Joẹl 1 - Edo Bible (E Baibol Ẹdo) Version 1996

¹ Uhunmwu ne Nọyaẹnmwa giee gie Joẹl ne ovbi e Pẹtuẹl ọ re ọna khin.

Emwa Khiẹ Ye Omurhia Emwiokọ

² Wa danmwehọ, wa ne eniwanrẹn emwa hia ni rre Juda, wa gbe ehọ ke otọ. Emwi vbenian he ka sunu ẹdẹ ra vbe ẹghẹ uwa ra ẹghẹ avbe erha uwa?

³ Wa talọ ẹe ma avbe ivbi uwa, iran gha vbe talọ ẹe ma avbe ivbi iran, enii ghi vbe talọ ẹe ma avbe orre ne ọ ghi vbe diake ẹe.

⁴ Oghẹn irhiso gha vẹ rre lele egbe do gha deyan emwiokọ; emwi ne oghẹn ọkpa re kẹe, nọkpa ghi rri ọe fo.

⁵ Wa rhiọrre ne uwa gha viẹ, wa ne avbe ọdayọn, wa gha viẹ, wa ni da ayọn, iran dunmwu ehia a ighe avbe alimo ne a te ya ru ayọn ọgbọn.

⁶ Oghẹn irhiso mu okuo la otọe mwa, iran mwẹ ẹtin, a i vbe sẹtin ka iran vbene iran bun sẹ, akọn iran wa mu, zẹ vbe akọn oduma.

⁷ Iran mu erhan alimo ayọn ima rhia, iran vbe ya akọn lọọ erhan ohọ ima an iran kpalọ ikpakpa ẹre kua, a te do miẹn wẹ te abọ ẹre ghi fuọfua.

⁸ Wa ne avbe emwa, wa gha viẹ vbe ọmọ okhuo ne ọ viẹ uwu ọdọ ne ọ te ra rọnmwẹ.

⁹ Ayọn ra ọka ne a ya mu ohan vbe Ọgua Osa i ghi rrọọ; avbe ohẹn gha khiẹ, rhunmwuda iran i miẹn emwi ya ha oko gie Nọyaẹnmwa.

¹⁰ Ugbo hia dihoi rua; otọe gha khiẹ, rhunmwuda, a dunmwu avbe ọka a, avbe alimo ayọn kaka a avbe erhan oliv vbe luẹluẹ.

¹¹ Wa gha khiẹ, wa ne avbe ọwẹe wa gha viẹ, wa ni gbearoghe ogba azara rhunmwuda avbe ọka kevbe ọka irhuarhua, ya sẹ egbe emwiokọ nekpa hia, a dunmwu ehia a nẹ.

¹² Alimo ayọn kevbe avbe erhan ohọ ehia luẹluẹe. Erhan ni mọ hia, khuọn ebe kua, iran keghi wulo. A ho ẹkorhiẹnrhiẹnmwẹ emwa nii bẹkun.

¹³ Wa yọ ukpon akhiẹ ne uwa gha viẹ ne avbe ohẹn ni ga vbe Ogiukpo. Wa gha rrie uwu Ọgua Osa, ne uwa ya ye asọn hia khiẹ! Ọka ra ayọn i ghi rrọ, ne uwa gha ya ru imuohan gie Osanobua uwa.

¹⁴ Wa ta ẹe wẹ ne emwa gha rrie aguẹ wa tie emwa si koko! Wa si avbe ọkaolotu, kevbe ivbi e Juda hia, koko ye uwu Ọgua Osa, ọghe Nọyaẹnmwa ne Osanobua uwa, ne uwa kpe tie ẹre.

¹⁵ Ẹdẹ e Nọyaẹnmwa bu otọe nẹ ẹdẹ ne Oghodua, gha na gie ọfuan rre. Wẹ miẹn ohan ne ọ gha rre ẹdẹ ne ẹdẹrriọ!

¹⁶ Ma bolo aro ua gha ghe ẹre, vbe a fuẹn ima emwiokọ ua, ẹkorhiẹnrhiẹnmwẹ i ghi rre uwu Ọgua Osa Osanobua mwa.

¹⁷ Emwiokọ wulo ye uwu otọe nọkae. Ọka ne a gha viọ hin rre i rrọọ rhunmwuda ọnii, avbe erru ne emwi i ye, khian ni la ọrhiae rrie.

¹⁸ Avbe ẹmila gha tulo ba ẹmwẹ akhiẹ, rhunmwuda ehe ne iran na rri irunmwu i ghi rrọọ usẹ vbe sẹ oghẹn ohuan ba ẹre.

¹⁹ I viẹ bu ruẹ rre Nọyaẹnmwa, rhunmwuda, otọe, irunmwu, kevbe avbe erhan hia kaka a. Ze vbe ne a miẹn wẹ erhẹn ọ to vbọ.

²⁰ Uhin ighe te avbe aranmwoha vbe tu tie ruẹ rhunmwuda, avbe ẹzẹ kae.