Jọsua 17 - Edo Bible (E Baibol Ẹdo) Version 1996

Odẹ Orrie E Manasẹ

¹ Rhunmwuda ighẹ Manasẹ ọrọre ovbi e Josẹf ne ọdiọn, a keghi fian vbe otọe ni mu ne ẹgbẹe Manasẹ, e Makiẹ ne erha Giliad ọ re ọ gha re ovbi e Manasẹ ne ọdiọn, ọ kevbe re ovbiyokuo, rhunmwuda ọnii, a keghi mu Giliad kevbe Basian ne ẹẹn.

² A keghi vbe gha otọ ne avbe ẹgbẹe Manasẹ nekpa obọ vbe avbe ivbi ẹzẹ, Abiẹzẹ, Helẹk, Asriẹl, Siẹkẹm, Hẹfa kevbe Siẹmida. Ena ọ re ọ gha re ivbi e Manasẹ, ne ovbi e Josẹf. Iran kevbe gha re ekaẹgbẹe.

³ E Zẹlofehad ne ovbi Hẹfa ne ovbi Giliad ne ovbi Makiẹ ne ovbi Manasẹ ma biẹ ọmọ okpia, emọ ikhuo ọkpa ọ re ọ biẹlẹe. A kegha tie iran Mala, Noa, Hogla, Milka kevbe Tẹza.

⁴ Iran keghi bu Eliaza ne ohẹn gha dee kevbe Jọsua ne ovbi e Nọn kevbe avbe ọkaolotu, iran na kha wẹẹ, “E Nọyaẹnmwa tama Mosis wẹ ne ọ ghae vbe otọ nii ne ima kevbe avbe etẹn ima ne ikpia ne ọ gha re ọghe ima.” Rhunmwuda onii zẹ vbene Nọyaẹnmwa khare, a ke gha otọ ne iran kevbe etẹn iran ne ikpia ne ọ gha re ọghe iran.

⁵ Rhunmwuda ọnii, a keghi miẹn wẹ oghae igbe ọ re ọ ghi sẹ Manasẹ obọ deba Giliad kevbe Basian ni rre obọ ahọ ọghe Jọdan.

⁶ Rhunmwuda ighẹ a ghae otọe sẹ ivbi e Manasẹ ne ikhuo obọ zẹ vbene a vbe ghae ne ivbi ẹre ni ikpia. A keghi mu otọ Giliad ne avbe ivbi Manasẹ nekpa.

⁷ Otọe Manasẹ keghi ke Asia ya sẹ Mikmetat vbe odẹ ahọ ọghe Siẹkẹm. Ọ keghi vbe ya la odẹ ekẹn ya sẹ ehe ne avbe Ẹntapua ye.

⁸ E Manasẹ ọ re ọ yan otọ Ẹntapua, sokpan okpẹvbo ne a tie ẹre Tapua, ne ọ rre uwu, ivbi Ifreim ọ re ọ yan rẹn.

⁹ Uwu keghi ya la ovbi ẹzẹ Kana. Avbe ẹvbo na ni rre odẹ ekẹn, Ifreim ọ re ọ yan iran, iran rhe re usun ẹvbo otọ Manasẹ. Eke ne otọe Manasẹ lae keghi lele odẹ okuọ ẹzẹ nii, ọ na ya khui, ehe ne ọ sẹe vbe odẹ orrie kegha re Okun e Meditẹrrenian.

¹⁰ Ifreim kegha rre odẹ ekẹn, e Manasẹ kegha rre odẹ okuọ. Iran keghi ya sẹ Asia vbe odẹ okuọ kevbe Isaaka vbe odẹ ne ọ laghe ekẹn.

¹¹ E Manasẹ kevbe yanBẹt-Sian kevbe ẹvbo ni lẹga ẹre vbe otọe Isaaka kevbe Asia kevbe deba emwa ni rre Ibleam vbe Dọ (ẹvbo ne ọ rre eghute ọ re ọ na khin) ne ọ rre Ẹndọ, Tanak, Mẹgido kevbe avbe ẹvbo ni lẹga iran.

¹² Sokpan ivbi e Manasẹ ma sẹtin khulo emwa ni rre avbe ẹvbo nii ladian, ẹre avbe emwa Kenan na gha rre evba.

¹³ Uhin vbe ivbi Izrẹl vbe wegbe sayọ nẹ, iran ma wa khulo emwa Kenan ladian fo, sokpan iran na ya iran gha ru enegbe iran.

Ifreim Kevbe Ivbi E Manasẹ Ni rre Odẹ, Orrie, Nọ Otọe Ne Ọ Kpolo Sẹ Ayọ

¹⁴ Ivbi e Josẹf keghi tama e Jọsua wẹẹ, “Vbe a na miẹn hẹ yi ighẹ obọ ọkpa ọ re u mu ne ima gha ye vbe otọe nii ne ọ gha re ọghe ima? Ma wa bun ẹsẹse rhunmwuda, e Nọyaẹnmwa fiangbe ima.”

¹⁵ E Jọsua keghi wanniẹn wẹẹ, “A deghẹ wa bun vberriọ ighẹ ẹvbo oke ọghe Ifreim ma gua uwa, wa la ghe uwu ẹgbo khekherriọ ne uwa ya fie ne egbe uwa vbe otọ avbe emwa Pẹriz kevbe Refeim.”

¹⁶ Ivbi e Josẹf keghi kha wẹẹ, “Ẹvbo oke ma sẹ ne ima sokpan avbe emwa Kenan ni rre otọe ne ọ rriẹe, mwẹ ikẹkẹ okuo ematọn. Emwa Kenan ni rre Bẹt-Sian kevbe ẹvbo ni lẹga iran vbe mwẹ ọnrẹn, erriọ iran ni rre Iya Jezrẹl vbe ye.”

¹⁷ E Jọsua keghi tama ẹwae Ifreim kevbe Manasẹ ne odẹ orrie wẹẹ, “Wa gele wa bun ẹsẹse, wa kevbe mwẹ ẹtin ẹsẹse. Ọ gha gberra oghae ọkpa ne ọ gha sẹ uwa obọ.

¹⁸ Wa ọ re ọ khian yan ẹvbo oke. A gha rhe miẹn wẹ ẹgbo nọ, wa gha fie ẹre ne uwa yae khian ọwua ke obọ ọkpa ya sẹ ehe ne ọ sẹe vbe obọ nọkpa. Zẹ vbene ọ kaẹn ivbi e Kenan, wa gha khulo iran ladian, a gha rhe miẹn wẹ iran mwẹ ikẹkẹ okuo ematọn, iran rhe vbe mwẹ ẹtin.”