Jọsua 21 - Edo Bible (E Baibol Ẹdo) Version 1996

Ẹvbo Avbe Livai

¹ Avbe ọkaolotu ẹgbẹe avbe Livai keghi bu Eliaza ne ohẹn kevbe Jọsua ne ovbi e Nọn kevbe avbe ọkaolotu avbe ẹgbẹe ẹwae Izrẹl hia gha dee.

² Iran keghi tama iran vbe Siailo vbe otọe Kenan wẹẹ, “E Nọyaẹnmwa tama e Mosis ne ọ tae wẹ ne a viọ ẹvbo ne ima yin, kevbe otọ ne avbe ẹmila na rria vbe ọkpẹn ọnrẹn ne avbe ẹmila ima miẹn ehe na gha rria.”

³ Ivbi Izrẹl keghi viọ avbe ẹvbo na ke oha erria ne ivbi e Livai vbe otọe ọghe iran zẹ vbene e Nọyaẹnmwa khare.

⁴ Avbe ẹgbẹe Kohat ọ re a ka gha munọ ẹvbo na. Ẹgbẹe ne ọ ke uniẹn Errọn ne ohẹn zọ ladian. A keghi munọ ẹvbo iweha ne iran vbe ne ọ sẹ Juda, Simiọn kevbe Bẹnjamin obọ.

⁵ A keghi munọ ẹvbo igbe ne iran ni dekẹe vbe ẹgbẹe Kohat vbe otọe ni sẹ avbe ẹgbẹe ẹwae Ifreim kevbe Dan kevbe odẹ orrie vbe ẹwae Manasẹ obọ.

⁶ A keghi viọ ẹvbo iwera ne ivbi Gẹsiọn vbe otọe ni sẹ avbe ẹgbẹe ni rre ẹwae Isaaka, Asia, Naftali kevbe odẹ ahọ vbe ẹwae Manasẹ obọ vbe Basian.

⁷ A keghi viọ ẹvbo iweva ne ivbi Merari vbe otọe ni sẹ ẹwae Riubẹn, Gad kevbe Zẹbulọn obọ.

⁸ Ivbi Izrẹl keghi yan uta ya ghae avbe ẹvbo na kevbe otọ erria ni rrọọ ne avbe Livai, zẹ vbene Nọyaẹnmwa la unu e Mosis tae.

⁹ Eni avbe ẹvbo ne a viọ vbe ọghe ẹwae Juda kevbe Simiọn ọ re ena khin.

¹⁰ Ne a viọ ne ivbi Errọn, ne ọkpa vbe uwu ẹgbẹe Kohat ni re Livai. Iran ọ re a ka gha ghae na.

¹¹ Iran keghi mu ne iran, Aba (Aba ẹre ọ gha re erha Anak) onii ọ re Hibrọn vbe ẹvbo oke ọghe Juda ke ẹe kevbe otọ erria ni lẹga ẹre.

¹² Sokpan, iran ka mu oha ni rre ẹvbo nii kevbe ẹvbo ni lẹga ẹre ne Kelẹb ne ovbi Jefunẹ nọ ọ gha re ọghọe.

¹³ Avbe ẹvbo ne a munọ ne ivbi Errọn ne ohẹn kegha re: Hibrọn (ẹvbo ne ọmwa ne ọ gbe ọmwa ran lẹ lao) ke ẹe kevbe otọ erria ni rrọọ hia, Libna,

¹⁴ Jati, Ẹstemoa,

¹⁵ Holọn, Debẹ,

¹⁶ Ain, Juta, Bẹt Siemẹs ke iran kevbe otọ erria iran. Ọ kegha re okpẹvbo ihinrọn vbe ọghe ẹwae Juda kevbe Simiọn.

¹⁷ Ẹvbo ne a vbe viọ vbe ẹwae Bẹnjamin kegha re Gibiọn, Gaba.

¹⁸ Anatọt kevbe Almọn deba otọe erria ni rrọ.

¹⁹ Inu okpẹvbo ne a ghi viọ ne avbe ohẹn, ighẹ ivbi Errọn kegha re ọkpa irrọvbugie deba otọe erria ni rrọọ.

²⁰ A keghi viọ ẹvbo eso vbe ẹwae Ifreim ne ivbi e Kohat ni dekẹe vbe avbe ẹgbẹe Livai.

²¹ A keghi viọ Siẹkẹm ne iran ke otọe erria ne ọ rrọọ vbe ẹvbo oke Ifreim (ọkpa vbe ẹvbo ne ọmwa ne ọ gbe ọmwa ran lẹ fi) Gẹzẹ.

²² Kibzaim kevbe Bẹt-horọn deba avbe otọe erria nii rrọọ, eni kegha re okpẹvbo enẹ.

²³ Ẹvbo ne a viọ ne iran vbe ọghe ẹwae Dan kegha re Elteke, Gibatọn.

²⁴ Aijalọn kevbe Gatrimọn deba otọe erria iran. Ehia kegha re ẹvbo enẹ.

²⁵ Ẹvbo ne a vbe viọ ne iran vbe odẹ orrie vbe ẹwae Manasẹ kegha re Tanak kevbe Gatrimọn deba otọe erria iran, enii kegha re okpẹvbo eva.

²⁶ Inu okpẹvbo ni ghi wa sẹ ẹgbẹe Kohat na obọ kegha re igbe deba otọe erria ni rrọọ.

²⁷ Ẹgbẹe Livai ọvbehe ne a tie ẹre Gẹsiọn, okpẹvbo eva vbe odẹ orrie vbe ẹwae Manasẹ kevbe sẹ iran obọ, ena kegha re Golan ne ọ rre Basian (ẹvbo ne ọmwa ne ọ gbe ọmwa ran lẹ fi) Bistera deba otọe erria iran.

²⁸ Ne ọ vbe sẹ iran obọ vbe ọghe ẹwae Isaaka kegha re Kisiọn, Daberat,

²⁹ Jamut kevbe Ẹnganim deba otọe erria iran, ehia kegha re okpẹvbo enẹ.

³⁰ Ẹvbo enẹ ne ọ sẹ iran obọ vbe ọghe ẹwae Asia kegha re Misial, Abdọn,

³¹ Hẹlkat kevbe Rehọb deba otọe erria iran, ehia kegha re okpẹvbo enẹ,

³² ne ọ sẹ iran obọ vbe ẹwae Naftali kegha re Kedẹs ne ọ rre Galili deba otọe erria ne ọ rrọọ (ẹvbo ne ọmwa ne ọ gbe ọmwa ran lẹ fi), Hamọt Dọ, kevbe Katan deba otọe erria ni rrọọ, ehia kegha re okpẹvbo eha.

³³ Ne ọ ghi sẹ avbe ẹgbẹe ughughan ọghe ivbi e Gẹsiọn obọ kegha re okpẹvbo iwera deba avbe otọe erria ni rrọọ.

³⁴ Iran ni ghi dekẹe vbe avbe Livai, avbe ẹgbẹe Merari, ne ọ sẹ iran obọ vbe ọghe ẹwae Zẹbulọn kegha re Jokneam, Kata,

³⁵ Dimọna kevbe Nahalal, deba otọe erria ni rrọọ, ehia kegha re okpẹvbo enẹ.

³⁶ Ne ọ sẹ iran obọ vbe ọghe ẹwae Riubẹn kegha re Bezọ, Jahaz.

³⁷ Kedemọt kevbe Mẹfat, deba otọe erria iran, ehia kegha re okpẹvbo enẹ.

³⁸ Ne ọ sẹ iran obọ vbe ọghe ẹwae Gad kegha re Ramọt ne ọ rre Giliad deba otọe erria ne ọ rrọọ (ẹvbo ne ọmwa ne ọ gbe ọmwa ran lẹ fi) Mahanem,

³⁹ Hesbọn kevbe Jezẹ deba avbe otọe erria ni rrọọ, ehia kegha re okpẹvbo enẹ.

⁴⁰ Ẹvbo ne a ghi ghae ne ẹgbẹe Merari kegha re okpẹvbo iweva.

^41-42 Okpẹvbo ne a ghi viọ ne avbe Livai vbe uwu avbe okpẹvbo ni re ọghe ivbi Izrẹl kegha re eva irrọ vbe ekigbesiyeha, do deba avbe otọe erria ni rrọọ. Dọmwadẹ ọghọe vbe avbe okpẹvbo vbe mwẹ otọe erria ni lẹga ẹre.

Izrẹl Mu Otọe Ni Ya khian Ọghe Iran

⁴³ Erriọ ọre Nọyaẹnmwa na mu ne ivbi Izrẹl otọe ni ne irẹn wa yan ma avbe erha iran odede wẹ rẹn gha mu ne iran. Iran mu otọe nii, iran na yin evba.

⁴⁴ E Nọyaẹnmwa keghi rhie ọfumwegbe ne iran vbe igie enenẹ zẹ vbe ne ọ yan ma avbe erha iran odede. A ma miẹn ọkpa vbe uwu avbe eghian iran hia ne ọ sẹtin da iran obọ yi, rhunmwuda, e Nọyaẹnmwa keghi gie ivbi Izrẹl khọnmiotọ vbe uhunmwu avbe eghian iran hia.

⁴⁵ E Nọyaẹnmwa keghi mu eyan esiesi ne ọ yan ma ivbi Izrẹl hia sẹ.