Levitikọs 1 - Edo Bible (E Baibol Ẹdo) Version 1996

Ese Na Giẹn Ọnrẹn Ohoho

¹ E Nọyaẹnmwa keghi datie Mosis ke uwu Owa Ukpọn e Nọyaẹnmwa rre, ọ na viọ avbe uhi na ne ẹẹn wẹẹ,

² “Ne ivbi Izrẹl gha rhie obọ lele ẹe vbe iran a gha zọ ese. Omwa gha ra zọ ese aranmwẹ, ọ sẹtin gha re ọkpa vbe uwu ẹmila ẹre ra ohuan rẹn ra ewe ẹre.

³ A deghẹ ẹmila obọ ẹre ọre ọmwa ra ya zọ ese ne a giẹn uan, ọ ghi mu ẹkhuia ẹmila ne ẹ i mwẹ okan rre. Ọ ghi mu ẹẹn gha die onurho Owa Ukpọn e Nọyaẹnmwa, ne Nọyaẹnmwa miẹn ehe na rhan obọ miẹn rẹn.

⁴ Ọ ghi rhie obọ yan rẹn uhunmwu, a ghi rhan obọ miẹn rẹn zẹ vbe ese ne ọ gha viọ orukhọ ẹre gha rrie.

⁵ “Ọ ghi gbe ẹkhuia ẹmila nii vbe evba, avbe ohẹn ghi mu esagiẹn ọnrẹn gie Nọyaẹnmwa, iran ghi vbe rhurhẹ esagiẹn ọnrẹn ye igienenẹ ọghe aka ne ọ rre onurho Owa Ukpọn nii.

⁶ Iyeke ọnii, ọ ghi zẹ aranmwẹ nii ohian, ọ ghi vbe va ẹe.

⁷ Avbe ohẹn ghi mwamwa erhan ye aka, iran ghi wan erhẹn yọ.

⁸ Iran ghi viọ avbe emiowo ne a giagia ẹe nii ye erhẹn, ke ẹe kevbe uhunmwu ẹnrẹn kevbe ẹvbi ẹre.

⁹ Okpia nii ghi kpe avbe ibiẹ ọre kevbe avbe owẹ ọre, ohẹn ne ọ ru ugamwẹ ghi giẹn ese nii hia vbe aka. Uwinhinmwẹ emwi imuohan evbare na yẹ Nọyaẹnmwa.

¹⁰ “A deghẹ ohuan ra ẹwe ẹre ọre ọ ra ya zọ ese, ọ ghi gha re ọwẹ ne ẹ i mwẹ okan.

¹¹ Ọ ghi gbe ẹe vbe odẹ okuọ ọghe aka, ohẹn ghi rhurhẹ esagiẹn ọnrẹn ye igienenẹ ọghe aka.

¹² Ọmwa nii ghẹ ghi va ẹe nẹ, ohẹn ne ọ ru ugamwẹ ghi viọ ikele ẹre hia ke ẹe kevbe uhunmwu ẹnrẹn kevbe ẹvbi ẹre ye erhẹn.

¹³ Ọmwa nii ghi kpe ibiẹ ọre kevbe owẹ ọre, ohẹn ghi do mu ese nii gie Nọyaẹnmwa, ọ ghi giẹn ehia fẹẹrẹ vbe uhunmwu aka, uwinhinmwẹ emwi ihaoko evbare na yẹ Nọyaẹnmwa.

¹⁴ “A deghẹ ahianmwẹ ọre ọmwa ra ya zọ ese ne a giẹn uan, ọ ghi gie ẹe gha re idu ra elikhukhu.

¹⁵ Ohẹn ghi mu ẹẹn gha die aka, ọ ghi khiẹn ọnrẹn urhu, ọ ghi giẹn uhunmwu ọnrẹn vbe aka. A ghi da esagiẹn ọnrẹn ladian ye egbe aka.

¹⁶ Ọ ghi mu ẹkpurhu ọre hin rre ke ẹe kevbe emwi nii rrọ, ọ ghi filo ẹe kua ghe odẹ ahọ vbe obọ ne a kpolo emuẹn yi.

¹⁷ Ọ ghi viọ ẹre ifuẹn, ọ ghi va ẹe ẹre egbe ua vbene ẹ i na yanghan ifuẹn ọnrẹn kua. Ọ ghi giẹn ọnrẹn vbe aka. Uwinhinmwẹ emwi ihaoko evbare na yẹ Nọyaẹnmwa.