Jona 4 - Edo Bible (E Baibol Ẹdo) Version 1996

Ohu E Jona Kevbe Aho Ẹmwẹ Ọmwa Osanobua

¹ Emwi na ma zẹdẹ yẹ e Jona, ohu keghi mu ẹẹn.

² Rẹn keghi rhunmwuda ọnii na erhunmwu wẹẹ, “E Nọyaẹnmwa, I ma ta ẹmwẹ na vbe I te kpao vbe owa wẹ erriọ u ra ru emwi na. Ọnii ọ si ẹe ne I na hia vbe odẹikodẹ ne I lẹ gha rrie Spen. I rẹnrẹn ighe Osanobua ne ọ mwẹ aho ẹmwẹ ọmwa kevbe itohan ọre uwẹ khin, u vbe zin egbe, u vbe mwẹ ẹnina, u vbe mu egbe vbe ẹghẹ hia ne u ya fi ekhọe werriẹ ne u ghẹ rri ọmwa oya.

³ Rhunmwuda ọnii Osanobua, gun mwẹ wa wu, rhunmwuda, I wa wu ọre ọ maa sẹ agbọn ne I ye na.”

⁴ E Nọyaẹnmwa keghi wanniẹn wẹẹ, “Ohu ne uwẹ mu na khẹ kuẹ ra?”

⁵ E Jona keghi laghe odẹ owẹn owiẹ ọghe ẹvbo nii, ọ na tota. Ọ keghi gbe irhu ọkpa ne egbe ẹre, ọ na tota ye uwu ẹre, ọ na gha khẹ ne ọ miẹn emwi ne ọ gha rruan Ninevi.

⁶ Ẹre Nọyaẹnmwa na ru ẹe ne erhan ọkpa zọ vbe ehe ne Jona ye ne ọ mu irhu gue ẹre, ne egbe miẹn ehe na rọkhọ ẹe sẹ ayọ. Ẹmwẹ erhan nii keghi ye ẹko e Jona rhiẹnrhiẹn ẹsẹse.

⁷ Sokpan, ẹdẹ ghi gbe vbe ikpẹdẹ ne ọ lele ẹe, e Nọyaẹnmwa keghi gie ọkhọe, ọ rri erhan nii, erhan nii na wu.

⁸ Ugbẹn vbe ovẹn ghi yan rre nẹ, Osanobua keghi gie ẹhoho owẹn owiẹ ne ọ tọn ẹsẹse rre. Ovẹn ni ghi gbe e Jona uhunmwu, ekherhe ọ kere ne ọ wa lahin. Ọ keghi rhunmwuda ọnii gha kha wẹ rẹn kpa miẹn uwu, rẹn gha wa wu. Ọ wẹẹ, “I wa wu hin agbọn rre ọre ọ maa sẹ agbọn ne imẹ ye na.”

⁹ Sokpan, Osanobua tama rẹn wẹẹ, “Ohu ne uwẹ mu ye ẹmwẹ erhan na khẹ kuẹ ra?” E Jona keghi wanniẹn wẹẹ, “Ohu ne ọ mu mwẹ sẹ ne ọmwa ya wu.”

¹⁰ E Nọyaẹnmwa keghi wanniẹn wẹẹ, “Asọn ọkpa ọre erhan nii wa wan ladian, a keghi vbe ho ẹre bẹkun vbe ikpẹdẹ ne ọ lele ẹe, u ma miẹn ẹsọn yọ, ẹ i re uwẹ ọre ru ẹe ne ọ na zọ, sevba, te ọ ye da a.

¹¹ Wẹ ma miẹn wẹ ẹ i mwẹ mẹ ma tohan e Ninevi ne ẹvbo nọkhua nii. A rhe ta ẹe na, ọ sẹ emọ arriaisẹn iyehan (120,000) ne ọ ma rẹn ọkpa ọmaa rẹn eva ni rre uwu ẹre do deba emwirri ọrhẹnrhẹn.”