Jọsua 3 - Edo Bible (E Baibol Ẹdo) Version 1996

Ivbi Izrẹl Fian E Jọdan Rra

¹ Vbe owiẹ ne ọ lelẹe, e Jọsua keghi kpaegbe ke ẹe kevbe ivbi Izrẹl hia, iran keghi si kpao hin agọ Akesia rre, iran na gha rrie Jọdan. Iran keghi si agọ bu vbe evba, iran kevbe fian ẹẹn rra.

² Vbe iyeke ikpẹdẹ eha, avbe ọkaolotu keghi lele agọ nii hia.

³ Iran keghi tama emwa nii wẹẹ, “Wa gha bẹghe avbe ohẹn vbe iran a mu Ẹkpẹti Ile ọghe Nọyaẹnmwa Osanobua rua, wa rhọ emwi ne uwa lele iran.

⁴ Erriọ uwa gha na rẹn odẹ ne uwa gha la, vbene a na miẹn wẹ wa ma he ka sẹ edinran ẹdẹ, sokpan, wa ghẹ sikẹ nene Ẹkpẹti Ile, wa ghi rhie omwa ukhiọnmwẹ ibiriki ọkpa ye ẹkpo vbe odieke ẹre.”

⁵ E Jọsua keghi tama emwa ni wẹẹ, “Wa họnmwẹ egbe rhunmwuda vbe ẹdẹ ne akhuẹ, e Nọyaẹnmwa gha ru emwi nọkhua vbe uwu ẹbu uwa.”

⁶ Ẹre Jọsua na tama avbe ohẹn wẹẹ ne iran tọn Ẹkpẹti Ile nii mu ne iran ke odaro ne avbe emwa nii. Iran keghi ru vbene ọ khare.

⁷ Ẹre Nọyaẹnmwa na tama Jọsua wẹẹ, “Emwi ne I ra ru ẹrẹna gha ya ivbi Izrẹl hia ya ọghọ nuẹn zẹ vbe okpọmwa, iran ghi vbe rẹn wẹ I rrọ yaba ruẹ zẹ vbene I vbe gha rrọọ yaba e Mosis.

⁸ Tama avbe ohẹn ni mu Ẹkpẹti Ile wẹẹ, iran gha sẹ ẹzẹ nii, iran ghi mudia vbe uwu amẹ, vbe ọkpẹn oke.”

⁹ Ẹre Jọsua na tama emwa nii wẹẹ, “Wa larre edinran, ne uwa danmwẹ ehọ ẹmwẹ ne Nọyaẹnmwa ne Osanobua uwa ra guan.

¹⁰ Ẹrẹna, wa gha rẹn wẹ Osanobua ne ọ rrọọ rre adesẹneva uwa, vbe ne uwa ya nana sikẹ odaro, erriọ rẹn gha vbe ya gha khulo emwa Kenan, Hiti, Hivi, Pẹriz, Gagas, Amọri kevbe Jebus hin odaro uwa rre.

¹¹ Ẹkpẹti Ile ọghe Nọyaẹnmwa uhunmwu otọ agbọn hia ra ke odaro ne uwa ya fian Ẹzẹ Jọdan rra.

¹² Banbanna nian wa zẹ arhin iweva, ọkpọkpa ke dọmwadẹ ẹwae Izrẹl rre.

¹³ Avbe ohẹn ni mu Ẹkpẹti Ile ọghe Nọyaẹnmwa uhunmwu otọ agbọn hia gha viọ owẹ iran ye uwu amẹ nii, ẹzẹ Jọdan ghi dobọ ulẹmwẹ yi, amẹ ni lẹ ke uhunmwu Ẹzẹ dee ghi hẹnhẹn ye ihọkpa.”

^14-15 Ẹghẹ emwiorhọ ọ re ghaa nọ, ẹzẹ ke wa ro, emwa nii keghi si kpao vbe agọ ne iran ya fian Jọdan rra. Avbe ohẹn keghi mu Ẹkpẹti Ile, iran na ke odaro. Iran ghi sẹ ọkpẹn Jọdan iran na viọ owẹ ye uwu ẹzẹ.

¹⁶ Amẹ keghi dobọ ulẹmwẹ yi, ọ na hin utete gha rrie odẹ uhunmwu ẹzẹ gban an vbe Adam ne ẹvbo ne ọ rre ọkpẹn Zarẹtan, ulẹmwẹ ẹzẹ ghe ototọ ne ọ rrie Okun Nọwu ke wa gha re ne a yan fua, emwa keghi fian ẹn rra vbe ọkpẹn Jẹriko.

¹⁷ Ẹghẹ ne iran na ye owẹ fian ẹn gberra vbe otọ ne ọ kae nii, avbe ohẹn ni mu Ẹkpẹti Ile ọghe Nọyaẹnmwa keghi mudia ye otọe ne ọ kae vbe adesẹneva Jọdan a te do miẹn wẹ emwa hia lae gberra.