Jọsua 10 - Edo Bible (E Baibol Ẹdo) Version 1996

A Khọn Emwa Amọri Mutan

¹ Adonizẹdẹk ne ọba Jerusalẹm keghi họn wẹẹ, e Jọsua khọn Eai, ọ rẹnkhẹn ọẹn ruan fẹẹrẹ, ọ na vbe gbe ọba ne ọ rrọ, zẹ vbene ọ vbe ru e Jẹriko ke ọba ẹre. Ọ keghi vbe họn wẹ emwa Gibiọn vbe gu ivbi Izrẹl vẹn ihẹn ne iran gba gha rre ọfumwegbe kevbe wẹ te iran hia ghi gba rrọọ.

² Ohan keghi kakabọ mu emwa Jerusalẹm rhunmwuda, e Gibiọn kpọlọ vbe avbe ẹvbo nii ni ghi mwẹ ọha hia fẹẹrẹ, ọ vbe kpọlọ sẹẹ Eai, emwa ni vbe rrọọ, ivbiyokuo ni din ọ re iran khin.

³ Ọ re Adonizẹdẹk na gie uhunmwu gha rrie ọghe Hoham ne ọba Hibrọn, Piram ne ọba Jamut, Jafia ne ọba Lakis kevbe Debẹ ne ọba Ẹgiọn wẹẹ:

⁴ “Wa do deba mwẹ, ne a ya khọn Gibiọn rhunmwuda emwa rẹn gu e Jọsua kevbe ivbi Izrẹl vẹn ihẹn ne egbe ne iran gba gha rrọọ vbe ọfumwegbe.”

⁵ Avbe ọba Amọri isẹn na, ọba e Jerusalẹm, Hibrọn, Jamut, e Lakis kevbe Ẹgiọn, keghi si koko kevbe ivbiyokuo iran, iran keghi lẹga Gibiọn, iran na suẹn ọnrẹn ne a gu gbinna.

⁶ Ivbi e Gibiọn keghi gie emwa bu e Jọsua vbe agọ vbe Gilgal wẹẹ, “Ghẹ fi iyeke gbe ima enọwanrẹn! Zẹgiẹgiẹ gha dee do yi ma obọ! Miẹn ima fan! Avbe ọba Amọri hia ni rre ẹvbo odẹ uhunmwu oke wa kugbe mu aro igbinna da ima!”

⁷ Ẹre Jọsua kevbe avbe ivbiyokuo ẹre kevbe ivbiyokuo ni maa sẹẹ, na guakpao vbe Gilgal la okhian.

⁸ E Nọyaẹnmwa ke tama e Jọsua wẹẹ, “Ghẹ gie ohan iran muẹn. I rhie akhọnmiotọ nuẹn nẹ. Ọkpa vbe uwu iran ne ọ gha sẹtin gbe uwa odẹ, ẹ i rrọọ.”

⁹ E Jọsua kevbe ivbiyokuo ẹre keghi ye asọn hia khian ke Gilgal gha dee, ọ na suẹn ivbi Amọri ne a gu gbinna vbe a ma ro a ma kọ.

¹⁰ E Nọyaẹnmwa keghi fian afianma ne ọ ya emwa zurọ fi ivbi Amọri egbe vbe iran wa bẹghe ivbiyokuo ọghe Izrẹl. Ivbi Izrẹl keghi lọ iran an vbe Gibiọn, iran na khulo iran ghe ototọ oke ya la Bẹt-horọn, iran keghi gbinna ghe odẹ ekẹn ya sẹ Azẹka kevbe Makẹda.

¹¹ Ehe ne iran na lẹ ne ivbiyokuo Izrẹl ni ghe odẹ Bẹt-horọn ya sẹ Azẹka, e Nọyaẹnmwa keghi filo okuta avannukhunmwu ke odukhunmwu rre yan iran, a keghi gbele iran an. Iran ne okuta avannukhunmwu gbele keghi bun sẹ iran ne ivbi Izrẹl gbele.

¹² Vbe ẹdẹ ne Nọyaẹnmwa rhie ne ivbi Izrẹl ne iran khọnmiotọ, vbe uhunmwu ivbi Amọri, e Jọsua keghi gu e Nọyaẹnmwa guan, ọ keghi sirra ivbi Izrẹl hia tae wẹẹ, “Owẹn, mudia hii yan Gibiọn, uki, mudia vbe odukhunmwu Iya Aijalọn.”

¹³ Owẹn keghi mudia hii, uki ma ghi vbe khian rhinrin ẹvbo nii te do khọn avbe eghian iran hia fo. A gbẹn emwi na ye Ebe Jasia. Owẹn keghi mudia hii vbe adesẹneva iso, ọ ma vbe han vbe ẹdẹ hoho.

¹⁴ A ma he ka miẹn egbe ẹdẹ vberriọ ẹdẹ, a ma vbe dọlegbe miẹn egbọre ke ẹghẹ nii gha dee, ẹdẹ ne Nọyaẹnmwa ye ẹmwẹ ne ọmwa ne agbọn tae ru emwi, ọ na deba ivbi Izrẹl gbinna.

¹⁵ Ẹre Jọsua kevbe ivbiyokuo ẹre na werriegbe gha rrie agọ vbe Gilgal.

E Jọsua Khọn Mu Avbe Ọba Amọri Isen

¹⁶ Nene avbe ọba ivbi Amọri isẹn nii keghi lẹ fe, iran na ya lẹre ye uvun okuta vbe Makẹda.

¹⁷ Emwa keghi miẹn iran, iran na khama e Jọsua wẹ iran lẹre vbe evba.

¹⁸ Rẹn keghi kha wẹẹ, “Wa werriẹ avbe okuta ni kọnkọn ye onurho ne a la la uvun nii. Wa viọ emwa yọ ne iran gha khẹ uvun okuta nii.

¹⁹ Sokpan, wa tobọ uwa ghẹ mudia ye evba. Wa khu avbe eghian nii ne uwa ke odieke gu iran gha khọn, wa ghẹ gie iran la ẹvbo iran. E Nọyaẹnmwa Osanobua uwa rhie akhọnmiotọ vbe uhunmwu iran ne uwa nẹ.”

²⁰ E Jọsua kevbe ivbi Izrẹl keghi lọkọ iran; iran ne a ma he gbelua ke ya lẹre ye uwu ekẹn ne a gbe ga ẹvbo iran.

²¹ Emwa Jọsua hia ke dọlegbe bu ẹre gha die agọ Makẹda, vbe egbe hẹnnẹdẹn. A ma miẹn ọmwa ne ohan giee ya ukpẹ sakan ọmwa rhọkpa ni re ivbi Izrẹl vbe ẹvbo nii.

²² Ẹre Jọsua na kha wẹẹ, “Wa kie urho uvun okuta nii ne uwa viọ avbe ọba isẹn nii bu mwẹ gha dee.”

²³ Iran keghi ru vberriọ, iran keghi viọ avbe ọba Jerusalẹm, Hibrọn, Jamut, Lakis kevbe Aglọn ladian.

²⁴ Iran ghi viọ avbe ọba nii sẹ ehe ne Jọsua ye nẹ, ọ keghi tie ivbi Izrẹl hia rriegbe, ọ na tama avbe emwa iwinna rẹn ni lele ẹe gha khian wẹẹ, “Wa larre, wa viọ owẹ uwa yan ẹyaẹn avbe ọba na.” Iran keghi ru vberriọ.

²⁵ Ẹre Jọsua na tama iran wẹẹ, “Wa ghẹ gie ohan mu uwa, wa ghẹ vbe gie egbe wọ uwa. Wa wegbe ne uwa vbe din, rhunmwuda vbe nian ọ re Nọyaẹnmwa ra ru avbe eghian uwa hia.”

²⁶ Ẹre Jọsua na gbele avbe ọba isẹn nii, ọ na silo iran rrọọ ye erhan isen, iran na gha rre evba rhinrin ya sẹ ota.

²⁷ Owẹn ghi defua nẹ, e Jọsua na gie uhunmwu, a na ya hẹ iran tuorre, a na ya filo iran ku uwu uvun okuta ne iran te lẹre yi. A na viọ okuta nekhua ye unu uvun okuta nii, te iran ye rre evba.

E Jọsua Khọn Munọ Ẹvbo Amọri Ni Bun

²⁸ E Jọsua keghi dekun Makẹda, ọ na khọn rẹn ke ẹe kevbe ọba ẹre vbe ẹdẹnẹdẹrriọ. Ọ keghi gbele emwa nii rre ẹvbo ni hia a, ọ ma vbe fi ọkpa ye agbọn vbọ. Ọ kevbe ru ọba Makẹda zẹ vbene ọ vbe ru ọba Jẹriko.

²⁹ Iyeke ọnii, e Jọsua ke ẹe kevbe ivbiyokuo ẹre keghi ke Makẹda kpao gha rrie Libna, ọ na dekun ẹnrẹn.

³⁰ E Nọyaẹnmwa keghi vbe rhie akhọnmiotọ ne ivbi Izrẹl vbe uhunmwu ẹvbo na ke ọba ẹre. Ọ ma sẹ ọkpa rae vbọ, ọ keghi gbele emwa hia ni rrọọ. Ọ kevbe ru ọba ne ọ rrọọ zẹ vbene ọ vbe ru ọba e Jẹriko.

³¹ Vbe iyeke ọna, e Jọsua kevbe ivbiyokuo ẹre keghi kpao vbe Libna gha rrie Lakis. Iran na lẹga ẹre, iran na dekun ẹnrẹn.

³² E Nọyaẹnmwa keghi rhie akhọnmiotọ vbe uhunmwu Lakis ne ivbi Izrẹl vbe ikpedẹ ne ogieva ọghe igbinna nii, ọ ma vbe sẹ orhiọnkpa rae. zẹ vbene ọ ka vbe ru vbe Libna, ọ keghi gbele emwa hia a.

³³ E Horam ne ọba Gẹzẹ kegha de do ye Lakis obọ. Sokpan e Jọsua keghi khọn miẹn ẹre otọ, ke ẹe kevbe emwa rẹn, ọ ma vbe sẹ ọkpa rae ye agbọn vbọ.

³⁴ Vbe iyeke ọnii, e Jọsua kevbe emwa rẹn keghi kpao vbe Lakis gha rrie Ẹgiọn iran keghi ghae ga ẹre, iran na dekun ẹnrẹn.

³⁵ Iran keghi khọn rẹn ẹdẹnẹdẹrriọ nii, iran na gbele emwa hia ni rre ẹvbo nii uan, zẹ vbene ọ vbe ru vbe Lakis.

³⁶ Vbe iyeke ọna, e Jọsua kevbe ivbiyokuo ẹre keghi ke Ẹgiọn gha rrie Hibrọn ne ẹvbo oke. Iran na dekun ẹnrẹn.

³⁷ Iran na khọn ẹnrẹn muotọ. Iran keghi gbe ọba ne ọ rrọọ kevbe emwa hia ni rre ẹvbo nii kevbe ẹvbo ni diake ẹe. E Jọsua keghi wa tie ẹvbo nii ehe ne a gha fuan fẹẹrẹ, zẹ vbene ọ vbe ru Ẹgiọn. A ma sẹ orhiọnkpa rae vbọ.

³⁸ E Jọsua kevbe ivbiyokuo ẹre kegha rrie Debẹ, iran na dekun ẹnrẹn.

³⁹ Ọ kevbe khọn mu ẹẹn ke ẹe kevbe ọba ẹre kevbe ẹvbo ni sikẹ ọre. Iran keghi gbele emwa ni rre evba nii hia a. E Jọsua keghi ru Debẹ kevbe ọba ẹre zẹ vbene ọ vbe ru Hibrọn, Libna kevbe avbe ọba iran.

⁴⁰ E Jọsua keghi khọn mu otọe nii hia, ọ keghi khọn avbe ọba ni rre uhunmwu oke nii miẹn iran otọ, iwewe-Negev, ẹvbo ni rre ugboghodo kevbe ni rre ahọ oke kevbe ototọ oke vbe odẹ orrie deba ẹvbo ne amẹ i ye vbe odẹ ekẹn, ọ ma sẹ ọkpa rae ye agbọn. A keghi wa gbele ehia a. Erriọ ọ re Nọyaẹnmwa Osanobua Izrẹl gie.

⁴¹ E Jọsua keghi khọn ehia muotọ ke Kadẹs Bania kpao vbe odẹ ekẹn Gaza, vbe ọkpẹn eghute deba isoko e Gosiẹn hia vbe odẹ ekẹn ya sẹ Gibiọn vbe odẹ okuọ.

⁴² Uhukpa ne Jọsua mu okuo gie avbe ọba na, ọ keghi wa khọn iran khọn ẹvbo iran mu tan, rhunmwuda e Nọyaẹnmwa ne ọ re Osanobua ọghe Izrẹl ọ re ọ ghaa gbinna ne Izrẹl.

⁴³ Vbe iyeke ọ na, e Jọsua kevbe ivbiyokuo ẹre keghi werriegbe gha rrie agọ vbe Gilgal.