Jona 2 - Edo Bible (E Baibol Ẹdo) Version 1996

Erhunmwu E Juna

¹ E Jona keghi ke ehe ne ọ dinmwi vbe uwu ehẹn ni na erhunmwu ghe Nọyaẹnmwa ne Osanobua ẹre wẹẹ:

² “I kpetie ruẹ Nọyaẹnmwa, vbe usẹ, mwẹ, wẹ keghi zẹ mwẹ wanniẹn mwẹ. Ehe ne ọ dinmwi vbe ẹvbo iran ni wulo nẹ I tu nọ iyobọ, u keghi họn ọghomwẹ.

³ U fi mwẹ fi uwu odin, fi ototọ okun fẹẹrẹ, ehe ne amẹ na lẹga mwẹ, ne ulẹmwẹ amẹ hia na lẹ rhu mwẹ.

⁴ I te gha ro wẹ a kanmwẹ fua hin odaro ruẹ rre nẹ, kevbe wẹ, mẹ I ghi dọlegbe ye aro kan ọgua Osa ruẹ nọhuanrẹn ọvbehe.

⁵ Amẹ hẹ rhu mwẹ, ọ fu mwẹ ẹtin okun gue mwẹ mu otọ fẹfẹẹfẹ irunmwu ẹzẹ keghi kinnọ uhunmwu mwẹ khinkhian.

⁶ Mẹ keghi gha rrie otọ, ehe ne avbe oke nekhua ke zọ kpao, gha rrie ẹvbo ne a khui urho ẹre gbua ẹdẹdẹmwẹdẹ. Sokpan, wẹ ne Nọyaẹnmwa Osanobua mwẹ, keghi si mwẹ ke ẹmwẹ ne unu ke uwu odin gha dee.

⁷ Ẹghẹ ne I na miẹn wẹ ẹdẹ mwẹ rrie dọn ọn, mẹ keghi na erhunmwu ghe ruẹ Nọyaẹnmwa u keghi họn ọghomwẹ ke uwu ọgua Osa ruẹ nọhuanrẹn gha dee.

⁸ Iran ni gho ẹbọ ohoghe, rhie ẹmwẹ ruẹn hin ekhọe iran rre nẹ.

⁹ Sokpan mẹ gha so ihuan urhomwẹ ghe ruẹ I gha zọ ese ghe ruẹ, I ghi vbe ru zẹ vbene I yan rẹn. Ọghe Nọyaẹnmwa ore imienfan ke rre!”

¹⁰ Ẹre Nọyaẹnmwa na tama ehẹn ne ọ ya kpa e Jona ye otọ vbe oke ọ keghi gele ru vberriọ.