Joẹl 2 - Edo Bible (E Baibol Ẹdo) Version 1996

Avbe Irhiso Ne A Ya Taa Ẹmwẹ Ẹdẹ E Nọyaẹnmwa Ye Otọ

¹ Wa kpe okpe, wa si orhu okuo vbe Zaiọn ne oke nọhuanrẹn Osanobua. Wa gha guọ ivbi e Juda! Ẹdẹ e Nọyaẹnmwa dee ẹgiẹgiẹ.

² Ẹdẹ akhiẹ ne ọ so ebiebi ra gha nọ, ẹdẹ nekhui ne ọ vuọn ne okuku. Oghẹn irhiso nọkhua ye egbe dee, zẹ vbe ne ebiebi hẹko so yan uhunmwu oke. A ma he miẹn emwi ne ọ khọ ẹe ẹdẹ, a i ra vbe dọlegbe miẹn emwi ne ọ khọ ẹe ọvbehe.

³ Iran rri irunmwu uan zẹ vbe erhẹn, Vbe odaro iran, ugbo yevbe Ogba Idẹni sokpan, iran gha la ẹe gberra nẹ, ọ ghi yevbe ato ne emwi rhọkpa i ye. Emwiọkpa ne ọ lẹ iran fe i rrọọ.

⁴ Iran yevbe avbe ẹsin, iran rhulẹ zẹ vbe avbe ẹsin okuo.

⁵ Iran gha vbọ vbe uhunmwu oke, a ghi gha họn igiawẹ iran zẹ vbe ikẹkẹ okuo, iran ghi gha salọ vbe irunmwu ne ọ kae vbe erhẹn. Iran tẹnrẹn zẹ vbe ivbiyokuo nọkhua ne ọ muegbe okuo.

⁶ Iran gha dee, ohan ghi gha mu emwa hia, edọmwadẹ ọghe ọe ghi reghe aroa vbe uhunmwu.

⁷ Te iran dekun emwa zẹ vbe iyokuo, iran ghi gha mu ekẹn hin zẹ vbe ivbiyokuo. Iran ghi gha yẹn owẹ ghe odaro, iran i vbe biegbe ghe ihe ọvbehe,

⁸ ra ne iran degbe egbe odẹ, iran ghi ya uhunmwu zẹ emwi ne a ya gbe odẹ hia gberra, emwi ne ọ sẹtin mu iran mudia i rrọọ.

⁹ Iran ghi khọn ghe ore ẹvbo, iran ghi vbọ la uhunmwu ekẹn gberra, iran ghi mu avbe owa hin, iran ghi gha la ewindo, zẹ vbe oyi.

¹⁰ Iran gha dee, otọe ghi gha mu rueghe; iso ghi gha mian gbẹgbẹgbẹ. Owẹn kevbe uki ghi so ebiebi avbe orhọnmwẹ i ghi ladian.

¹¹ E Nọyaẹnmwa ghi davan gie ivbiyokuo ẹre uhunmwu, otu iyokuo ni ru vbene ọ khare, wa bun ẹsẹse, iran vbe wegbe. U miẹn vbe ẹdẹ e Nọyaẹnmwa mu ohan hẹ. De ọmwa ne ọ gha miẹn uhunmwu vbọ?

Utiemwẹ Ye Afiekhọewerriẹ

¹² “Sokpan, vbene emwi hia ye ye na, wa fiwerriẹ ne uwa bu mwẹ gha dee, ekhọekekhọe hia, deba aguẹ, kevbe eve kevbe akhiẹ.” Erriọ Nọyaẹnmwa khare:

¹³ “Wa gie orhiọn ne ọ ma sẹ uwa otọ rhie ma vbene uwa khiẹ sẹ hẹẹ, ukpọn ne a sọ ye egbe ọmwa ẹkun, ma zẹdẹ sẹ.” Wa dọlegbe bu e Nọyaẹnmwa ne Osanobua uwa gha dee, ọ mwẹ ekhọe agiẹngiẹn, ọ vbe vuọn ne itohan, ọ mwẹ izin egbe, ọ vbe mu eyan ne ọ yanrẹn sẹ, ọ mu egbe ne ọ ya bọ vbe ẹghẹ hia, ẹ i re ne ọ gha rri emwa oya.

¹⁴ Ughaghe, e Nọyaẹnmwa ne Osanobua rua gha fi ekhọe werriẹ, ọ ghi ye emwiokọ nibun ru uwa ẹse. Ẹghẹ nii, wa ghi vbe ha oko ọka kevbe ayọn gie ẹe.

¹⁵ Wa kpe okpe nii vbe Oke Zaiọn tama emwa wẹ ne ehia gha rrie aguẹ, ne u tie emwa si koko.

¹⁶ Mu iran egbe ye otọ khẹ iko nọhuanrẹn viọ avbe ọmaẹn rre, si avbe ibiẹka koko, kevbe emobọ negiẹrẹ, ya sẹ egbe ọdọ vbe amwẹ ni da rọnmwẹ egbe, wẹ ne iran kpa vbe owa rre ne iran gha dee.

¹⁷ Ohẹn ne ọ ga e Nọyaẹnmwa vbe ẹkpo onurho kevbe Ogiukpo Ọgua Osa, te iran gha viẹ ne iran gha na erhunmwu wẹẹ, “Tohan emwa ruẹn Nọyaẹnmwa, ghẹ gie ẹvbo ọvbehe zan mwa ra ne iran ya ima gha gbe ogie kha wẹẹ, ‘Osanobua uwa vbo?’ ”

Osanobua Gie Otọe Ni Dọlegbe Gha Maa Emwiokọ

¹⁸ E Nọyaẹnmwa mu ẹmwẹ otọe ẹre ro, ọ tohan emwa irẹn.

¹⁹ Ọ zẹẹ ẹmwẹ wanniẹn iran wẹẹ: “Wanwanna nian, I ra do viọ avbe ọka kevbe ayọn, kevbe ofigbọn ne uwa. Ẹko gha vbe vuọn uwa ẹvbo ọvbehe i ra gha ye zan uwa ọvbehe.

²⁰ I gha khulo avbe oghẹn irhiso kua, iran ni te ke odẹ okuọ rre, I gha khulo eso vbọ la uwu ato. I gha khulo iran ni ke odaro, la uwu Okun Nọwu, iran ni ke iyeke, gha la uwu e Meditẹrrenian. Ikun iran ghi gha wia. I gha fuẹn iran an, rhunmwuda emwi hia ne iran ru uwa ẹre.

²¹ “Wa ne oha, wa ghẹ mu ohan, sokpan, wa gie ẹko gha sẹ uwa ọyẹnmwẹ rhunmwuda emwi hia ne Nọyaẹnmwa ru ne uwa.

²² Wa ne emwi irri, wa ghẹ mu ohan, ehe ne uwa na rri ebe ye nunuunu, avbe erhan mọẹn ọmọ iran, erhan ohọ kevbe alimo ayọn kpọ kua.

²³ “Ivbi e Zaiọn, wa gha ghọghọ wa hia ghọghọ ye emwi ne Osanobua uwa ru ne uwa. Ọ giee amẹ ne ọ sẹ ihe gie uwa vbe ẹghẹ vbe orhọ ma he suẹn, ọ bu amẹ fua ne uwa vbe okhuakhua, kevbe ẹghẹ orhọ, vbene ọ ka rhọ dee ẹdẹ.

²⁴ Ọka gha vuọn ehe ne a na wiẹn ọka, uvun ni lẹga ehe ne a na min ayọn, ghi gha vuọn kpa kua, ne ayọn kevbe ofigbọn oliv.

²⁵ I gha rhie emwi ne uwa te mu fua dọlegbe ne uwa, vbe ẹghẹ ne avbe oghẹn irhiso na gha rri uwa emwiokọ. Mẹ ọ re ọ gie ivbiyokuo na bu uwa gha dee.

²⁶ Eban nian, wa gha miẹn re ne ẹko vbe vuọn uwa. Wa gha rho e Nọyaẹnmwa Osanobua uwa, ne ọ ru emwi ọyunnuan, ne uwa. A i ghi dọlegbe zan emwa mwẹ ọvbehe.

²⁷ Izrẹl wa gha rẹn ẹghẹ nii wẹ adesẹneva uwa ọ re I ye kevbe wẹ mẹ ne Nọyaẹnmwa, ọrọre Osanobua uwa, kevbe wẹẹ, ọvbehe i rrọ. A i ghi dọlegbe zan emwa mwẹ ọvbehe.

Ẹdẹ E Nọyaẹnmwa

²⁸ “Vbe okiekie, I gha hihiẹ orhiọn mwẹ yan dọmwadẹ emwa, ivbi uwa nikpia kevbe ivbi uwa nikhuo ghi gha ta uhunmwu ne I gie; avbe ọmaẹn ghi gha mina, avbe igbama ghi gha miẹn umian.

²⁹ Ọ gha sẹ ẹghẹ nii, I gha vbe hihiẹ orhiọn mwẹ ladian yan eguọmwadia nikpia kevbe eguọmwadia ne ikhuo.

³⁰ “I gha rhie ama emwi ne ọ ra sunu ẹdẹrriọ ma emwa, vbe iso kevbe otọ, esagiẹn gha rrọ kevbe erhẹn kevbe ighogho ne ọ bi vbe amẹ.

³¹ Owẹn gha so ebiebi uki ghi do gha baa vbe esagiẹn ọ te sẹ ẹdẹ ne ẹdẹ nọkhua, ẹdẹ ugborrirri, ọghe Nọyaẹnmwa nii, gha ya egbe ladian.

³² Sokpan, iran hia ni kpe tie Nọyaẹnmwa, a gha miẹn iran fan. Zẹ vbene Nọyaẹnmwa khare, ‘Eso vbe iran ni rre Jerusalẹm, gha lẹ fe, iran ne imẹ hannọ zẹ gha miẹn uhunmwu.’ ”