Jọsua 22 - Edo Bible (E Baibol Ẹdo) Version 1996

E Jọsua Gie Iran Ni rre Odẹ Ahọ Gha rrie Owa

¹ Ẹre Jọsua na tie emwa ni rre ẹwae Riubẹn, e Gad kevbe obọ ahọ vbe ẹwae Manasẹ si koko.

² Ọ keghi tama iran wẹẹ, “Wa ru emwi ne Mosis ne ọguọmwadia e Nọyaẹnmwa tama uwa ne uwa ru nẹ, wa keghi vbe ya uhi mwẹ hia ru emwi.

³ Wa ma fi iyeke gbe ivbi Izrẹl ne ihua uwa ke ẹghẹ nii gha dee do sẹ ẹdẹnẹrẹ na. Wa keghi gbe ẹkun sẹ otọ gha ru zẹ vbe ne Nọyaẹnmwa Osanobua rua khare.

⁴ Banbanna nian, e Nọyaẹnmwa Osanobua rua rhie ọfumwegbe ne ivbi Izrẹl ne ihua uwa nẹ zẹ vbene ọ khare. Rhunmwuda ọnii, wa werriegbe gha rrie otọe uwa ne uwa mu ya khian ọwua, otọe ne ọ rre odẹ ahọ e Jọdan, ne Mosis ne ọguọmwadia e Nọyaẹnmwa mu ne uwa.

⁵ Wa gia miẹn wẹ wa ru zẹ vbe uhi kevbe iyi ne Mosis ne ọguọmwadia e Nọyaẹnmwa viọ ne uwa, wa gha ho ẹmwẹ e Nọyaẹnmwa Osanobua rua, wa gha ru iho ẹre, wa gha ya uhi ẹre ru emwi, wa giee gba ẹko uwa, wa ye ekhọe uwa hia kevbe orhiọn uwa hia ga ẹe.”

^6-8 E Jọsua ghi ya erhunmwu zẹ iran na urrie nẹ, ọ keghi tama iran wẹẹ, “Ke uwa kevbe ẹfe ni bun ọre ọ ghi gba rrie owa na, ẹmila ọrhẹnrhẹn, esiliva, igoru, oze, ematọn kevbe ukpọn ni bun. Wa ghae ne ivbi Izrẹl ne ihua uwa vbe avbe emwi ne uwa miẹn avbe eghian uwa ẹre.” Iran keghi kpao gha rrie. E Mosis mu otọe eso vbe odẹ ahọ ne ẹwae Manasẹ nẹ vbe odẹ ahọ e Jọdan sokpan e Jọsua keghi mu otọ ne obọ nọkpa vbe orrie ọghe Jọdan deba ẹwae nekpa.

⁹ Ọ re emwa ni rre ẹwae e Riubẹn, Gad, kevbe odẹ ahọ vbe ẹwae Manasẹ na werriegbe gha rrie owa, iran keghi sẹ ivbi Izrẹl ni dekẹe rae vbe Siailo vbe otọe Kenan, iran na gha rrie otọe Giliad ne ọ re otọe iran, ne iran ya ehia khian ọghe iran zẹ vbene Nọyaẹnmwa la unu e Mosis tama iran.

Ogiukpo Vbe Ọkpẹn Jọdan

¹⁰ Ivbi ẹwae Riubẹn, Gad kevbe odẹ ahọ, vbe ivbi e Manasẹ ghi sẹ Gelilot vbe obọ nii ne ọ mu da orrie vbe Jọdan, iran keghi bọ aka ne mose mose nọkhua ọkpa ye evba vbe ọkpẹn ẹzẹ nii.

¹¹ Ivbi Izrẹl nekpa keghi họn, a keghi tama iran wẹẹ, “Wa danmwẹ ehọ, emwa ni rre ẹwae Riubẹn, e Gad kevbe odẹ ahọ vbe ẹwae Manasẹ bọ aka ye Gelilot vbe ọkpẹn uwu vbe obọ ne ọ re ọghe ima vbe Jọdan.”

¹² Ugbẹn vbe ivbi Izrẹl hia ghi họn ọna, iran hia keghi si egbe koko vbe Siailo ne iran ya gu iran gbinna.

¹³ Ẹre ivbi Izrẹl na gie Finihaz ne ovbi Eliaza ne ohẹn bu ẹwae Riubẹn, e Gad, odẹ ahọ vbe ẹwae Manasẹ vbe otọe Giliad.

¹⁴ Ekhaẹmwẹ igbe ọ re ọ lele Finihaz gha khian, orhiọnkpọkpa ke ẹwae igbe ni rre Izrẹl rre. Dọmwadẹ ọghọe vbe uwu iran kegha re okaẹgbẹe ọghe ẹgbẹe vbe ẹwae nii.

¹⁵ Iran keghi sẹ otọe Giliad, iran na tama emwa Riubẹn, e Gad kevbe odẹ ahọ vbe ẹgbẹe Manasẹ wẹẹ.

¹⁶ Ẹmwẹ ne emwa e Nọyaẹnmwa hia khare ọ re ọna khin, “Vbọzẹ ne uwa na ru emwi dan na ghe Osanobua Izrẹl yi? Te uwa ra sọtẹ ghe e Nọyaẹnmwa vbe ne uwa na bọ aka na ne egbe uwa! Wa i ghi lele irẹn ọvbehe!

¹⁷ Wa ye orukhọ ne a ru vbe Peọ rre, ne e Nọyaẹnmwa na ya egboghogbogho rri emwa hia oya. Te ima ye rrioya ba ẹmwẹ onii na. Orukhọ nii ma he sẹ ra?

¹⁸ Te uwa ghi ra fi iyeke gbe e Nọyaẹnmwa ra? Wa gha sọtẹ ghe Nọyaẹnmwa ẹrẹna, ohu ivbi Izrẹl hia gha mu ẹẹn ẹdẹnakhuẹ.

¹⁹ Rhunmwuda onii nian, a deghẹ otọe uwa ma kei ne a na ga ẹe, wa gberra gha die otọ e Nọyaẹnmwa, ehe ne owa ukpọn ne a dia ọghọe ye. Wa do mu otọ eso vbe ehe ne ima ye. Sokpan, wa ghẹ sọtẹ e Nọyaẹnmwa, ra ima, vbene uwa gha na bọ aka ọghe obọ uwa do deba aka ọghe Nọyaẹnmwa Osanobua mwa.

²⁰ Yerre wẹ Ekani ne ovbi e Zẹra he ne ọ rhie uhi ne a yi ye ẹmwẹ emwi ne a wẹ ne a fuan, a na rri ivbi Izrẹl hia oya yọ. Ẹ i re Ekani ọkpa ọ re ọ wu ba ẹmwẹ orukhọ ẹre.”

²¹ Emwa ẹwae Riubẹn, Gad kevbe odẹ ahọ vbe ẹwae Manasẹ kevbe wanniẹn avbe ọkaẹgbẹe ọghe ẹgbẹe Izrẹl wẹẹ,

²² “Ọmwa ne ọ yan Ẹtin nii ọrọre Osanobua! Rẹn ọrọre e Nọyaẹnmwa! Rẹn rẹn emwi ne ọ ya ima ru emwi na, ọ vbe kei ne uwa vbe rẹn. A deghẹ te ima sọtẹ ighẹ ma ma ghi rhie ekhọe ye ẹmwẹ Nọyaẹnmwa, wa ghẹ sẹ ima rae ye agbọn ọvbehe!

²³ A deghẹ ma yin uyimwẹ iyienhọ ghe Nọyaẹnmwa, ma na vbe bọ aka ọghe obọ mwa ne ima gha zọ ese vbọ, ra ne a ya ẹe gha ru imuohan ọka ra imuohan isara, gie e Nọyaẹnmwa tobọ ẹre rria ima ikhi.

²⁴ Emwi ne ọ ya ima ru ẹẹ ọrọre wẹ, ọ gha sẹ ẹdẹ ne ọ dee, ivbi uwa gha ya gbe ima okan wẹẹ, ‘De emwi ne uwa ya zẹyọ ẹmwẹ e Nọyaẹnmwa ne Osanobua Izrẹl yi?

²⁵ E Nọyaẹnmwa ye Jọdan ye uwu ye ẹkpo ima kevbe uwa.’ Ẹghẹ nii, ivbi uwa ghi da ivbi ima obọ yi wẹ ne iran ghẹ ghi ga e Nọyaẹnmwa.

²⁶ Rhunmwuda onii ọ re ima na bọ aka, ẹ i re ne ima ya gha giẹn ese ra ne a na yo imuohan!

²⁷ Sokpan ne ọ gha re ama ne otu ima eveva ke orre ne ọ gha rre vbe iyeke mwa wẹ te ima ga e Nọyaẹnmwa vbe ekpa ne a na giẹn ese mwa, kevbe ese ne a zọọ, kevbe isara. Te ima wẹ ne a ye ọna ru ẹe ne ivbi uwa ghẹ ya tama ima ẹdẹ ne ọ dee wẹẹ, ‘Ẹmwẹ e Nọyaẹnmwa ma kan uwa.’

²⁸ Iziro mwa nọ wẹẹ, ọ gha ye rriọ ẹdẹ ne akhuẹ, ivbi ma ghi sẹtin kha wẹẹ, ‘Ghe! Avbe erhamwa odede bọ aka zẹ vbene ọghe e Nọyaẹnmwa ye ẹ i re ne a ya ẹe gha giẹn ese ra ne a na zọ ese, sokpan zẹ vbe ama ne otu ima eveva.’

²⁹ Ma i ghẹ mwẹ odẹ ne a ya sọtẹ ghe e Nọyaẹnmwa ra ne ima fi iyeke gbe ẹe nian. Vbe ekpa ne a gha na bọ aka ne a na giẹn emwi imuohan ra emwi imuohan ọka ra izọese. Ma i ra bọ aka ọvbehe gberra aka ọghe Nọyaẹnmwa Osanobua mwa ne ọ rre odaro Owa Ukpọn ne a dia ọghọe.”

³⁰ E Finihaz ne ohẹn kevbe avbe ekhaẹmwẹ emwa nii, igbigbe ni deba ẹre, avbe ọkaẹgbẹe ọghe ẹgbẹe Izrẹl, keghi họn ẹmwẹ ne emwa ẹwae Riubẹn, Gad kevbe Manasẹ tae, ẹko keghi rhiẹnrhiẹn iran.

³¹ E Finihaz ne ovbi Eliaza ne ohẹn keghi tama iran wẹẹ, “Banbanna nian, ma rẹnrẹn wẹ, e Nọyaẹnmwa gu ima rrọọ, rhunmwuda, wa ma sọtẹ ghe e Nọyaẹnmwa, wa kevbe fannọ ivbi Izrẹl hin obọ irrioya ọghe Nọyaẹnmwa rre.”

³² Ẹre Finihaz kevbe avbe ekhaẹmwẹ nii na sẹ emwa Riubẹn kevbe Gad rae ye otọ Giliad, iran na dọlegbe bu ivbi Izrẹl gha rrie Kenan, iran na ya na iyẹn ma iran.

³³ Iyẹn ne iran naẹn keghi yẹ ivbi Izrẹl. Iran keghi rho Osanobua vbe uyi, iran ma ghi dọlegbe guan kan ẹmwẹ ne a mu okuo gha rrie otọ emwa Riubẹn kevbe Gad ne a ya fuẹn ọnrẹn ruan.

³⁴ Emwa Riubẹn kevbe Gad kegha tie aka ni “Osẹe,” iran wẹ rhunmwuda, “Osẹe ọ re nọ ne ima hia wẹ Nọyaẹnmwa ọrọre Osanobua.”