Kọlose 4 - Edo Bible (E Baibol Ẹdo) Version 1996

¹ Wa ne arowa, wa gha ya obọ ne ọ kere kevbe ne ọ maa mu avbe eviẹn uwa. Wa yerre ighẹ wa tobọ uwa vbe mwẹ Arowa vbe ẹrinmwi.

Ẹmwẹ Igiodẹ

² Wa mu aro ye erhunmwu ne a na, wa sikhua vbe uwa a gha na erhunmwu, ne uwa gha kpọnmwẹ Osanobua.

³ Vbe uwu ẹre nii, wa. vbe gha na erhunmwu ne ima, wẹ ne Osanobua rhie ẹkpotọ ne ọ maa ne ima ya kpe orhu iyẹn ne ọ maa ọghọe, ne a miẹn ehe na ta oro ẹmwẹ Kristi, rhunmwuda, ọnii ọ zẹe ne I na rre uwu eghan na.

⁴ Rhunmwuda ọnii nian, wa gha na erhunmwu wẹ ne I gha kpe orhu nii, ne ọ gha la ehọ vbene ọ kere ne I gha ruẹe.

⁵ Wa gha ye ẹwaẹn ru emwi vbe uyinmwẹ ne uwa yin ghe iran ne ima yayi, ne uwa gha lo ẹkpotọ ne uwa a rhirhi miẹn ẹse.

⁶ Wa gie ẹmwẹ uwa gha re ne ọ maa kevbe ne ọ rhiẹnrhiẹn vbe ehọ ẹghẹ hia, wa ghi vbe gua ra gha rhie ewanniẹn ne ọ gua ẹe ro ne emwa hia.

Otuẹ Okiekie

⁷ Taikikọs ne ọtẹn mwa ne ọ ghan, ogieva mwẹ ne ekhọe esi, ọmwa ne ima gba re ọguọmwadia vbe uwu iwinna Nọyaẹnmwa, gha ta vbene emwi hia ghi ye mwẹ hẹ ma uwa.

⁸ Ọnii ọ si ẹe ne I na gi ẹe bu uwa dee, ne ọ miẹn ehe na fu uwa ẹko rre, vbe ekpa ne ọ gha na tama uwa vbene ima hia ye hẹẹ.

⁹ Onisimọs, ne ọtẹn mwa ne ekhọe esi, ne ọ ghan ne ọ vbe rre otu uwa, lele ẹe dee. Iran gha tama uwa vbene emwi hia ye hẹ vbe edinran.

¹⁰ Aristakọs, ọmwa ne ọ gun mwẹ rre eghan, ke ẹe kevbe Mak ne ọtẹn Banabas wẹ uwa do. (A ka tama uwa nẹ wẹ ne uwa rhan obọ miẹn rẹn vbe ọ gha rrie ehe ne uwa ye.)

¹¹ Jọsua ne a vbe tie ẹre Jọstọs, vbe we uwa do. Iran eha na ọkpa ọrọre ivbi e Ju niyayi ni gun mwẹ winna ne Arriọba Osanobua, iyobọ nọkhuọkhua ọre iran wa khin mẹ.

¹² Ẹpafras ne ọ vbe re ọkpa vbe uwu uwa, kevbe ne ọ vbe re ọguọmwadia Jesu Kristi we uwa do. Ẹghẹ hia ọre ọ wa ya kakabọ na erhunmwu ne uwa, ọ ghi gha rinmwian Osanobua ne ọ gie uwa mudia gbain, ne uwa si uwan, ne ọ la uwa ekhọe fo, vbe uwu ne a na wa ru iho ẹre.

¹³ I gha wa sẹtin sẹ osẹe yọ ighẹ iwinna nọkhua ne ọ winna ne uwa, kevbe ne emwa Laodisia kevbe Hirapolis.

¹⁴ Luk ne ọbo mwa ne ọ ghan, kevbe Demas we uwa do.

¹⁵ Wa we iran do ighẹ avbe etẹn mwa ni rre Laodisia, kevbe Nimfa ke ẹe kevbe emwa ni do gha do esọsi vbe owa ẹre.

¹⁶ Wa gha tie ebe na nẹ, wa ghi gie a miẹn ighẹ a vbe tie ẹre vbe esọsi Laodisia. Erriọ vbe nọ, wa ghi vbe tie ebe ne esọsi Laodisia gha rhie gie uwa.

¹⁷ Wa khama Akipọs wẹ, “Ghẹ i mwẹ u ma winnaẹn fo ighẹ okhuo ne a fian nuẹn vbe iwinna Nọyaẹnmwa.”

¹⁸ Obọ mwẹ ọre I ya gbẹn ọna: Pọl we uwa do, wa ghẹ mianmian ọgiọrọ ne I ye. Te ẹsọhẹ Osanobua gha gu uwa gha rrọọ.