Jọsua 13 - Edo Bible (E Baibol Ẹdo) Version 1996

Avbe Otọe Ne A Ma He Khọn Mu

¹ E Jọsua keghi wa khian ọmaẹn ẹsẹse, e Nọyaẹnmwa keghi tama rẹn wẹẹ, “U khian ọmaẹn nẹ ẹsẹse, sokpan avbe ẹvbo ne a ra ye khọn wa ye bun.

² Ena keghi re: otọe Filistin hia kevbe otọe Gẹsiọ hia,

³ (do deba otọe Avim hia, gha rrie odẹ ekẹn otọe ne ọ ke ivbi ẹzẹ Sihọ kpao vbe ehe ne otọe Igipt Lae gha rrie odẹ okuọ ya sẹ ehe ne otọe Ẹkrọn lae, a keghi ka ena ba otọe Kenan; iran ni khaemwisẹ yan avbe Filistin kegha rre Gaza, Asdọd. Askẹlọn, e Gat kevbe Ẹkrọn.)

⁴ Ghe odẹ ekẹn, ẹvbo avbe emwa Kenan hia, kevbe Miara (ne ọ re ọghe emwa Saidọn) ya sẹ Afẹk, ya sẹ ehe ne otọe Amọri lae.

⁵ Otọe emwa Gẹbal, otọe Lebanọn ya sẹ odẹ ahọ, kevbe Balgad ne ọ rre ototọ Oke Hẹmọn kpa ya sẹ ehe ne Hamat Pas na suẹn.

⁶ Emwa Saidọn hia ni rre ẹvbo uhunmwu oke keghi rre ne usun, iran ni rre ẹkpo Oke Lebanọn kevbe Misrefọt Maim. I gha khulo iran ladian vbene ivbi Izrẹl ya nana sikẹ odaro. U ghi ghae otọe nii ne ivbi Izrẹl ne ọ gha re ọghe iran zẹ vbe ne I ta ma ruẹn wẹ ne u ru.

⁷ Banbanna nian, gha otọe na ne avbe ẹwae ihinrin nii, kevbe obọkpa vbe ẹwae Manasẹ, ne iran viọ ya khian ọghe iran.”

Vbene A Ghae Otọe Ne Ọ Rre Odẹ Ahọ Jọdan Hẹ

⁸ A keghi mu otọe ne ẹwae Riubẹn, Gad kevbe obọkpa vbe ẹwae Manasẹ, vbe odẹ ahọ ọghe Jọdan. Ọnii ọ re Mosis ne ọguọmwadia e Nọyaẹnmwa mu ne iran.

⁹ Otọe iran keghi ke Aroẹ (vbe ehọ Iya Anọn) kpao deba ẹvbo ne ọ rre adesẹneva iya nii, kevbe otọe oke ne ọ rriẹe ọghe Mẹdeba hia ya sẹ Dibọn.

¹⁰ Otọe hia ne Saihọn ne ọba emwa Amọri kha yan (ọmwa ne ọ gha rre Hesbọn) rhinrin ya sẹ ehe ne otọe Amọri sẹe, keghi rre uwu ẹre.

¹¹ E Giliad keghi vbe rrọ deba iwewe ne emwa Gẹsiọ kevbe emwa Makati ye, Oke Hẹmọn hia, deba Basian hia ya sẹ Saleka.

¹² Kevbe otọe Ọg ne ọ gha khaemwisẹ vbe Astarrọt kevbe Ẹdrẹi (Ọg ọkpa ọrọre ne a ghi fi yi vbe Refeim). E Mosis ka khọn iran na nẹ, ọ na vbe khulo iran ladian.

¹³ Sokpan, ivbi Izrẹl ma khulo emwa Gẹsiọ kevbe Makati ladian. Te iran na ye rre Izrẹl.

¹⁴ E Mosis ma gha otọ ne ẹwae e Livai, sokpan, iran ghi gha viọ emwi ne a ya zọ ese ne a giẹn gie e Nọyaẹnmwa, enii ghi gha re ọghe iran zẹ vbene Nọyaẹnmwa tama e Mosis.

Otọe Ne A Mu Ne Riubẹn

¹⁵ E Mosis keghi mu otọ eso ne ẹgbẹe avbe ẹwae Riubẹn ne ọ gha re ọghe iran.

¹⁶ Otọe iran keghi ke Aroẹ kpao (vbe ehọ Iya Anọn) kevbe ẹvbo ne ọ rre adesẹneva iya nii, kevbe avbe otọ ni rriẹe hia ni lẹga Mẹdeba.

¹⁷ E Hesbọn vbe rrọọ kevbe avbe ẹvbo hia ni rre otọe ne ọ rriẹe nii, avbe Dibọn, Bamot, Baal, Bẹt Baalmiọn.

¹⁸ E Jahaz, e Kedemọt, Mẹfat.

¹⁹ E kirriatam, Sibma, e Zeresiaha ne ọ rre oke ne ọ rre uwu iya.

²⁰ Betpeọ, ehanhan Oke Pisga, Betgiesimọt.

²¹ Kevbe avbe ẹvbo ọvbehe ni rre ehe ne ọhẹnhẹn nii, avbe ẹvbo Saihọn ne ọba Amọri ne ọ rre Hesbọn. E Mosis keghi khọn rẹn ke ẹe kevbe iran ni ka khaemwisẹ vbe Midian: avbe Evi e Rekẹm, e Zọ, e Họ kevbe Reba. Ena hia kegha rre otọe nii. Saihọn ọ re ọ gha khaemwisẹ yan iran.

²² Usun emwa nii ivbi Izrẹl gbele ọ re ọ ye ighẹ Balam ne ọba, ovbi Beọ.

²³ E Jọdan ọ re ọ gha re uwu ọghe ẹwae Riubẹn. Enena ọ re ọ gha re ẹvbo kevbe agbọn ẹvbo ne a viọ ne ẹgbẹe ni rre ẹwae Riubẹn ne ọ gha re ọghe iran.

Otọe Ne A Mu Ne Gad

²⁴ E Mosis keghi vbe mu ihe eso vbe otọe nii ne avbe ẹgbẹe ni rre ẹwae e Gad ne ọ gha re ọghe iran.

²⁵ Otọe iran keghi re Jaza kevbe okpẹvbo ni rre Giliad hia, obọkpa vbe otọe emwa Amọn ya sẹ Aroẹ ne ọ rre odẹ ahọ ọghe Raba.

²⁶ Otọe iran keghi ke Hesbọn ya sẹ Hamat Mispa, Bẹtonim kevbe Mahanem ya sẹ ehe ne Lodeba lae.

²⁷ Ehe ne ọ vbe rrọ vbe iya e Jọdan keghi re Betharam, Betnimra, Sukọt kevbe e Safọn, ehe ne ọ ghi ke ẹe vbe otọe arriọba Saihọn ne ọba Hesbọn. Ehe ne uwu lae keghi re Ẹzẹ Jọdan wa gha rrie odighi vbe odẹ okuọ, otọe na ke ye vbe laghe odẹ ahọ.

²⁸ Ena kegha re ẹvbo kevbe agbọn ẹvbo ne a viọ ne ẹgbẹe ni rre ẹwae ọghe Gad ne ọ gha re ọghe iran.

Otọe Ne A Mu Ne Odẹ Ekẹn Manasẹ

²⁹ E Mosis keghi ka mu ihe eso vbe otọe nii ne obọkpa vbe ẹwae Manasẹ ne ogha re ọghe iran.

³⁰ Otọe iran keghi ke Mahanem kpao kevbe otọe arriọba Ọg hia, ọba Basian deba okpẹvbo iyeha ne ọ re ọghe Jea vbe Basian.

³¹ Obọ ọkpa vbe Giliad kevbe rrọọ, do deba Astarrọt kevbe Ẹdrẹi, avbe okpẹvbo ni rre arriọba Ọg vbe Basian. A keghi viọ ena ne obọ ọkpa vbe ẹgbẹe ivbi e Makeẹ ne ovbi Manasẹ.

³² Erriọ ọ re Mosis ghae otọe ne ọ rre odẹ ahọ ọghe Jẹriko kevbe Jọdan, vbe otọ ne ọ rriẹe ọghe Moab.

³³ Sokpan, e Mosis ma mu otọe ne ẹwae avbe Livai ne ọ gha re ọghe iran. Ọ keghi tama iran wẹ oghae vbe emwi ne a ya mu ohan gie e Nọyaẹnmwa Osanobua ọghe Izrẹl ọrọre emwi ne iran ra gha mwẹ.