Jọsua 8 - Edo Bible (E Baibol Ẹdo) Version 1996

Umumwẹ Kevbe Uguọghọmwẹ Ọghe Eai

¹ E Nọyaẹnmwa keghi tama e Jọsua wẹẹ, “Ghẹ gie ohan muẹn, ghẹ gie egbe vbe wọruẹ. Viọ ivbiyokuo hia mwẹ obọ ne u vbe gha rrie Eai. I gha guẹ khọn ọba Eai miẹn ẹre otọ, emwa rẹn, ẹvbo ẹre ke otọe ẹre gha khian ọwuẹ.

² Zẹ vbene uwa ru Jẹriko ke ọba ẹre, erriọ wa gha vbe ru Eai ke ọba ẹre. Sokpan, vbe ọnọna, wa sẹtin viọ emwi ke ẹmila iran ya khian ọwua, wa mu egbe ne uwa ya khọn ẹvbo nii, wa ghi la iyeke do ẹe mu.”

³ Ẹre Jọsua na mu egbe ne ọ viọ ivbiyokuo ẹre hia gha rrie Eai. Ọ keghi hannọ ikpia ni din arriaisẹn ọgban (30,000) ọ na ye asọn gie iran gha khian.

⁴ Ọ keghi tama iran vbene iran gha ru hẹ: “Wa lẹre ye obọ nọkpa ọghe ẹvbo nii, wa ghẹ khian rrei nẹ ẹẹn gbe, sokpan wa ghi mu egbe ne uwa gha ya dekun ẹnrẹn.

⁵ Ke imẹ kevbe emwa mwẹ gha vbe gha die nene ẹvbo nii, iran ghẹ ghi ladian ne iran do gu ima gbinna, ma ghi lẹ, zẹ vbene a ka ru vbe ẹghẹ okaro.

⁶ Iran gha zẹ ima khu rhinrin ma te do silo iran ke ẹvbo iran ladian. Iran ghi gha ro ighẹ te ima lẹ ne iran, zẹ vbene ima ka ru yi.

⁷ Ẹghẹ nii, wa ghi ladian vbe ehe ne uwa lẹre yi, ne uwa khọn ẹvbo nii muotọ. E Nọyaẹnmwa Osanobua rua gha rhie ẹre ne uwa.

⁸ Wa ghẹ ghi khọn ẹvbo nii nẹ, wa ghi mu erhẹn yọ zẹ vbene e Nọyaẹnmwa khare zẹẹ. Uhunmwu ne a gie uwa ẹre ọ re onii khin.”

⁹ Ẹre Jọsua na gie iran gha khian, iran na gha rrie ehe ne iran lẹre yi vbe ọlarrie owẹn Eai vbe ẹkpo Eai kevbe Bẹtẹl. E Jọsua keghi gbe asọn nii vbe agọ.

¹⁰ E Jọsua keghi gua kpao vbe owiẹ vbirrivbirri, ọ na tie avbe ivbiyokuo sikoko. Rẹn vbe avbe ọkaolotu Izrẹl ke ghi viọ iran gha rrie Eai.

¹¹ Ke iran kevbe ivbiyokuo ke wa gha rrie odẹ ne onurho nọkhua ne a la la ẹvbo nii ye. Iran keghi bu agọ ye odẹ okuọ vbọ vbene iya na gha rre ẹkpo iran kevbe Eai.

¹² Ọ keghi viọ ọmwa arhin arriaisẹn isẹn (5,000) ọ na viọ iran lẹre ye ọlarrie owẹn ọghe ẹvbo nii, vbe ẹkpo Eai kevbe Bẹtẹl.

¹³ Erriọ iran ya ghae ivbiyokuo ye okuo, agọ ne ọ wa rrọ kegha rre odẹ okuọ ẹvbo nii, ni dekẹe kegha rre ọlarrie owẹn. E Jọsua keghi gbe asọn nii hia vbe uwu iya.

¹⁴ Ọba Eai ghi bẹghe ibiẹka e Jọsua ọ keghi wa zẹgiẹgiẹ guakpaọ. Ke irẹn kevbe emwa rẹn keghi wa ladian gha rrie odẹ Iya Jọdan ne iran ya gu Izrẹl gbinna vbe ihe ọkpa ne iran na ka vbe ru vberriọ. Rẹn ma rẹn ighẹ iyeke ọ re a ra ke gu ẹe khọn.

¹⁵ E Jọsua kevbe emwa rẹn keghi ba lẹ, iran na mu uhunmwu da uwu oha.

¹⁶ A keghi wa tie ikpia ni rre ẹvbo nii hia ladian ne iran khu iran, vbene iran ya khu e Jọsua khian nii, erriọ iran ya gha rrei ne ẹvbo iran.

¹⁷ Ikpia ni rre Eai hia keghi wa khu ivbi Izrẹl. Iran keghi wa yan urho ẹvbo nii fua vbene ọmwa rhọkpa i ghi na rrọọ ne ọ gha sinmwi oseghe ẹre.

¹⁸ Ẹre Nọyaẹnmwa na tama Jọsua wẹẹ, “Niẹn asoro ruẹ da Eai, I ra muẹn nuẹn.” E Jọsua keghi ru vbene a tama rẹn.

¹⁹ Ọwarọkpa vbe ọ ghi tọn obọ ẹre mu, emwa ni lẹre usin keghi zẹgiẹgiẹ gua kpao, iran na rhulẹ la ẹvbo nii, iran na zẹgiẹgiẹ mu erhẹn yọọ.

²⁰ Ivbi Eai ghi gbearoghe iyeke, iran keghi miẹn vbe ighogho ẹre wa sẹ iso. Iran ma ghi miẹn ehe lẹ lao rhunmwuda, ivbi Izrẹl ni lẹghe uwu oha keghi werriegbe rre viọ aro da iran.

²¹ Ugbẹn vbe Jọsua kevbe emwa rẹn ghi miẹn wẹ iran nekpa mu ẹvbo nii nẹ, kevbe wẹ, erhẹn to vbọ, iran keghi fi egbe werriegbe, iran na suẹn gha gbele ivbi Eai.

²² Ivbi Izrẹl ni rre ore ẹvbo keghi mu aro da emwa Eai. Ivbi Izrẹl keghi wa lẹga iran fo, iran na gbele iran uan, ọkpa ne ọ sẹtin lẹfe ra ne ọ miẹn uhunmwu vbọ i vbe rrọọ.

²³ Gberra ọba Eai. Iran keghi mu ẹẹn, iran na rhie ẹre gie Jọsua.

²⁴ Ivbi Izrẹl keghi gbele avbe eghian iran hia vbe uwu oha ne iran khulo iran lao. Iran na dọlegbe gha rrie Eai iran na vbe ya gbele iran ni rre odọ niii uan.

^25-26 Iran keghi gbele emwa ni rre Eai fo ẹdẹ nẹdẹrriọ, ọmwa arhin arriaisẹn iweva, (12,000) ikpia kevbe ikhuo. E Jọsua keghi ye niẹn asoro ẹre da Eai, ọ ma vbe rhie ẹre ghe otọe a te do miẹn wẹ a gbele emwa hia ni rre evba ni fo.

²⁷ Ivbi Izrẹl keghi viọ avbe ẹmila kevbe avbe emwi ne a khọn viọ vbe evba nii, zẹ vbene e Nọyaẹnmwa tama Jọsua.

²⁸ E Jọsua keghi giẹn Eai rua, ọ na ya ẹe khian ọ rhiae zẹ vbene ọ ye do sẹ ẹdẹ nẹrẹ.

²⁹ Ọ keghi si ọba Eai rrọọ ye erhan, ọ na sẹ ọe rae ye erhan ya sẹ ota. Owẹn ghi defua, nẹ, e Jọsua keghi gie emwa, iran na ya mu ikun ẹnrẹn tuorre, iran keghi fiẹe fi otọ vbe onurho ne a la la ẹvbo ni. Iran keghi silo okuta ọrhẹnrhẹn gbo yan rẹn, te ọ ye rre evba do sẹ ẹdẹ nẹrẹ na.

A Tie Uhi Nii Vbe Oke Ebal

³⁰ E Jọsua keghi bọ aka ọkpa ne Nọyaẹnmwa ne Osanobua ivbi Izrẹl vbe Oke Ebal.

³¹ Ọ keghi ru ẹe zẹ vbe igiodẹ ne Mosis ne ọguọmwadia e Nọyaẹnmwa rhie ne ivbi Izrẹl zẹ vbe ne ọ tae vbe Uhi e Mosis: “Aka ọghe avbe okuta ne a ma ye emwi guọghọ.” Iran keghi zọ ese ne a giẹn uan ghe Nọyaẹnmwa vbe evba, iran na vbe viọ emwi isara iran rre.

³² E Jọsua keghi gbẹnnẹ avbe Uhi ne Mosis gbennẹ, yan okuta ọghe aka nii vbene ivbi Izrẹl hia na gha ghe ẹre.

³³ Ivbi Izrẹl hia, kevbe avbe ọkaolotu iran, emwa iwinna iran kevbe iran ni bu ohiẹn deba avbe erriọvbe ni rre ehe ne iran ye, keghi tẹn lele obọ eveva ọghe Ẹkpẹti Ile Nọyaẹnmwa, iran na mu aro da avbe ohẹn e Livai ni mu ẹẹn. Obọ ọkpa vbe uwu avbe emwa nii keghi mudia viọ iyeke da Oke Gerizim kevbe obọ ọkpa na viọ iyeke da Oke Ebal. E Mosis ne ọguọmwadia e Nọyaẹnmwa ọ re ọ ka tama iran ne iran ru ẹe vberriọ vbe ẹghẹ a sẹ ne iran gha ya miẹn afiangbe.

³⁴ E Jọsua keghi tie uhi ni hia fẹẹrẹ ladian kevbe afiangbe ni rrọọ kevbe ihẹn ni rrọọ, zẹ vbe ne a wa gbẹnnẹ ọẹn ye uwu ebe uhi zẹẹ.

³⁵ E Jọsua keghi wa tie uhi ọghe Mosis hia fẹẹrẹ ma emwa ni gbe ẹbu nii, ke ikhuo kevbe ibiẹka kevbe avbe ọrriọvbe ni rre ehe ne iran ye.