Jọsua 1 - Edo Bible (E Baibol Ẹdo) Version 1996

Osanobua Wẹ Ne Jọsua Ya Khọn Kenan

¹ Ugbẹn vbe Mosis ne ọguọmwadia e Nọyaẹnmwa ghi wu nẹ, e Nọyaẹnmwa keghi tama e Jọsua ne ovbi Nọn ọmwa ne ọ gha ye Mosis obọ wẹẹ,

² “E Mosis ne ọguọmwadia mwẹ wu nẹ. Mu egbe nian, wẹ kevbe Izrẹl hia, wa fian Jọdan rra ne uwa gha rrie otọ ne I ra mu ne uwa.

³ Zẹ vbene I tama e Mosis, I mu otọe ne uwa ra la gberra hia ne uwa ne emwa mwẹ nẹ.

⁴ Ehe ne otọe uwa lae ghi ke ato odẹ ekẹn ọghe Oke Lebanọn, kevbe Ẹzẹ Yufretes nọkhua vbe odẹ ahọ, kevbe ẹvbo Hiti hia ya sẹ Okun Meditẹrrenian vbe odẹ orrie.

⁵ Inu ẹghẹ ne u gha ya vbe agbọn ọmwa ọkpa ne ọ gha sẹtin khọn miẹn ruẹn otọ, ẹ i rrọọ. I gha mudia kuẹ zẹ vbene I mudia ke Mosis. I i ra suẹ rae.

⁶ U ghi wegbe ne u vbe din, rhunmwuda wẹ ọ re ọ ra mu ọkaolotu viọ emwa na gha rrie otọe nii ne I ve avbe erha iran odede ẹre wẹ I gha mu ne iran.

⁷ Sokpan, u ghi wegbe ne u vbe kakabọ din; ne u vbe miẹn wẹ, wẹ wa lele uhi ni hia ne Mosis ne ọguọmwadia mwẹ gbe ne uwa. Ghẹ sẹ ọkpa rae vbọ, ọ ghi gha dinna odẹ nuẹn vbe ehe ne u gha rhirhi yo.

⁸ U ghi miẹn wẹ a tie ebe uhi nii vbe uwu ugamwẹ uwa vbe ẹghẹ hia. U ghi gha ruẹ ọre asọn kevbe avan ne u vbe miẹn wẹ u ya emwi ne a gbẹnnẹ yọ hia ru emwi. Ẹghẹ nii, agbọn gha ma ruẹn, u ghi vbe gha ru ne a gban.

⁹ Ya uhi ne I gbe nuẹn rre. Wegbe ne u vbe din. Ghẹ gie ohan muẹn, ghẹ gie ẹtin fo uẹ, rhunmwuda mẹ ne Nọyaẹnmwa Osanobua ruẹ rrọọ yaba ruẹ vbe eheikehe ne u gha rhirhi yo.”

E Jọsua Tama Emwa Nii Emwi Ne Iran Gha Ru

¹⁰ Ẹre Jọsua ghi na tama avbe ọkaolotu emwa ni wẹẹ,

¹¹ “Wa lele agọ na khinkhian, ne uwa vbe tama avbe emwa nii wẹẹ, ‘Wa dọlọ emwi uwa yi ye otọ rhunmwuda vbe ọ te sẹ ikpẹdẹ eha, wa gha fian Ẹzẹ Jọdan na rra ne uwa ya mu otọe ni ne Nọyaẹnmwa Osanobua rua ra mu ne uwa.’ ”

¹² E Jọsua keghi tama ẹwae Riubẹn kevbe Gad deba obọ ọkpa vbe ẹwae Manasẹ wẹẹ,

¹³ “Wa ye ẹmwẹ ne Mosis ne ọguọmwadia e Nọyaẹnmwa tama uwa rre wẹẹ, ‘Nọyaẹnmwa Osanobua gha mu otọe na ne uwa ne ọ gha re ọghe uwa vbe asefẹn ahọ Jọdan.’

¹⁴ Avbe amwẹ uwa kevbe ivbi uwa kevbe ẹmila uwa gha mudia vbe otọe nii ne Mosis mu ne uwa, sokpan, avbe ivbi iyokuo ni rre uwu uwa gha gberra ne iran ke odaro ivbi Izrẹl ne ihua uwa iran ghi mu egbe ne iran ya ye iran obọ vbe okuo.

¹⁵ Iran ghẹ ghi vbe mu otọe nii ne Nọyaẹnmwa Osanobua mu ne iran nẹ, iran gbe ẹkun sotọ, wa ghi vbe gha dee do yin otọe ne Mosis ne ọguọmwadia e Nọyaẹnmwa mu ne uwa vbe emwa na vbe iyeke ẹzẹ Jọdan.”

¹⁶ Iran keghi wanniẹn tama e Jọsua wẹẹ, “Ma gha ru emwi hia ne u tama mwa, ma gha vbe yo ehe ne u rhirhi a gie ima re.

¹⁷ Ma gha họn ẹmwẹ nuẹn zẹ vbene ima vbe gha họn ẹmwẹ ne Mosis. Sokpan ne Osanobua gha rrọọ yaba ruẹ zẹ vbene ọ vbe gha rrọọ ba e Mosis!

¹⁸ Ọmwa ne ọ rhirhi muan ruẹn ẹmwẹ ra ne ọ he uhunmwu yuẹ obọ, a ghi gbe ẹe rua. Sokpan wegbe ne u vbe din!”