Jọsua 19 - Edo Bible (E Baibol Ẹdo) Version 1996

Otọe Ne A Mu Ne Simiọn

¹ Otọe ne ọ re ukpogieva ne a gha re kegha re ọghe ẹgbẹe ẹwae Simiọn. Otọe ọghọe kegha rre adesẹneva otọ ne a mu ne Juda.

² Usun ẹvbo ni rrọọ kegha re Biẹsiẹba, Siẹba, Molada,

³ Haza Siual, Bala, Ezẹm,

⁴ Ẹltelad, Betul, Họma,

⁵ Ziklag, Bẹt Makabot, Haza Susa,

⁶ Bẹt Liboat kevbe Siaruhen: okpẹvbo iwera deba ẹvbo ni kọnkọn ni rrọọ.

⁷ Avbe ẹvbo ni ghi vbe deba ena kegha re Ain, Rimọn, Etẹ kevbe Asian: okpẹvbo enẹ deba ẹvbo ni kọnkọn ni rrọọ.

⁸ Ẹvbo ni lẹga avbe okpẹvbo nii keghi deba ẹre rhinrin ya sẹ Balat Biẹ, ra Rama ọghe odẹ ekẹn. Ena ọrọre otọe ne ọ sẹ avbe ẹgbẹe ni rre ẹwae Simiọn obọ ne ọ gha re ọghe iran.

⁹ Ne ọ sẹ ọ re obọ keghi gha re ne a ka ba iwewe Juda. Otọe ọghe Juda keghi kpọlọ sẹẹ vbene ọ te ke ne ọ gha ye, ọ re a na fian ne ẹwae Simiọn vbe nene otọ.

Otọe Ne A Mu Ne Zebulọn

¹⁰ Oghae ne ogieha kegha re ne a mu ne ẹgbẹe ni rre ẹwae Zebulọn. Otọe ne ọ sẹ iran obọ keghi ya sẹ Sarid.

¹¹ Uwu ẹre keghi la ghe odẹ ekẹn ya sẹ Marial, ọ na vbe dekan Dabesiẹt kevbe ẹzẹ ne ọ rre ahọ ọghe Jokneam.

¹² Ọ kevbe ya sẹ ọkpẹn Kislotabọ vbe odẹ ahọ vbe obọ nọkpa ọghe Sarid. Ọ kevbe la ghe Debe-rat ya sẹ Jafia.

¹³ Ọ kevbe lele odẹ ahọ ke evba kpao ya sẹ Gat Hẹfa kevbe Etkasin, ọ na vbe laghe odẹ Niah vbe odẹ ne ọ rrie Rimọn.

¹⁴ Vbe odẹ okuọ, uwu ẹre keghi la ghe odẹ Hanatọn, ọ na ya fo vbe Iya lftahẹl.

¹⁵ Ẹvbo ni deba ẹre kegha re Kata, Nahalal, Simrọn, Idala kevbe Bẹtlẹhẹm, okpẹvbo iweva kevbe ẹvbo ni lẹga iran.

¹⁶ Avbe okpẹvbo na kevbe ẹvbo ni lẹga iran kegha re otọ ne ọ sẹ ẹgbẹe ni rre ẹwae Zẹbulọn obọ ne ọ gha re ọghe iran.

Otọe Ne Ọ Sẹ Isaaka Obọ

¹⁷ Oghae ne ogienẹ kegha re ne a ghae sẹ ẹgbẹe ni rre ẹwae Isaaka obọ.

¹⁸ Ehe ne ọ lae keghi ya sẹ Jezrẹl, Kiesulot, Siunẹm,

¹⁹ Hafareim, Siọn, Anaharat,

²⁰ Rabit Kisiọn, Ebẹz,

²¹ Remẹt, Ẹnganim, Enhada kevbe Bẹtpazẹz.

²² Uwu ẹre kevbe ya sẹ Tabọ, Siahazuma kevbe Bẹt Siemẹs, ọ kevbe ya fo vbe Jọdan. Ọ kegha re okpẹvbo enẹ irrọvbugie kevbe ẹvbo ni lẹga iran.

²³ Avbe okpẹvbo na kevbe otọ ni lẹga iran kegha re otọe ne ọ sẹ ẹgbẹe ni rre ẹwae Isaaka obọ ne ọ gha re ọghe iran.

Otọe Ne A Mu Ne Asia

²⁴ Oghae ne ogisẹn kegha re ne a mu ne avbe ẹgbẹe ne rre ẹwae Asia.

²⁵ Usun ehe ni rrọọ kegha re Hẹlkat, Hali, Betẹn, Aksiaf,

²⁶ Ala Mẹlẹk, Amad, kevbe Misial. Vbe odẹ orrie, ọ na ya sẹ Kamẹl kevbe Sihọ Libnat.

²⁷ Ọ ghi gberra ghe odẹ ahọ, uwu ẹre keghi ya sẹ Betdagọn, ọ kevbe sẹ Zẹbulọn ke Iya Iftahẹl vbe odẹ okuọ vbe a gha rrie Betẹmek kevbe Neiẹl. Ọ keghi ya laghe odẹ okuọ ya sẹ Kabul.

²⁸ Ebrọn, Rehọb, Hamọn, kevbe Kana rhinrin ya sẹ Saidọn.

²⁹ Uwu keghi laghe odẹ Rama, ọ keghi ya sẹ Taia ne ẹvbo ne a gbe ekẹn gaa, ọ na ghi laghe odẹ Hosa, ọ na ya fo ye Okun Meditẹrrenian. Usun avbe ẹvbo ni rrọọ kegha re: Mabalab, Akzib.

³⁰ Uma, Afẹk, kevbe Rehọb, okpẹvbo evayanugie kevbe avbe ẹvbo ni lẹga iran.

³¹ Avbe okpẹvbo na kevbe avbe ẹvbo ni lẹga iran kegha rre otọe ni sẹ avbe ẹgbẹe ni rre uniẹn Asia obọ ne ọ gha re ọghe iran.

Otọe Ne A Mu Ne Naftali

³² Oghae ne ogiehan kegha re ne a mu ne avbe ẹgbẹe ni rre ẹwae Naftali.

³³ Uwu ẹre ke Helef vbe ẹzi okan ne ọ rre Zananim kpao, kevbe Adaminekẹb kevbe Jamnil kpao ya sẹ Lekum, ọ keghi ya khui uhunmwu vbe Jọdan.

³⁴ Uwu nii keghi vbe la ghe odẹ orrie ya sẹ Aznot Tabọ, ọ keghi ke evba kpao gha rrie Hukok, ọ kevbe sẹ Zẹbulọn vbe odẹ ekẹn, Asia vbe odẹ orrie kevbe Juda vbe odẹ ahọ, vbe Jọdan.

³⁵ Avbe ẹvbo ne a gbe ekẹn ga kegha re Zidim, Ze, Hamat, Rakat, Kineret,

³⁶ Adama, Rama, Hazọ.

³⁷ Kedẹs, Ẹdrẹi, Ẹnhazọ,

³⁸ Yirọn, Migdalẹl, Họrẹm, Betamat kevbe Bẹt Siemẹs: ena kegha re okpẹvbo ọkpa irrọ vbe ugie deba ẹvbo ni lẹga iran.

³⁹ Avbe okpẹvbo na kevbe ẹvbo ni lẹga iran kegha re otọ ne a mu ne avbe ẹgbẹe ni rre ẹwae Naftali ne ọ gha re ọghe iran.

Otọe Ne A Mu Ne Dan

⁴⁰ Oghae ne ogihinrọn kegha re ne a mu ne avbe ẹgbẹe ni rre ẹwae Dan.

⁴¹ Usun avbe ehe ne ọ lae kegha re Zora, Estao, Isiẹmẹs,

⁴² Sialbim, Aijalọn, Itla,

⁴³ Ẹlọn, Timna, Ẹkrọn,

⁴⁴ Elteke, Gibẹtọn, Baalat,

⁴⁵ Jehud, Bẹnẹberak, Gatrimọn,

⁴⁶ Mejakọn kevbe Rakọn deba otọ ne ọ mu aro da Jopa.

⁴⁷ Ugbẹn vbe otọ emwa Dan ghi fe iran, iran keghi mu igbinna gie Lais, iran keghi khọn rẹn mu otọ iran, iran na gbele emwa ni rrọọ hia a. Iran keghi ya ẹe khiẹn ọghe iran, iran na yin ẹnrẹn, iran na fi eni ẹvbo nii hin Lais rre gha tie ẹre Dan, iran na he ẹre eni ni gie Dan ne erha iran odede.

⁴⁸ Avbe okpẹvbo na, deba avbe ẹvbo ni lẹga iran ọ re ọ gha rre otọ ne ọ sẹ avbe ẹgbẹe ni rre ẹwae Dan obọ ne iran yae khian ọghe iran.

Oghae Ne Okiekie Otọe Ni

⁴⁹ Ivbi Izrẹl ghi ghae otọe nii hia nẹ, iran keghi vbe mu eso vbọ ne Jọsua ne ovbi Nọn ne ọ gha re ọghọe.

⁵⁰ Iran keghi mu otọe ne ọ nọ rẹn ne ẹẹn zẹ vbe ne Nọyaẹnmwa khare, ena ọre Timnat Sera ne ọ rre Ifreim ne ẹvbo oke, ọ keghi dọlegbe bọ ẹvbo nii, ọ na gha rre evba.

⁵¹ Emwa ni ghae otọe na kegha re Eliaza ne ohẹn, e Jọsua ne ovbi e Nọn kevbe avbe eniwanrẹn ivbi Izrẹl, iran na ọ re ọ yan uta ya ghae otọe nii vbe Silo vbe ne iran na ka nọ ọn e Nọyaẹnmwa nẹ vbe onurho Owa Ukpọn e Nọyaẹnmwa. Erriọ iran ya ghae otọe nii fo.