E Baibol Ẹdo) Version 1996

Awua Egbe Ne Ọ Gin Amẹ

¹ E Nọyaẹnmwa keghi ru emwamwa na ma e Mosis kevbe Errọn,

² ne ivbi Izrẹl. Deghẹ ekia ọmwa na gha gin amẹ, amẹ ne ọ gin nii, awua nọ,

³ a deghẹ te ọ gin ladian vbe ekia nii ra te ọ khiọ ẹre.

⁴ Ukpo ne ọ tota yi ra ne ọ lovbiẹ yi. Awua rrọọ.

⁵ Ọmwa ne ọ rhirhi ya egbe kan ukpo ẹre.

⁶ Ra ne ọ tota ye emwi ne ọmwa nii tota yi, ghi ya họ ukpọn rẹn, ọ ghi ya khuẹ, ọ ghi gha re ne ọ mwẹ awua ọ te ya sẹ ota.

⁷ Ọmwa ne ọ rhirhi ya obọ kan ọmwa ne egbe ẹre gin nii, ghi ya họ ukpọn irẹn, ọ ghi ya khuẹ, ọ ghi vbe gha re ne ọ mwẹ awua ya sẹ ota.

⁸ deghẹ ọmwa nii tu asẹn ku ọmwa ne awua i gue, ọmwa nii ghi ya họ ukpọn rẹn, ọ ghi ya khuẹ, ọ ghi gha re ne awua gue yasẹ ota ọ.

⁹ Emwi ne a ya tota ye ẹsin ra aga ike aga ne ọmwa ne egbe ẹre gin tota yan, awua rrọọ.

¹⁰ Ọmwa ne ọ rhirhi ya obọ kan emwi ne ọmwa nii tota yi, awua guẹe, ọ te ya sẹ ota. Ọmwa ne ọ rhirhi mu emwi ne ọmwa nii tota yi, ọ ghi ya họ ukpọn rẹn, ọ ghi ya khuẹ, ọ ghi gha re ne awua gue, ọ te ya sẹ ota.

¹¹ Deghẹ ọmwa ne egbe ẹre gin ya obọ kan ọmwa vbene ọ ma na ka kpe obọ nẹ, ọmwa nii ghi ya họ ukpọn rẹn, ọ ghi ya khuẹ, ọ ghi gha re ne awua gue ya sẹ ota.

¹² Uwawa ne ọmwa nii a rhirhi ya obọ kan, a ghi guọghọe rua, ọkpan ne ọ rhirhi vbe ya obọ kan, a ghi kpe ẹe.

¹³ A ghẹ ghi sinmwi ọmwa nii nẹ vbe egbe ne ọ gin nii, ọ ghi mudia nẹ la ikpẹdẹ ihinrọn, iyeke ọnii, ọ ghi ye amẹ ne a da sa vbe ẹzẹ họ ukpọn, ọ ghi vbe ya khuẹ, rẹn ghi do gha re nẹ i mwẹ awua.

¹⁴ Vbe ikpẹdẹ nogierẹnrẹn, ọ ghi viọ idu eva ra elikhukhu eva gha rrie onurho Owa Ukpọn Ile, ọ ghi viọ iran ne ohẹn.

¹⁵ Ohẹn ghi gbe ọkpa vbọ zẹ vbe ese orukhọ kevbe nọkpa zẹ vbe ese na giẹn uan. Erriọ ọ gha ru iruemwi akpehuan, ne ọmwa nii.

¹⁶ A deghẹ eku o re ọ ladian vbe egbe ọmwa, ọ ghi khuẹ egbe hia, ọ ghi gha re ne awua gue ya sẹ ota.

¹⁷ Emwikemwi ne a ya ukpọn ra ohian ru ne eku nii kharha yi, a ghi họ ẹre, ọ ghi gha re ne awua ye yasẹ ota.

¹⁸ Ọmwa gha gu okhuo ru emwi nẹ, ke irẹn kevbe nene okhuo ghi ya khuẹ, iran ghi gha re ne awua gue yasẹ ota.

¹⁹ Okhuo gha mu obọ mwẹ, ọ ghi khian ne awua gue la ikpẹdẹ ihinrọn. Ọmwa ne ọ rhirhi ya obọ kan rẹn, awua guẹe rhinrin yasẹ ota.

²⁰ Emwi ne ọ rhirhi a tota ra lovbiẹ yi vbe ẹghẹ ne ọ na mu obọ mwẹ nii khian ne awua ye.

^21-23 Ọmwa ne ọ rhirhi ya obọ kan ukpọn ẹnrẹn ra emwikemwi ne ọ tota yi, ọ ghi ya họ ukpọn rẹn, ọ ghi vbe ya khuẹ, rẹn ghi vbe gha re ne awua gue rhinrin ọ te ya sẹ ota.

²⁴ Deghẹ ọmwa guẹe ru emwi vbe ẹghẹ ne ọ na mu obọ mwẹ nii, ọmwa nii khian ne awua gue la obọ awua ne okhuo nii mwẹ rre; ọ ghi gha re ne awua gue la ikpẹdẹ ihinrọn, ukpọn ne irẹn vbe lovbiẹ yi khian ne awua ye.

²⁵ A deghẹ vbe ọ lahin ẹghẹ ne ọ ya mu obọ mwẹ, ighẹ te esagiẹn gha tue okhuo vbe omwa ikpẹdẹ eso, ra te egbe ne ọ tue ẹre gberra ẹghẹ ne ọ mu obọ mwẹ la vbe otọ, ẹghẹ ne ọ tue ẹre la vbe otọ nii, awua guẹe zẹ vbe ne ọ ye vbe ẹghẹ ne ọ ya mu obọ mwẹ.

²⁶ Ukpọn ne ọ lovbiẹ yi kevbe emwikemwi ne ọ tota yan vbe uwu ẹghẹ na, khian ne awua ye.

²⁷ Ọmwa ne ọ vbe ya obọ kan iran, awua guẹe, ọ ghi ya họ ukpọn rẹn, ọ ghi vbe khuẹ, ọ ghi gha re ne awua gue ya sẹ ota.

²⁸ Utuemwẹ gha ghi dobọ yi nẹ, ọ ghi ye mudia la ikpẹdẹ ihinrọn, iyeke ọnii, ọ ghi do khian ne awua i ghi gue.

²⁹ Vbe ikpẹdẹ nogierẹnrẹn, ọ ghi viọ idu eva ra elikhukhu eva bu ohẹn gha rriẹ onurho Owa Ukpọn Ile.

³⁰ Ohẹn ghi gbe ọkpa vbọ zẹ vbe izọese orukhọ, ke nọkpa zẹ vbe izọese na giẹn uan. Odẹ vbenian ọre ọ gha na ru iruemwi akpehuan nẹẹn.

³¹ E Nọyaẹnmwa keghi tama e Mosis wẹ ne ọ yan ma ivbi Izrẹl vbe ekpa ọghe emwi awua iran, ne iran ghẹ ya mu awua la Owa Ukpọn Ile, ne ọ rre adesẹneva agọ. Iran gha ru ẹe, a gha gbele iran an.

³² Ena ọrọre emwamwa vbe ekpa ọmwa ne egbe ẹre tue ra ne ọ miẹn eku ladian.

³³ Kevbe okhuo vbe ẹghẹ ne ọ ya mu obọ mwẹ, ra okpia ne ọ gu okhuo ne ọ mwẹ awua ru emwi.