Jọsua 24 - Edo Bible (E Baibol Ẹdo) Version 1996

E Jọsua Gu Emwa Ni Rre Siẹkẹm Guan

¹ E Jọsua keghi si avbe ẹwae Izrẹl hia koko vbe Siẹkẹm. Ọ keghi tie avbe ediọn, avbe ọkaolotu, avbe enibuohiẹn kevbe avbe ekamakodin Izrẹl, iran kegha die odaro Osanobua.

² E Jọsua keghi tama emwa nii hia wẹẹ, “Ẹmwẹ ne e Nọyaẹnmwa ne Osanobua Izrẹl ra ta ọ re ọna khin. Vbe ẹghẹ ne ọ kpẹre ne ọ gberra, avbe erha uwa odede kegha rre obọ nọkpa ọghe Ẹzẹ Yufretes, iran kegha gho avbe ẹbọ ọvbehe. Ọkpa vbe nene avbe erha uwa odede kegha re Tẹra ne ọ re erha Ebraham kevbe Nahọ.

³ Ẹre I na rhie Ebraham hin otọe ni rre, fian Yufretes rra, I na su ẹe la otọ Kenan, ehe ne ọ sẹe ehe ne ọ rhanmwẹ. I kevbe viọ emọ ni bun ne ẹẹn, I rhie Aizik ne ẹẹn,

⁴ I kevbe viọ Jekọb kevbe Isọ ne Aizik. I keghi mu Idọm ne ẹvbo oke ne Isọ ne ọ gha re ọghọe sokpan e Jekọb kevbe ivbi ẹre kegha rrie Igipt.

⁵ Ẹre I na ghi gie Mosis kevbe Errọn, I na si ọfuan nọkhua ye Igipt egbe. I keghi viọ uwa ladian.

⁶ I viọ avbe erha uwa ke Igipt ladian, iran keghi do sẹ Okun Iranmwiran. Ivbi Igipt keghi ya ikẹkẹ okuo kevbe ẹsin iran ni gua ẹe khulo iran ya sẹ Okun.

⁷ Iran ghi ye ekhọe hia na erhunmwu ghe mwẹ, I keghi mu ebiebi ye ẹkpo iran kevbe ivbi Igipt. I keghi gie okun lẹ yan ivbi Igipt, ọ na rhu iran ginna otọe. Wa miẹn emwi ne I ru Igipt re, “Wa kevbe di uwu ato ya la ẹghẹ ne ọ taẹn.

⁸ Ẹre I na viọ uwa gha die otọ iran ne emwa Amọri ni rre odẹ ahọ ọghe Jọdan. Iran gu uwa gbinna, I keghi gie uwa khọnmiotọ vbe uhunmwu iran. Wa keghi mu otọ iran, mẹ na fuẹn iran zẹ vbene uwa ya khian ghe odaro.

⁹ Ẹre Balak ne ovbi e Zipọ ọba e Moab na gu uwa gha khọn. Ọ keghi gie uhunmwu gie Balam ne ovbi Beọ, ọ na wẹ ne ọ fi uwa unu.

¹⁰ Sokpan mẹ ma danmwẹ ehọ e Balam, rhunmwuda ọnii, rẹn keghi na erhunmwu ne uwa, ọ re I na miẹn uwa fan vbe obọ Balak.

¹¹ Wa keghi fian Jọdan rra gha die Jẹriko. Ivbi e Jẹriko kegha gu uwa gbinna vbene emwa Amọri, Pẹriz, Hiti, Gẹgas, Hivi kevbe Jebus vbe ru. I keghi rhie akhọnmiotọ ne uwa vbe uhunmwu iran.

¹² I kevbe gie ugborrirri mwẹ ke odaro ne uwa ne ọ ya khulo avbe ọba Amọri eva ladian vbe odaro uwa. Ẹ i zẹdẹ re umozo kevbe ifẹnmwẹ uwa ọ re ọ ru ẹe.

¹³ I keghi mu otọ ne uwa ma miẹn ẹsọn yi ne uwa, deba ẹvbo ne uwa ma bu. Evba wa ye na, wa gha rri ọmọ erhan ne a ya ru ayọn ne ọ baa vbe erhan ẹnrẹn kevbe oliv vbe erhan ne uwa ma kọ.”

¹⁴ “Banbanna nian khekherriọ,” wa ya uhunmwu rhanmwẹ otọ ne Nọyaẹnmwa, “ne uwa ye ẹkoata gae vbe ẹmwata. Wa mianmian avbe ẹbọ ne avbe erha uwa odede te gha ghoo vbe Mẹsopotamia kevbe Igipt ne uwa gha ga e Nọyaẹnmwa, ọkpa kẹkan.

¹⁵ A deghẹ wa i ho ne uwa ga e Nọyaẹnmwa, wa tae ẹrẹna nian ọmwa ne uwa gha ga, adeghẹ avbe ẹbọ ne avbe erha uwa gha ghoo vbe Mẹsopotamia nọ ra avbe ẹbọ ivbi Amọri ne uwa rre otọ ẹre. Sokpan, zẹ vbe ọghomwẹ kevbe ẹgbẹe mwẹ, e Nọyaẹnmwa ma gha ga.”

¹⁶ Emwa nii keghi wanniẹn wẹẹ, “A i zọe vbe iro ẹdẹ wẹ a gha sẹ e Nọyaẹnmwa rae ne a ya gha ghoo ẹbọ ọvbehe!

¹⁷ E Nọyaẹnmwa Osanobua mwa ọ re ọ viọ avbe erha mwa kevbe ima ke uwu ọviẹn ladian vbe otọ Igipt, aro ima vbe sẹ iwinna nekhua ne ọ winnaẹn. Ọ keghi viọ ima lẹre hin ẹbe rre vbe ehe ne ima a rhirhi la vbe uwu ẹbu emwa ne ima la ẹvbo ẹre gberra.

¹⁸ Vbene ima ya gha nana ghe odaro, erriọ e Nọyaẹnmwa ya gha khulo avbe emwa nii ladian, avbe emwa Amọri ni rre otọe nii. Erriọ vbe nọ, ma gha vbe ga e Nọyaẹnmwa! rẹn ọrọre Osanobua mwa.”

¹⁹ E Jọsua keghi tama emwa ni wẹẹ, “Sokpan wa i sẹtin ga e Nọyaẹnmwa rhunmwuda Osanobua ne ọ huanrẹn kevbe ne a i gu mwa ẹrrẹe ọ re irẹn khin. Rẹn i ra ya orukhọ uwa bọ uwa.

²⁰ Deghẹ wa fi iyeke gbe e Nọyaẹnmwa, wa na ya gha gho avbe ẹbọ ọvbehe, ọ gha mu aro da uwa, ọ ghi rri uwa oya. ọ gha fuẹn uwa a, a gha rhe miẹn wẹ ọ ka gha maa ne uwa de yi.”

²¹ Emwa nii keghi tama e Jọsua wẹẹ, “Ẹn o, e Nọyaẹnmwa ọ re ima gha ga.”

²² E Jọsua keghi tama iran wẹẹ, “Wa tobọ uwa ọrọre osẹe egbe uwa wẹ wa tobọ uwa khare ighẹ e Nọyaẹnmwa ọ re uwa gha ga.”

²³ Ọ re irẹn na ghi kha wẹẹ, “Rhunmwuda onii khekherriọ, wa hẹ avbe ẹbọ orhunmwuyẹn ni rre ehe ne uwa ye kua, ne uwa yan wẹ wa gha ya ẹko ata lele e Nọyaẹnmwa ne Osanobua Izrẹl khian.”

²⁴ Emwa nii keghi khama e Jọsua wẹẹ, “Ma gha ga e Nọyaẹnmwa Osanobua mwa, ma gha vbe ya uhi ẹre gha ru emwi.”

²⁵ Ẹre Jọsua ghi na yan ile ne emwa nii ẹdẹ nẹdẹrriọ, ọ na viọ uhi kevbe ilele ne iran vbe Siẹkẹm.

²⁶ E Jọsua keghi gbẹnnẹ uhi na ye ebe uhi ọghe Nọyaẹnmwa. Ọ keghi mu okuta nọkhua, ọ na muẹn yotọ vbe evba vbe ototọ okan vbe ehe Ne ọ huanrẹn ọghe Nọyaẹnmwa,

²⁷ ọ keghi tama emwa ni hia wẹẹ, “Wa ghe okuta na; ọ na ọ re ọ ra gha re osẹe ima. Ọ họn ẹmwẹ hia ne Nọyaẹnmwa tama ima. Rhunmwuda rẹn ọ re ọ ra sẹ osẹe gbe uwa, ne ọ ghẹ gie uwa ya sọtẹ ghe Osanobua uwa.”

²⁸ Ẹre Jọsua ghi na zẹ emwa ni urrie, dọmwadẹ ọghọe keghi gha rrie obọ ọghọe vbe otọe nii.

E Jọsua Kevbe Eliaza Wulo

²⁹ Vbe iyeke ọnii, e Jọsua ne ovbi Nọn ne ọguọmwadia e Nọyaẹnmwa keghi wu vbe ọ rre ukpo igbe yan iyisẹn (110).

³⁰ Iran keghi re ẹre ye otọ ẹre vbe Timnat Sera vbe Ifreim ne ẹvbo oke vbe odẹ okuọ Oke Gaas.

³¹ Ivbi Izrẹl keghi wa gha ga e Nọyaẹnmwa vbe ukpo hia ne Jọsua yae vbe agbọn, kevbe iyeke ọ vbe wu nẹ vbe iran ne avbe ọkaolotu ni rẹn emwi hia ne e Nọyaẹnmwa ru ne Izrẹl he ye rrọọ.

³² Iran keghi re avbe ugboloko e Josẹf ne ivbi Izrẹl viọ ke Igipt gha dee ye Siẹkẹm, vbe ako otọ ne Jekọb gu ivbi e Hamọ ne erha Siẹkẹm dẹ ọ re esiliva iyisẹn. Ivbi e Josẹf ọ re ọ rri otọe nii vbe ukhu.

³³ Eliaza ne ovbi Errọn keghi wu, a na re ẹre ye Gibea ne ẹvbo e Finihaz ne ovbi ẹre, ne a mu ne ẹẹn vbe ẹvbo oke ọghe Ifreim.