Levitikọs 10 - Edo Bible (E Baibol Ẹdo) Version 1996

Orukhọ e Nadab Ke Abihu

¹ Ivbi Errọn ighẹ Nadab kevbe Abihu keghi viọ ọkpan erhẹn iran, iran gua ugiọnmwẹ erhẹn yọ, iran keghi zẹ eturari yọ, iran na mu gie Nọyaẹnmwa.

² Sokpan erhẹn nii ma huan, rhunmwuda ọnii, e Nọyaẹnmwa keghi gie erhẹn gie iran, ọ keghi giẹn iran wu la ẹrinmwi vbe odaro e Nọyaẹnmwa.

³ Ẹre Mosis na tama Errọn wẹẹ, “Emwi ne Nọyaẹnmwa gha kha ẹghẹ nii ọre ọ na khin vbe ẹghẹ ne ọ na kha wẹẹ, ‘Iran hia nii ga mwẹ, ọ kere ne iran gha da ne uhuanmwẹ mwẹ, I gha rhie uyi mwẹ ma emwa mwẹ.’ ” Sokpan Errọn ma guan ẹmwẹ rhọkpa.

⁴ E Mosis keghi tie Mishẹl kevbe Ẹlsafan ne ivbi Uziẹl ne ovbi erha Errọn, ọ keghi tama iran wẹẹ, “Wa larre ne uwa do munọ ikun ivbi ọtẹn uwa hin odaro Owa Ukpọn ne ọ huansẹẹ rre ne uwa ya viọ iran ye vbe a ra lahin agọ rre nẹ.”

⁵ Iran na rhunmwuda ọnii gha de do silo ikun iran ladian agọ rre zẹ vbene Mosis khare.

⁶ Ọre Mosis na tama Errọn kevbe avbe ivbi ẹre ighẹ Eliaza kevbe Itama wẹẹ, “Wa ghẹ sẹ eto uwa rae vbe ne a ma na salọ ẹe ra ne uwa yanghan ẹwu uwa ya rhie maa ighẹ te uwa rre akhiẹ. Wa gha ru vberriọ, wa gha wulo, e Nọyaẹnmwa gha vbe mu ohu emwa na hia sokpan, avbe etuẹn, kevbe avbe emwa Izrẹl hia, a fan obọ ẹre ne iran ne iran khiẹ uwu na ne ọ la ekpa erhẹn ne ọ ke obọ Nọyaẹnmwa rre.

⁷ Wa ghẹ kpa vbe onurho Owa Ukpọn Ile rre ne uwa ghẹ wulo, rhunmwuda a ya ori ne a sa ye uwa uhunmwu ya uwa fi ohan ne Nọyan nẹ.” Iran keghi ru vbene Mosis khare.

Uhi Ọghe Avbe Ohẹn

⁸ E Nọyaẹnmwa keghi tama Errọn wẹẹ,

⁹ “Wa gha da ayọn ra ebiẹ nẹ, wẹ kevbe avbe ivbi uẹ, wa ghẹ ghi la uwu Owa Ukpọn Ile, wa gha danmwẹ ọẹn, wa gha wulo. Uhi ne avbe ivbi uniẹn ruẹn hia gha rhie mwẹ ọre ọna khin.

¹⁰ Wa ghi gha rẹn emwi ne ọ re ọghe Nọyaẹnmwa hin ne ọ re ne agbọn hia lo rre, kevbe emwi ne awua gue kevbe nẹ i gue.

¹¹ Wa ghi gha ma ivbi Izrẹl hia uhi ne I rhie la obọ Mosis gie uwa.”

¹² E Mosis keghi khama Errọn ke ẹe kevbe ivbi ẹre eva ni dekẹe, Eliaza kevbe Itama wẹẹ, “Wa rhie ne ọ dekẹ rre vbe uwu izọhẹ ọka ọghe evbare ne a rhie gie Nọyaẹnmwa ne uwa ru ebrẹd ne ọma hue, ne uwa rri ọe vbe ọkpẹn aka rhunmwuda izọhẹ na, ne ọ huansẹ wa nọ.

¹³ Wa rri ọe vbe ehe ne ẹ i mwẹ awua, ne ọ khẹke uwa vbe ivbi uwa vbe uwu evbare ne a rhie gie Nọyaẹnmwa nọ. Emwi ne Nọyaẹnmwa tama mwẹ ọre ọnii khin.

¹⁴ Sokpan wẹ vbe ẹgbẹe ruẹ sẹtin rri ewẹn ke owẹ ọre ne a rhie rre zẹ vbe izọhẹ kpataki gie Nọyaẹnmwa ne avbe ohẹn, wa sẹtin rri ọe vbe eheikehe ne awua i ye. Izọhẹ na, a rhie ẹre ne uwẹ kevbe avbe ivbi uwa zẹ vbe ne ọ khẹke uwa vbe izọhẹ isara ọghe ivbi Izrẹl.

¹⁵ Iran gha viọ owẹ ọre kevbe ewẹn ọnrẹn rre zẹ vbe ọhẹ kpataki vbe ẹghẹ ne a ya mu ẹvbi ẹre gie Nọyaẹnmwa zẹ vbe izọhẹ evbare. Ehe ne a kha vbo na, wẹ vbe ivbi uẹ ọre ọ yan rẹn ẹdẹdẹmwẹdẹ zẹ vbene Nọyaẹnmwa khare.”

¹⁶ E Mosis keghi nọ ẹmwẹ ẹwe ne a ya zọ ese ye orukhọ, ọ keghi miẹn wẹ a giẹn ọnrẹn uan nẹ. Ọna keghi gie ohu Eliaza kevbe Itama ni ghi kẹe vbe ivbi Errọn mu ẹẹn, ọ keghi nọ wẹẹ,

¹⁷ “Vbọzẹ ne uwa ma na rri izọ ese orukhọ nii vbe ehe ne ọ huansẹ yi? Emwi ne ọ huansẹ ẹsẹse nọ, te Nọyaẹnmwa vbe rhie ẹre ne uwa, ne uwa miẹn ehe na kpe orukhọ emwa nii kua.

¹⁸ Vbe ne a na miẹn wẹ a ma mu esagiẹn ọnrẹn gha die uwu owa ukpọn ne ọ huansẹ, te uwa gha te rri ese nii vbe evba zẹ vbene I khare.”

¹⁹ Errọn keghi wanniẹn wẹẹ, “Wẹ rẹnrẹn wẹ emwi ne ọ gbe orrirri na ye sunu vbe egbe mwẹ, egbe ne emwa ni rre ya viọ izẹọhẹ orukhọ rre deba ese ne agiẹn uan ọghe iran gie Nọyaẹnmwa ẹrẹna. Akpawẹ te imẹ rri emiowo ọghe izẹọhẹ orukhọ nii ẹrẹna, ẹko gha rhiẹnrhiẹn e Nọyaẹnmwa ra?”

²⁰ E Mosis ghi họn ẹmwẹ na, ẹko ẹre ke ghi vuọn ẹẹn.