Levitikọs 11 - Edo Bible (E Baibol Ẹdo) Version 1996

Aranmwẹ Ne Ọ Kere Ne A Gha Re

¹ E Nọyaẹnmwa keghi viọ ilele na ne Mosis kevbe Errọn,

² Ne iran ta ẹe ma ivbi Izrẹl:

³ “Wa sẹtin rri avbe aranmwẹ otọ hia, ne ihiẹn ọnrẹn va ada kevbe ne ọ vbe hu evbare rre lue vbe unu.

^4-6 Sokpan wa ghẹ rrie ekẹtẹkẹtẹ, osorhue ra ọfiontọ, wa ghi ka enena ye emwi awua, iran hu emwi re lue vbe unu sokpan iran i mwẹ ihiẹn ne ọ va ada.

⁷ Wa ghẹ rri esiebo, wa ghi ka ẹe ye emwi awua, ihiẹn iran va ada sokpan iran i hu emwi re lue vbe unu.

⁸ Wa ghẹ kue ya obọ kan ikun iran, emwi awua iran khin.

⁹ “Wa sẹtin rri ehẹnkehẹn ne ọ mwẹ ifuẹn akhuẹ kevbe ne ọ bolo ikpakpa.

¹⁰ Sokpan emwikemwi ne ọ rre uwu amẹ, ne ẹ i mwẹ ifuẹn akhuẹ, ẹ i bolo ikpakpa, wa ghẹ rri ọe.

¹¹ Wa ka iran ye awua, wa ghẹ rrie iran amawẹ ne uwa ya obọ kan ikun iran,

¹² wa ghẹ rrie emwi ni rre uwu amẹ, ne ẹ i mwẹ ifuẹn akhuẹ ra ikpakpa ne ọ bolo.

^13-19 Wa ghẹ rri avbe ahianmwẹ ne a ra sunu yi na: ahua, ekperọkhuẹ, ẹrekhue, ugu, egbu, ugomugo, ekpẹkpẹyẹ ọghe ẹzẹ, oghohọn ẹzẹ, olọkọmwọrhu, epianpian, ukorobozo, ọwọ ra ẹguẹn.

²⁰ “Ivbi otutu ni ghi zẹ ifuẹn hiehie mwẹ awua.

²¹ Sokpan a ma wẹ avbe ne ẹ i mwẹ owẹ ni mwẹ akhuẹn, ne ọ sẹtin san.

²² Wa sẹtin rri irhiso, asẹlẹ ra atete.

²³ Sokpan avbe emwi negiẹrẹ hia ni mwẹ ifuẹn, ni vbe rẹnrẹn vbe otọ, a ghi ka ẹe ye ni mwẹ awua.

^24-28 “Ọmwaikọmwa ne ọ ya obọ kan ikun avbe aranmwẹ na hia, gha khian ne awua gue ya sẹ ota, ọmwaikọmwa ne ọ vbe mu ikun iran, ọ ghi họ ukpọn rẹn sokpan awua ye guẹe ya sẹ ota: aranmwẹ ni mwẹ ihiẹn hia. sokpan a ma wẹ te ihiẹn ọnrẹn va ada, ọ ghi vbe gha hu emwi rre lue vbe unu, deba aranmwẹ ni mwẹ owẹ enẹ ni vbe mwẹ ihiẹn ni mu.

^29-30 “Ukhan, ọfiontọ, ofẹn kevbe avbe osikpalọ, a ghi vbe ka iran ba ni mwẹ awua.

³¹ Omwa ne ọ ya obọ kan iran gha mwẹ awua ọ te ya sẹ ota.

³² Ikun iran gha vbe degbe emwikemwi, iran ghi vbe gha mwẹ awua. Te ọna wa sẹ egbe emwi hia, kevbe ne a ya erhan ru, ukpọn, ohian ẹkpo, emwi ne ọ khọn rẹn ne a gha ya ẹe ru. A ghi fi ẹe ye amẹ, sokpan ọ ghi gha re ne ọ mwẹ awua, ọ te ya sẹ ota.

³³ Ọ gha de yan akhe, emwi ni rrọọ hia mwẹ awua nẹ, a ghi guọghọe rua ighẹ akhe nii.

³⁴ Evbare ne a gha te re, sokpan amẹ ne ọ ke akhe ni rre na sanmwẹ yọ, ọ ghi khian ne awua ye, emwi ne a wọn nii rre akhe ni hia ghi khian nii mwẹ awua.

³⁵ Emwi ne ikun iran dekan khian ne awua ye, aroewu ne a ya obuẹ ma ke uvun ne a na ka emwi, a ghi guọghọe rua.

³⁶ Ẹzẹ ne ọ lẹ ke uhunmwu ẹnrẹn rre, kevbe uhae ne amẹ na rọn ke uwu otọ rre, ghi gha re ne ẹ i mwẹ awua, a gha rhe miẹn wẹ emwi ọvbehe hia ni de kan rẹn mwẹ awua.

³⁷ “A deghẹ eso dekun emwi okọ ne a ra ya kọ, emwi okọ nii i mwẹ awua,

³⁸ sokpan, deghẹ te a rhuarhua emwi okọ nii ye amẹ, a na miẹn wẹ ọkpa vbe uwu iran do dekan rẹn, emwi okọ nii khian ni mwẹ awua.

³⁹ “A deghẹ aranmwẹ ne a re, de wu, emwikemwi ni dekan rẹn khian ne awua ye ọ te ya sẹ ota.

⁴⁰ A deghẹ ọmwaikọmwa re vbe aranmwẹ nii, ọ ghi họ ukpọn rẹn, sokpan awua gha ye gha guẹe ọ te ya sẹ ota. Omwa ne ọ mu ikun ẹnrẹn ghi họ ukpọn rẹn sokpan awua ye gue ẹe ọ te ya sẹ ota.

⁴¹ “Wa ghẹ re vbe aranmwẹ ne giẹrẹ ni rẹnrẹn vbe otọe nii.

⁴² Ya sẹ egbe avbe aranmwẹ ni ya ẹko hiọrọ, ra ni ya owẹ enenẹ khian ra ni mwẹ owẹ ni bun.

⁴³ Wa ghẹ rri ena rhọkpa ya mu awua ye egbe.

⁴⁴ Mẹ ọre Nọyaẹnmwa Osanobua rua, wa ghi ya egbe khian ni huanrẹn rhunmwuda ọmwa ne ọ huanrẹn ọre ime khin.

⁴⁵ Mẹ ọrọre Nọyaẹnmwa ne ọ viọ uwa ke Igipt ladian, ne I mẹ sẹtin gha re Osanobua rua. Wa ghi gha re ne ọ huanrẹn, rhunmwuda ọmwa ne ọ huanrẹn mẹ khin.”

⁴⁶ Ọna ọrọre uhi ne ọ kan aranmwẹ, ahianmwẹ kevbe avbe emwi hia ni rre uwu amẹ kevbe ni khian vbe otọ.

⁴⁷ Wa ghẹ mianmian ne a gha rẹn alughaẹn ne ọ rre emwi ne awua ye kevbe nẹ i ye, aranmwẹ ne ọ kere ne a gha re kevbe ne ọ ma ke ne a gha re.