Jọsua 12 - Edo Bible (E Baibol Ẹdo) Version 1996

Avbe Ọba Ne Mosis Khọn Miẹn Re Otọ

¹ Ivbi Izrẹl keghi khọn, iran na vbe yin otọ ne ọ rre odẹ ahọ ọghe Jọdan kevbe Iya ọghe Anọn kpao ya sẹ Iya ọghe Jọdan kevbe Oke Hẹmọn. Vbe odẹ okuọ avbe ọna ne ivbi Izrẹl khọn miẹn ẹre otọ ena khin.

² Saihọn ọba avbe ivbi Amọri ne ọ gha rre Heshọn, otọ arriọba ẹre keghi ke Aroẹ vbe ọkpẹn Iya ọghe Anọn, kevbe ke adesẹneva iya ni kpao, rhinrin ya sẹ Ẹzẹ Jabọk, ehe ne otọ Ammọn sẹe (ena kegha re vbe a wa otọe Gilian ye ihe eva).

³ Ke odẹ ahọ Iya Jọdan kevbe odighi e Galili ghe odẹ Bẹt Gisi-mot, (odẹ ahọ ọghe Okun Nọwu) ghe odẹ ekẹn ya sẹ ẹzi Oke Pisga.

⁴ Iran keghi vbe khọn Ọg miẹn ẹre otọ, rẹn ne ọba Basan ne ọ gha re ne okiekie vbe avbe Refeim, Astarrọt kevbe Ẹdrẹi ọ re ọ gha ye khaemwisẹ.

⁵ Otọ arriọba ẹre keghi sẹ Oke Hẹmọn, Saleka kevbe Basan hia, rhinrin ya sẹ Gẹsiọ kevbe uwu avbe Maka deba obọkpa vbe Giliad rhinrin ya sẹ otọ Saihọn ne ọba Hesbọn.

⁶ E Mosis kevbe ivbi Izrẹl keghi khọn iran. Ẹre Mosis ne ọguọmwadia e Nọyaẹnmwa na mu otọ iran ne avbe Riubẹn, Gad kevbe obọkpa vbe ẹwae Manasẹ ne ọ gha re ọghe iran.

Avbe Ọba Ne Jọsua Khọnrẹn

⁷ E Jọsua kevbe ivbi Izrẹl keghi khọn avbe ọba hia ni rre otọe orrie ọghe Jọdan kevbe Balgad vbe Iya Lebanọn ya sẹ Oke Halak vbe ọkpẹn Idọm. E Jọsua keghi ghae otọe na ne avbe ẹwae nii, ọ na viọ ẹre ne iran zẹ vbe emwi obọ iran ọghe etẹbitẹ.

⁸ Avbe otọ ni de ba ẹre keghi re ẹvbo oke, otọ uye Iya Jọdan, avbe ẹzi oke, vbe odẹ ekẹn. Emwa ni te ka re otọe na keghi rre emwa Hiti, Amọri, emwa Kenan, Pẹriz, Hivi kevbe Jebus.

⁹ Avbe ivbi Izrẹl khọn avbe ọba na miotọ: avbe ọba Jẹriko, Eai (vbe ọkpẹn Bẹtẹl)

¹⁰ Jerusalẹm, Hibrọn,

¹¹ Jamut, Lakis,

¹² Ẹgiọn, Gẹzẹ,

¹³ Dẹbi, Gẹda,

¹⁴ Họma, Arad,

¹⁵ Libna, Adulam,

¹⁶ Makẹda Bẹtẹl,

¹⁷ Tapua, Hẹfẹ,

¹⁸ Afẹk, Lasiarọn,

¹⁹ Madon Hazọ,

²⁰ Siroa Mẹrọm Aksiaf,

²¹ Tanak Mẹgido,

²² Kedẹs, Joknoam (vbe Kamẹl)

²³ Do (ne ọ rre eghute), Goim (vbe Galili.)

²⁴ Kevbe Taiza: ehia kegha re ọba ọkpa yan ọgban.