Jọsua 14 - Edo Bible (E Baibol Ẹdo) Version 1996

Vbene A Ya Ghae Otọe Ne Ọ Rre Odẹ Ekẹn Jọdan Hẹ

¹ Ọna ọrọre vbene a ya ghae otọe nẹ ivbi Izrẹl hẹ vbe Kenan vbe odẹ ekẹn Jọdan. Eliaza ne ohẹn, e Jọsua ne ovbi e Nọn kevbe ọkaolotu avbe ẹgbẹe ni rre Izrẹl ọ re ọ ghae nene otọ ne emwa nii.

² Uta ne ọ huanrẹn nii ọ re a ya ghae otọe ne ẹwae ihinrin kevbe obọ ọkpa vbe a wa ẹwae ọkpa ye eva nii, zẹ vbe ne Nọyaẹnmwa tama Mosis.

^3-4 E Mosis ka mu otọ eso ne ẹwae eva vbe ukhiọnmwẹ vbe odẹ ahọ ọghe Jọdan, sokpan ọ ma mu otọe ne avbe Livai. A keghi ghae uniẹn Josẹf ye ẹwae eva, ena ọre Manasẹ kevbe Ifreim. A ma mu ne avbe Livai vbe otọe nii, ye ihe ọnii, a keghi mu avbe okpẹvbo ne iran dia, oha kevbe gha rrọọ ne avbe ẹmila kevbe ohuan iran.

⁵ Ivbi Izrẹl keghi ghae otọe nii, zẹ vbe ne Nọyaẹnmwa tama Mosis.

A Mu Hibrọn Ne Kelẹb

⁶ Ivbi ẹwae Juda keghi bu e Jọsua gha dee vbe Gilgal, e Kelẹb ne ovbi Jefunẹ ne ovbi e Keniz keghi tama rẹn wẹẹ, “U ye rre ẹmwẹ ne Nọyaẹnmwa tama Mosis ne ọmwa Osanobua vbe ekpa imẹ vbe ruẹ vbe Kedẹs Bania.

⁷ Ukpo iyeva ọ re I gha ye vbe Mosis ne ọguọmwadia e Nọyaẹnmwa gie mwẹ ke Kedẹs Bania gha khian ne I ya ba otọe nii ghe. I na werriegbe do na iyẹn ne imẹ yayi ighẹ ọ re emwata ma rẹn.

⁸ Sokpan, emwa ni lele mwẹ gha khian keghi zẹ afianma ye emwa egbe, mẹ keghi ye ẹko ata họn ẹmwẹ ne Nọyaẹnmwa Osanobua mwẹ.

⁹ E Mosis keghi yan ma mwẹ wẹẹ, ‘Rhunmwuda ne u na họn ẹmwẹ e Nọyaẹnmwa Osanobua mwẹ otọe ne u khian lele hia gha re ọghuẹ kevbe ọghe ivbuẹ.’

¹⁰ E Kelẹb keghi ye rhie tẹe wẹẹ, ‘Ghe nian, ukpo isẹn yan iyeva ọ re ọ ghi ye na ne Nọyaẹnmwa ta ẹmwẹ na ma Mosis. Ọnii keghi re ẹghẹ ne ivbi Izrẹl na gha la ato gberra, e Nọyaẹnmwa keghi ye sẹ mwẹ rae ye agbọn ke ẹghẹ nii gha dee. U ghi ghe mwẹ nian, ukpo isẹn yan iyenẹ ọre I ghi ye na.

¹¹ Te I wa ye wegbe ẹrẹna zẹ vbene I gha ye ẹghẹ ne Mosis na gie mwẹ gha khian. Te I ye wegbe sẹ ne ọ gha sẹtin yo okuo kevbe emwikemwi ọvbehe ne I gha ru.

¹² Rhunmwuda ọnii nian, mu ẹvbo uhunmwu oke ne e Nọyaẹnmwa ta ẹmwẹ ọnrẹn ma mwẹ vbe ẹdẹ ne ima vbe emwa mwẹ do na iyẹn mẹ. Ma tama uwa ẹghẹ nii wẹẹ avbe Anakim ne arhuanran rre evba vbe uwu ẹvbo nọkhua ne a gbe ekẹn gaa. Ọ gha ke ẹe, e Nọyaẹnmwa gha rrọọ ya ba mwẹ, I ghi khulo iran ladian zẹ vbene, e Nọyaẹnmwa khare.’ ”

¹³ E Jọsua keghi na erhunmwu ne Kelẹb ne ovbi Jefunẹ, ọ na mu Hibrọn ne ẹẹn ne ogha re ọghọe.

¹⁴ Ivbi Kelẹb ne ovbi Jefunẹ ne ọmwa Keniz ọ re ọ ye yan Hibrọn rhunmwuda, rẹn keghi ya ẹko ata họn ẹmwẹ Nọyaẹnmwa ne Osanobua Izrẹl.

¹⁵ Vbe ọ te se ẹghẹ na, Aba ne Okpẹvbo ọ re a te tie Hibrọn (Aba ọ re ọ gha re ne ọ kpọlọ sẹ vbe uwu avbe Anakim.) Ọfumwegbe keghi gha rre otọe nii.