Jọsua 16 - Edo Bible (E Baibol Ẹdo) Version 1996

Ako Otọe Ne A Mu Ne Ifreim Kevbe Manasẹ Ne Odẹ Orrie

¹ Otọ ne a mu ne ivbi e Josẹf keghi ke Jọdan vbe ọkpẹn Jẹriko vbe odẹ ahọ ẹzẹ ọghe Jẹriko gha rrie uwu ato. Ọ keghi ke Jẹriko ya sẹ ẹvbo oke rhinrin ya sẹ Bẹtẹl,

² ọ keghi ke Bẹtẹl gha rrie Luz, ọ na la evba gha rrie Atarọt Ada ehe ne avbe Aki gha ye.

³ Ọ keghi laghe odẹ orrie gha rrie asẹ Jafletit rhinrin ya sẹ odẹ ototọ Bẹt-horọn. Ọ na ke evba gha rrie Gẹzẹ, ọ na ya khui uhunmwu vbe Okun Meditẹrrenian.

⁴ Ivbi e Josẹf, ẹwae Manasẹ kevbe Ifreim ẹre avbe otọe na sẹ ọre obọ ne ọ gha re ọghe iran.

Ifreim

⁵ Ehe ne ọ gha otọ avbe ẹgbẹe Ifreim la ọ re ena khin: ehe ne otọ iran lae vbe obọ ahọ keghi re Atarọt Ada rhinrin ya sẹ Bẹt-horọn ne ọ ke odukhunmwu.

⁶ Ọ na ke evba gha rrie Okun Meditẹrrenian, e Mikmetat kegha rre iran odẹ okuọ vbe obọ ahọ vbọ, ehe ne ọ lae keghi la ghe odẹ Taanat Siailo, ọ na la obọ ahọ fian ẹẹn gberra ghe Janoa.

⁷ Ọ na vbe ke Janoa gha rrie Atarọt ke Naara. Ọ keghi sẹ Jẹriko, ọ na ya khui uhunmwu vbe Jọdan.

⁸ Ehe ne ọ lae vbe obọ orrie keghi la Tapua gha rrie ẹzẹ Kana, ọ na khui uhunmwu vbe Okun Meditẹrrenian. Ọnọna ọrọre otọ ne a mu ne avbe ẹgbẹe ni rre ẹwae Ifreim ne ọ gha re ọghe iran.

⁹ Deba avbe okpẹvbo kevbe avbe igue ni gha rre uwu otọe Manasẹ ne a viọ ne emwa Ifreim.

¹⁰ Sokpan, iran ma khulo ivbi e Kenan, iran ye gu ivbi Ifreim rrọọ do sẹ ẹdẹnẹrẹ na sokpan te a ghi ya ẹtin vbe iwegbe ya iran gha winna zẹ vbe eviẹn.