Jọsua 2 - Edo Bible (E Baibol Ẹdo) Version 1996

E Jọsua Gie Avbe Ọrhẹ Gha Rrie Jẹriko

¹ Ẹre Jọsua na hẹko gie ọrhẹ eva ke agọ Akesia gha khian, ọ tama iran wẹ ne iran ya ghe otọe Kenan nii ghe kpataki e Jẹriko. Iran ghi sẹ ẹvbo nii, iran na la owa ebabotu ọkpa ne a tie ẹre Rehab, iran na di evba ya vbe asọn nii.

² Ọba Jẹriko keghi họn ẹmwẹ na wẹ ivbi Izrẹl eso rri ẹvbo na nasọn ne iran do ba otọe na ghe.

³ Ẹre ọ na gie ne a khama Rehab wẹẹ, “Emwa ni di owa ruẹ ya, te iran rre do gualotọ otọe na hia! Viọ iran ladian!”

^4-6 Sokpan okhuo nii keghi viọ ikpia eveva na, ọ na viọ iran lẹre, rẹn keghi wanniẹn wẹẹ, “Vbe ẹmwata, ikpia eso gele sẹ owa mwẹ, sokpan I ma rẹn ehe ne iran ke rre. Ovẹn ghi dero, vbe a te khui urho ẹvbo vbe asọn, iran keghi vbe kpao. Sokpan I ma nọ iran ehe ne iran rrie.” (Rẹn keghi viọ avbe ọrhẹ nii la ihie, ọ keghi ye erhan kevbe ebe izẹ ni rre evba gue iran ginna otọ.)

⁷ Ugbẹn vbe avbe ukọ ọba ghi kpao nẹ, vbe ẹvbo nii, a keghi khui urho. Iran kegha gualọ avbe ọrhẹ ne ivbi Izrẹl nii ya sẹ ehe ne odẹ na fian ẹzẹ Jọdan rra.

⁸ Emwa nii ghi te lovbiẹ, e Rehab keghi hin odukhunmwu bu iran gha khian.

⁹ Ọ tama iran wẹẹ, “Mẹ rẹnrẹn wẹ e Nọyaẹnmwa mu otọe na ne uwa nẹ, ne I wa tama uwa nian wẹ ohan uwa wa mu emwa hia ni rre otọe na zẹzẹzẹ.

¹⁰ Ma họn vbene Nọyaẹnmwa ka okun Nọ Baa hẹ vbe odaro uwa vbe uwa kpa hin Igipt rre. Ma họn ẹn vbe ne uwa gbele avbe ọba eva ọghe Amọri, Saihọn kevbe Ọg, vbe odẹ ahọ ọghe Jọdan, ke ẹe kevbe ivbiyokuo iran.

¹¹ Ọwarọkpa vbe ima họn ẹn, ohan kegha mu ima, egbe na wọ edọmwadẹ ọghọe. Osanobua uwa, e Nọyaẹnmwa ọrọre Osanobua vbe ẹrinmwi kevbe agbọn.

¹² Banbanna nian, wa yan ma e Nọyaẹnmwa wẹ wa gha mu eyan uwa sẹ, ne uwa gbearoghe ẹgbẹe mwẹ zẹ vbene imẹ gbe aro ghe uwa, wa ghi vbe rhie emwi iyama yọ.

¹³ Wa ghi gie erha mwẹ, iye mwẹ, etẹn mwẹ, ne ikpia kevbe etẹn mwẹ ne ikhuo kevbe ẹgbẹe iran hia miẹn uhunmwu! Wa ghẹ gia gbele ima an.”

¹⁴ Ikpia nii keghi wanniẹn tama rẹn wẹẹ, “Te Osanobua gha miẹn ima uhunmwu vbe ima ma ru vbene u khare. A deghẹ u ma te emwi ne ima ru na ladian, ma gha ye obọ esi mu uẹn vbe e Nọyaẹnmwa a mu otọe na ne ima.”

¹⁵ E Rehab keghi rre owa ne a wa bọ ginna ekẹn ne a gbe ga ẹvbo nii. Rhunmwuda ọnii, ọ keghi ya irri munọ iran la ewindo tuorre.

¹⁶ Okhuo nii keghi tama iran wẹẹ, “Wa lẹ gha rrie ẹvbo uhunmwu oke, a deghẹ ẹi re erriọ, obọ ibiẹka ọba gha vba uwa, wa ghi lẹre la ikpẹdẹ eha iran te do werriegbe rre. Iyeke ọnii, wa sẹtin lele odẹ uwa gha khian.”

¹⁷ Ikpia nii keghi tama rẹn wẹẹ, “Ma gha mu eyan ne u ye ima yan na sẹ.

¹⁸ U ghi danmwẹ ehọ. Ma gha mu okuo sẹ ẹvbo ruẹ, u ghi de irri ne ọ baa na ye ewindo ne u nu ima la tuorre na. U ghi koko avbe erha a, iyuẹ, etuẹn ne ikpia, kevbe ẹgbẹe erha hia ye owa ruẹ.

¹⁹ Ọmwa gha kpao vbe owa ruẹ rre, ọ na la ore, rẹn ọ re ọ ra ya uhunmwu hẹ ẹmwẹ uwu ẹre, a i vbe kae ye ima urhu; sokpan deghẹ emwi ru ọmwaikọmwa ni rre owa ruẹ, urhu ima ọ re ọ ye.

²⁰ Sokpan a deghẹ u ta emwi ne ima ru sin ladian, ma i vbe mu eyan na, ne u ya ima yan sẹ.”

²¹ Okhuo nii keghi wanniẹn wẹẹ, “I kue yọ.” Ọ keghi zẹ iran urrie, iran keghi kpao. Ọ keghi de irri ne ọ baa nii ye ewindo.

²² Rhunmwuda ọnii, avbe ọrhẹ nii keghi la uhunmwu oke ya lẹre. Ibiẹka ọba keghi ya ikpẹdẹ eha gualọ iran lele iwewe ẹvbo nii hia, iran ma miẹn ọmwa rhọkpa, rhunmwuda ọnii, iran na dọlegbe gha rrie Jẹriko.

²³ Iyeke ọnii avbe ọrhẹ eva na keghi ke uhunmwu oke tuorre, iran na fian ẹzẹ rra, iran na bu e Jọsua gha khian ya na iyẹn emwi ni sunu hia ma rẹn.

²⁴ Iran tama rẹn wẹẹ, “Aro ima dae wẹ e Nọyaẹnmwa mu ẹvbo nii hia ne ima nẹ. Afianma ima wa fian iran hia ni rre ẹvbo nii.”