Kọlose 3 - Edo Bible (E Baibol Ẹdo) Version 1996

¹ A huẹn uwa kpaegbe ba Kristi nẹ. Wa gha rhie aro uwa ye emwi ni rre ẹrinmwi khekherriọ, ehe ne Kristi na tota ye uhunmwu ẹkete vbe obọ erha ọmwa Osanobua.

² Wa gie aro uwa gha wu ye emwi ni rre odọọ, ighẹ ẹ i ghi re ni rre agbọn na.

³ Rhunmwuda, wa wulo nẹ, a keghi vbe rhie arrọọ ọwua lẹre ba Kristi vbe uwu Osanobua.

⁴ Arrọọ ọghe ẹmwata ne uwa mwẹ, ọrọre Kristi, rẹn gha ghi ye egbe ladian, wa ghi vbe deba ẹre ladian, wa ghi vbe ghae vbe uyi ẹre.

Arrọọ Ọghe Nẹdẹ Kevbe Ọghe Ọgbọn

⁵ Rhunmwuda ọnii, wa ghi gbe ẹe ua ighẹ orriarria emwi agbọn na ne ọ rre uwu uwa, avbe oghẹ, ohọhọ, ufifimwẹ, aro ne ọ viẹn ye emwi kevbe arovbẹmwẹ (rhunmwuda, te arovbẹmwẹ vbe ye vbe ẹbọ ne a gho.)

⁶ Rhunmwuda, egbe emwi vberriọ, izohu Osanobua gha hihiẹ yan iran ne ẹ i họn ẹmwẹ nẹẹn.

⁷ Uwu ẹbu emwa vberriọ, ọre uwa tobọ uwa te ka la khian yi, ẹghẹ ne a na miẹn wẹ, egbe orriarria vberriọ, ọre ọ hiẹnhiẹn yan ẹdẹ agbọn uwa.

⁸ Banbanna nian, te uwa gha sẹ avbe emwi na hia rae, ohu orriarria kevbe ẹko ọmwa khọ ọmwa. Ghẹ tie ihẹn ra ne u gha ta ẹmwẹ ihin ladian vbe unu.

⁹ Wa ghẹ gha ta ohoghe ma egbe, rhunmwuda, wa ban egbe nẹdẹ mu fua nẹ, ke ẹe kevbe uyinmwẹ ọnrẹn.

¹⁰ Wa keghi vbe mu ọghọgbọn yọ, ọnọna ọrọre ọmwa ọgbọn nii ne Osanobua nọ yi ẹe fi werriẹ, khian ama ọghọe, ne ọ miẹn ehe na do gie uwa rẹn irẹn fo.

¹¹ Rhunmwuda ọnọna nian, ọmwa ne ẹ i re Ju ra ọmwa ne ọ re Ju i ghi rrọọ, ne ọ rhuẹre ra ne ọ ma rhuẹ, ighọnmighọn, edigue aranmwẹ oha, eviẹn ra iran ni yan egbe iran ẹ i ghi rrọọ, sokpan Kristi ọrọre ehia, Kristi rre uwu iran hia!

¹² Emwa Osanobua ọre uwa khin, ọ ho ẹmwẹ uwa, ọ keghi vbe hannọ uwa zẹ ne ọ ya ru ọghọe, rhunmwuda ọnii, wa gha mwẹ ekhọe agiẹngiẹn, itohan imuegberriotọ, ọmẹhẹ, ufumwẹ kevbe iziengbe.

¹³ Wa gha ye egbe obọ, wa gha ya bọ egbe, deghẹ ọmwaikọmwa kevbe ogieva ẹre gba muan egbe ẹmwẹ, wa ghi gha ya bọ egbe, zẹ vbene Kristi vbe ya bọ uwa.

¹⁴ Wa ghi rhie ba ena hia, aho ẹmwẹ ọmwa ne ọ re ọza ne ọ gba emwi hia kugbe vbe akugbe ne ọ gbae.

¹⁵ Ọfumwegbe ne Kristi rhie ne ọmwa, ọre ọ kere ne ogha re ne ọ buohiẹn vbe uwu ekhọe uwa, rhunmwuda, ọfumwegbe na ọre Osanobua tie uwa kugbe ba vbe ẹgbẹe ọkpa nii. Wa vbe gha kpọnmwẹ.

¹⁶ Wa gie ikporhu Kristi ke ẹe kevbe uvuọnmwẹ ọnrẹn gha rre ekhọe uwa. Wa gha ye ẹwaẹn ma egbe emwi, ne uwa vbe gha ya ẹe bu egbe ude. Wa gha ye Psalm so ihuan, wa gha so ihuan kevbe ihuan ni huanrẹn, wa gha ye ekhọe oghọghọ so ihuan ghe Osanobua uwa.

¹⁷ Emwi ne uwa a rhirhi ta ra emwi ne uwa a rhirhi gha ru, wa gha ru ẹe vbe eni Nọyaẹnmwa Jesu, vbe ne uwa na la ekpa ẹre rhie uyi ne Osanobua ne Evbavba.

Vbene A Ya Ya Egbe Khian Hẹẹ Vbe Arrọọ Ọgbọn Na

¹⁸ Wa ne ikhuo, wa gha họn ẹmwẹ ne ọdafẹn uwa, rhunmwuda, emwi ne ọ khẹ ke ne uwa gha ru zẹ vbe ọmwa ne ọ ya Kristi yi, ọre ọnii khin.

¹⁹ Wa ne ikpia, wa gha ho ẹmwẹ amwẹ uwa, wa ghẹ gha khọ mu iran.

²⁰ Wa ne emọ, te ọ khẹke uwa, zẹ vbe emwa ni ya Kristi yi, ne uwa gha họn ẹmwẹ ne avbe evbibiẹ uwa ẹghẹ hia, rhunmwuda, ọnii ọre ọ yẹ Osanobua.

²¹ Wa ne evbibiẹ emọ, wa ghẹ gha ye ukpẹ gbe ivbi uwa ne egbe ghẹ ya wọ iran.

²² Wa ne eviẹn, wa gha họn ẹmwẹ ne arowa uwa ne agbọn na, vbe emwi hia, wa gha ru vberriọ, ẹ i re vbe iran a gha bẹghe uwa ọkpa, ne iran ba miẹn ehe na gha ye aro esi ghe uwa, sokpan wa gha ye ẹkoata ru ẹe, rhunmwuda ọghọ, ne uwa rhie ne Nọyaẹnmwa.

²³ Emwikemwi ne uwa rhirhi gha ru, wa ye ẹtin uwa hia gha ruẹe, vbene a miẹn wẹ Nọyaẹnmwa ọre uwa winna na ighẹ ẹ i re ọmwa kẹkan.

²⁴ U ghi yerre ighẹ Nọyaẹnmwa gha san ruẹn ẹse, ọ gha sẹ uẹ obọ vbe emwi ne ọ viọ hinrre khẹ emwa rẹn. Rhunmwuda, Kristi ọrọre arowa ne arowa ne u ga.

²⁵ Ọmwa ne ọ zẹ iba, ọmwa ne ọ khọn rẹn wẹ ne ọ gha khin, a gha vbe ha ẹre osa iba ne ọ zẹe, rhunmwuda obọ ọkpa ọre Osanobua ya mu emwa hia.