Jona 3 - Edo Bible (E Baibol Ẹdo) Version 1996

Jona Ru Vbene Nọyaẹnmwa Khare

¹ E Nọyaẹnmwa keghi vbe dọlegbe gu e Jona guan.

² Ọ wẹẹ, “Gha rrie Ninevi, ẹvbo nọkhua nii, ne u tama emwa nii uhunmwu ne I giọ re.”

³ E Jona keghi ru vbene Nọyaẹnmwa khare, ọ na gha rrie Ninevi, ẹvbo ne ọ kpọlọ sẹrriọ wẹ ikpẹdẹ eha ọre a ya ye owẹ fian ẹẹn rra.

⁴ E Jona keghi gha la ẹvbo ni khian, Ọ ghi khian okhian ẹdẹ hoho nẹ, ọ wẹẹ, “Vbe ọ te sẹ ikpẹdẹ iyeva, a gha fuẹn Ninevi ua!”

⁵ Emwa e Ninevi keghi ya ẹmwẹ Osanobua yi. Iran keghi ta ẹe wẹ ne emwa hia yo aguẹ, ẹre emwa nii hia, kevbe ne ọ kpọlọ sẹẹ ya sẹ ne ọ kanmwa sẹ, keghi viọ ukpọn akhiẹ rhuan, ne iran ya rhie ma ighe iran fi uyinmwẹ werriẹ nẹ.

⁶ Ugbẹn vbe ọba e Ninevi ghi họn, ọ keghi kpaegbe vbe ẹkete ọ keghi ban ẹwu ẹre mu fua, ọ na viọ ukpọn akhiẹ yọ, ọ na tota ye uwu emuẹn.

⁷ Ọ keghi gie ne a tama emwa e Ninevi wẹẹ, “Ọba kevbe ekhaẹmwẹ ọnrẹn ọre ọ gie uhunmwu na rre wẹ: ọmwa ikọmwa ghẹ rri evbare rhọkpa, emwa ne agbọn, ẹmila kevbe ohuan, a wẹ ne iran ghẹ re, iran ghẹ da.

⁸ Wẹ ne emwa ne agbọn kevbe emwirri viọ ukpọn akhiẹ yọ. we ne dọmwadẹ ọghe ọe ye ekhọe hia na erhunmwu ghe Osanobua, ne dọmwadẹ ọghọe sẹ uyinmwẹ dan kevbe emwi dan ne ọ ru rae.

⁹ Ọ gha kẹe, Osanobua gha fi ekhọe werriẹ, ọ gha ke ẹe ohu gha fo vbe ẹko ẹre, ma i ghi ra wulo!”

¹⁰ Osanobua keghi miẹn emwi ne iran ru, ọ miẹn wẹ iran mu uyinmwẹ dan iran fua. Rẹn keghi rhunmwuda ọnii fi ekhọe werriẹ, ọ ma ghi rri iran oya vbene ọ te wẹ rẹn gha ru.