Jọsua 9 - Edo Bible (E Baibol Ẹdo) Version 1996

Ivbi E Gibiọn Rẹrẹ Jọsua

¹ Avbe ọba hia ni rre orrie Jọdan keghi họn ẹmwẹ na, iran ni rre oke, iran ni rre otọ ne ọ rriẹe kevbe iran hia ni yin lele ọkpẹn Okun Meditẹrrenian, rhinrin ya sẹ Lebanọn, iran na keghi re avbe ọba ivbi e Hiti, Amọri, e Kenan, e Pẹriz, e Hivi kevbe Jebus.

² Iran keghi kugbe ne iran do gu e Jọsua kevbe ivbi Izrẹl gbinna.

³ Ivbi e Gibiọn ghi họn vbene Jọsua ru emwa Jẹriko kevbe Eai hẹẹ,

⁴ iran na wẹ te iran gha hiẹ ọre mu ru. Iran keghi ya viọ evbare eso, iran keghi ye avbe ẹkpo ni wiẹn uan nẹ kevbe avbe ọgọ ohian ni sọlọe, ne a vbe dọlọ nẹ, iran keghi ya ehia kun emwi ye ekẹtẹkẹtẹ iran.

⁵ Iran keghi viọ ibata ni wiẹn uan nẹ, a na vbe dọlọe yi ye owẹ, iran keghi silo osọnmwẹ ukpọn ye egbe. Ebrẹd ne iran viọ mwẹ keghi kaka a, ọ vbe suobu.

⁶ Iran na bu e Jọsua gha rrie agọ e Gilgal, iran keghi tama rẹn kevbe ivbi Izrẹl wẹẹ, “Ẹvbo ne ọ rrei gban-an ọre ima ke dee. Gie ima kevbe uwa vẹn ihẹn ne egbe.”

⁷ Sokpan ivbi Izrẹl keghi tama ivbi e Hivi wẹẹ, “Vbe ima a ghi guwa vẹn ihẹn ne egbe hẹ, ọ gha kẹe, ehe ne uwa ye ma khian rrei vbe emwana.”

⁸ Iran keghi tama e Jọsua wẹẹ, “Ghe ima ne u ya ru ene ọ khọn ruẹn.” Jọsua keghi nọ iran wẹẹ, “De emwa ne uwa khin yi? De ehe ne uwa ke rre?”

⁹ Iran keghi ta okha egbe iran ma rẹn wẹẹ, “Evbavba, ehe ne ima kerre wa rrei ẹsẹse rhunmwuda ma họn ẹmwẹ e Nọyaẹnmwa Osanobua ruẹ. Ma họn otiti emwi ne ọ ru vbe Igipt.

¹⁰ Kevbe emwi ne ọ ru avbe ọba Amọri eveva ni rre odẹ ahọ e Jọdan re: Saihọn ne ọba Hesbọn kevbe Ọg ne ọba Basian ne ọ rre Astarrọt.

¹¹ Avbe ọkaolotu ima kevbe emwa hia ni rre otọe ima keghi tama ima wẹẹ, ‘Wa viọ evbare okhian mwẹ, wa bu emwa na gha khian ya tama iran wẹẹ, “Ghe ima ne u ya ru ene ọ khọn ruẹn, lahọ gie ima vẹn ihẹn ne egbe.” ’

¹² Ghe ebrẹd ima. Ẹghẹ ne ima na kpao vbe owa ne ima do vba ruẹ, te ọ he ye tọn. Sokpan ghe nian! te ọ ghi ka, ọ vbe suobu.

¹³ Ẹghẹ ne ima na sa amẹ ya avbe ọgọ ohian na, ọghọgbọn ehia khin. Sokpan ghe nian, ehia yan ghan an, kevbe ibata ima kevbe ukpọn ima rhunmwuda urremwẹ okhian ne ima khian ẹn.”

¹⁴ Ivbi Izrẹl keghi miẹn iran evbare eso sokpan, iran ma nọ e Nọyaẹnmwa emwi ne iran gha ru.

¹⁵ Ẹre Jọsua na gu iran vẹn ihẹn ọse, ọ na vbe gu iran ta ile ne gbain wẹ, iran gha gie iran gha rre agbọn. Avbe ọkaolotu ivbi Izrẹl keghi ya ekhọe hia yan eyan ma iran.

¹⁶ Ọ ghi rre ikpẹdẹ eha ne iran ghi gba ke ọta na, ivbi Izrẹl keghi do rẹn wẹ ehe ne emwa nii ye ẹ i rre vbe evba.

¹⁷ Ẹre ivbi Izrẹl na si okhian, vbe ẹdẹ ne ogieha, iran keghi sẹ ẹvbo ne avbe emwa nii ye: Gibiọn, Kiefira, Biirot kevbe kirriat Gierim.

¹⁸ Sokpan, ivbi Izrẹl ma gbele iran rhunmwuda avbe ọkaolotu iran ya eni e Nọyaẹnmwa Osanobua Izrẹl ye ekhọe hia yan ma iran. Emwa nii hia keghi gui ye emwi ne avbe ọkaolotu iran ru.

¹⁹ Sokpan avbe ọkaolotu keghi wanniẹn, “Ma ye eni e Nọyaẹnmwa ye ekhọe hia yan ma iran nẹ. Banbanna nian, ma i ghi sẹtin ru emwi ikuanegbe egbe ghe iran.

²⁰ Te a gha gie iran gha rre agbọn ugbẹn vbe a miẹn wẹ ma vẹn ihẹn ne iran, a deghẹ ma ma ru ẹe vberriọ, Osanobua gha rria ima ikhi.

²¹ Wa gie iran gha rre agbọn sokpan iran ghi gha rhọ erhan gie ima iran ghi vbe gha sa amẹ gie ima.” Erriọ iran ne avbe ọkaolotu khare.

²² E Jọsua keghi wẹ ne a viọ emwa Gibiọn bu irẹn gha dee, ọ keghi nọ iran wẹẹ, “Vbọzẹ ne uwa na rẹrẹ ima yi, ne uwa na tama ima wẹẹ, ehe ne ọ rrei wa ke dee vbe a miẹn wẹ emwa na wa ye?

²³ Osanobua bu abe gbe uwa nẹ ye emwi ne uwa ru na. Eviẹn ọ re uwa ra gha khin ẹdẹdẹmwẹdẹ ne uwa gha rhọ erhan kevbe ne uwa vbe gha sa amẹ ye ehe ne ọ huanrẹn ọghe Osanobua mwẹ.”

²⁴ Iran keghi wanniẹn wẹẹ, “Emwi ne ọ ya ima ru ẹe enọwanrẹn ọrọre wẹ ma họn ẹn wẹ emwata nọ, wẹ te Nọyaẹnmwa Osanobua ruẹ tama Mosis ne ọguọmwadia ẹre, ne ọ mu otọe nii hia ne uwa, kevbe wẹ ne uwa gha gbele emwa ni rrọọ khian, vbe ne uwa ya nana sikẹ odaro. Te ima ru ẹe rhunmwuda ohan uwa wa kakabọ gha mu ima, ohan uhunmwu ima ọ re ọ gha to ima.

²⁵ Banbanna nian, atataobọ ruẹ ọ re ima ghi ye, emwi ne ọ ghi khọn ruẹn, ye ima ru.”

²⁶ Ẹre Jọsua ghi na degue iran vbe obọ ivbi Izrẹl, ọma gie ivbi Izrẹl gbele iran an.

²⁷ Sokpan, vbe uwu ẹre nii, ọ keghi ya iran ru ni rhọ erhan kevbe ni sa amẹ ne ivbi Izrẹl kevbe aka ọghe Nọyaẹnmwa. Erriọ iran ye ru ẹe do sẹ ẹdẹ nẹrẹ na. Iran ghi gha winna vbe ehe ne e Nọyaẹnmwa a rhirhi wẹ ne a na gha ga irẹn.