Jọsua 11 - Edo Bible (E Baibol Ẹdo) Version 1996

A Khọn Jabin Kevbe Iran Ni Yaba Ẹre Muotọ

¹ Otiti akhọnmiotọ ọghe ivbi Izrẹl keghi sẹ ehe ne Jabin ne ọba Hazọ ye. Ọ na gie uhunmwu gie Jobab ọba Maadọn kevbe gie Simrọn kevbe Aksiaf.

² Kevbe gie avbe ọba ni rre ẹvbo ni rre uhunmwu oke vbe odẹ okuọ, vbe Iya ọghe Jọdan vbe odẹ ekẹn ọghe odighi e Galili vbe ẹvbo ni rre ototọ oke vbe eghute vbe ọkpẹn Dọ.

³ Rẹn keghi vbe gie uhunmwu gie ivbi e Kenan ni rre obọ eveva ọghe Jọdan, gie Amọri, Hiti, Pẹriz, Jebus vbe ẹvbo uhunmwu oke kevbe emwa Hivi ni rre ototọ Oke Hẹmọn vbe otọ Mispa.

⁴ Iran keghi viọ ivbiyokuo iran hia gha dee, ivbiyokuo ne emwa nii viọ rre wa bun vba ekhae ni rre ọkpẹn okun. Iran keghi vbe mwẹ ẹsin ni bun kevbe ikẹkẹ okuo ni bun ẹsẹse.

⁵ Avbe ọba nii hia keghi ku obọ gbe, iran keghi do si egbe koko ye agọ ọkpa vbe ọkpẹn Ẹzẹ Mẹrọm, ne iran gu ivbi Izrẹl gbinna.

⁶ E Nọyaẹnmwa keghi tama e Jọsua wẹẹ, “Ghẹ gie ohan iran mu uẹn, vbe ọ te sẹ ẹghẹ na akhuẹ, I gha gbele iran hia fo ne ivbi Izrẹl. Wa ghi kun avbe ẹsin iran use, wa ghi giẹn ikẹkẹ okuo iran an.”

⁷ Rhunmwuda ọnii, e Jọsua kevbe emwa rẹn na dekun iran vbe a ma ro a ma kọ vbe uhunmwu Ẹzẹ Mẹrọm.

⁸ E Nọyaẹnmwa keghi rhie akhọnmiotọ vbe uhunmwu iran, ne ivbi Izrẹl. Ivbi Izrẹl keghi dekun iran, iran na khulo iran ghe odẹ okuọ ya sẹ Saidọn nọkhua kevbe Misrefọt Maim, kevbe e Saidọn odẹ ahọ ya sẹ Mispa. Iran keghi wa gha khian a te do miẹn wẹ, a ma ghi miẹn ọkpa ne ọ ghi de kẹe vbe uwu iran ne eghian.

⁹ E Jọsua keghi ru iran vbe ne Nọyaẹnmwa khare: ọ keghi kun ẹsin iran use, ọ na giẹn ikẹkẹ okuo iran an.

¹⁰ E Jọsua keghi werriegbe, ọ na ya khọn Hazọ, ọ na vbe gbe ọba ne ọ rrọọ. (Vbe ẹghẹ ne a kha na, e Hazọ, ọ re ọ gha re ẹvbo ne ọ mwẹ ẹtin sẹẹ vbe avbe ẹvbo ni rre odọ nii hia.)

¹¹ Iran keghi gbele emwa hia ni rrọọ, iran ma sẹ ọkpa rae ye agbọn, iran na vbe giẹn ẹvbo iran an.

¹² E Jọsua keghi khọn avbe ọba ni hia muotọ deba ẹvbo iran hia. Ọ keghi gbele iran hia a, zẹ vbene Mosis ne ọguọmwadia e Nọyaẹnmwa khare.

¹³ Vbene ọ rhirhi a gha ye hẹ, ivbi Izrẹl ma giẹn avbe owa ekẹn gberra Hazọ ọkpa ne Jọsua giẹn uan.

¹⁴ Ivbi Izrẹl keghi viọ emwi ni maa ni rrọọ hia kevbe avbe ẹmila ni rre ẹvbo nii, iran na ya ehia khian ọghe iran, sokpan, iran keghi gbele emwa ne agbọn ni rrọọ, iran ma vbe sẹ ọkpa rae ye agbọn.

¹⁵ E Nọyaẹnmwa gu e Mosis ne ọguọmwadia ẹre guan, e Jọsua keghi ya ehia ru emwi. Ọ keghi ru emwi hia fẹẹrẹ ne Nọyaẹnmwa tama e Mosis.

Avbe Otọe Ne Jọsua Khọnrẹn

¹⁶ E Jọsua keghi khọn otọe nii hia, ẹvbo oke nii hia, vbe odẹ okuọ kevbe odẹ ekẹn iwewe avbe otọ Gosiẹn hia, otọe ni kae vbe odẹ ekẹn kevbe Iya Jọdan.

^17-18 Ke Oke Halek kpao vbe ọkpẹn Idọm ya sẹ Balgad vbe iya ọghe Lebanọn vbe odẹ ekẹn ọghe Oke Hẹmọn, ọ keghi gbele avbe ọba ni rrọọ hia a. Vbe ọ ghi gu iran khọn la ẹghẹ ne ọ taẹn vbe otọ nẹ.

¹⁹ A ma miẹn ọkpa vbe avbe ẹvbo nii ne ọ gu Izrẹl vẹn ihẹn ne egbe gberra Gibiọn ne avbe Hivi ye. Ni ghi dekẹe hia, te a khọn iran vbe okuo.

²⁰ E Nọyaẹnmwa keghi gie iran wa kha wẹ te iran gha gu ivbi Izrẹl gbinna, ne a miẹn ehe na tie iran emwa ne a gha fuan fẹẹrẹ, ne a vbe gbele iran an vbe ne a i na mwẹ itohan. Emwi ne Nọyaẹnmwa tama Mosis ọre onii khin.

²¹ Ẹghẹ na ọ re Jọsua na gha khian ya fuẹn iran ne arhuanran ighẹ Anakim ni rre uhunmwu oke, vbe Hibrọn, Debẹ, Anab kevbe avbe uhunmwu oke Juda kevbe Izrẹl. E Jọsua keghi wa fuẹn iran kevbe ẹvbo iran an fẹẹrẹ.

²² A ma zẹdẹ sẹ ọkpa vbe avbe Anakim rae ye otọ Izrẹl. Sokpan a keghi sẹ ibozẹghẹ rae ye Gaza, e Gat kevbe Asdọd.

²³ E Jọsua keghi khọn otọe ni hia fẹẹrẹ zẹ vbene Nọyaẹnmwa tama e Mosis. Ọ keghi muẹn ne ivbi Izrẹl ne ọ gha re ọghe iran, a na do gha ẹre ako ako, ọkpọkpa ne ẹwae ọkpọkpa. Ẹre emwa nii na ghi hẹwẹ vbe okuo.