Job 8 - Edo Bible (E Baibol Ẹdo) Version 1996

^1-2 Ẹre Bildad ne ovbi ẹvbo ne a tie ẹre Siua na wanniẹn wẹẹ, “U talọ etalọ owogho ruẹ fo nẹ ra?

³ Osanobua i bu eku, ẹ i mwẹ ọ ma ru vbene ọ kei yi.

⁴ Ọ gha kẹe, te ivbi uẹ rukhọ ghe Osanobua, ọ re ọ na rri iran oya ne ọ khẹke iran.

⁵ Sokpan, banbanna nian, fiwerriẹ ne u rinmwian Osanobua Oghodua.

⁶ A deghẹ ọmwa ẹmwata ne ẹ i mwẹ iruẹn ọ re u gele khin, Osanobua gha rre do yuọ obọ, ọ ghi rhie igiowa ruẹ, dọlegbe ye ihe, zẹ vbe emwi ne a ya san ruẹn ẹse.

⁷ Avbe emwi ne ọ wi ruẹ hia, ma zẹdẹ sẹ ne a gha ya giẹ, emwi ne Osanobua gha viọ ne uẹn ẹghẹ nii.

⁸ Rhie ẹghẹ kherhe ya ghe ewaẹn emwa nẹdẹ, roro avbe ẹmwata ne avbe erha ima ruẹ re.

⁹ Ẹdẹ agbọn ima kanmwa, ma ma vbe rẹn emwi rhọkpa hiehiere, ma ghi fian agbọn na gberra zẹ vbe aghọnghọn.

¹⁰ Sokpan, giẹ avbe emwa ẹwaẹn nẹdẹ ma uwẹ emwi, danmwehọ ẹmwẹ ne iran gha ta.

¹¹ “Irunmwu i sẹtin zọ vbe ehe ne amẹ iye a i vbe miẹn vbe a gha lahin ekhuọrhọ rre nẹ.

¹² Amẹ gha ka, iran ọ re ọ ka luẹluẹ, vbe iran ma he sẹ ne a fian ya ru emwi.

¹³ Emwa ni ma rẹn Osanobua yevbe avbe irunmwu nii, iran gha mianmian Osanobua ne idaehọ iran fo.

¹⁴ Iran mu ẹtin yan ọma oru, ido akpakpa.

¹⁵ Iran gha ye egbe gọ yan ido akpakpa, ọ gha sẹtin da iran yi ra? Iran gha dobọ mu oma oru, ọ gha sẹtin mu iran mudia ra?

¹⁶ Emwa dan ghi zọ zẹ vbe irunmwu vbe uwu ovẹn, zẹ vbe irunmwu ne ọ rhu gba ogba hia.

¹⁷ Inian iran ghi kinnọ lẹga okuta, ọ ghi sikan mu avbe okuta nekhua.

¹⁸ Sokpan, vbọlọ iran hin evba rre, ọmwa ne ọ gha ye rẹn ighẹ iran te rre evba i rrọ.

¹⁹ Onii ọrọre oghọghọ ne emwa dan mwẹ, emwa ọvbehe ghi rre do rhie ihe iran.

²⁰ Sokpan Osanobua i he ọmwa ne ọ guobọ ẹre ye otọ, ra ne ọ ru iyobọ ne emwa dan.

²¹ Ọ gha ru ẹe ne u gha giẹ kevbe ne u vbe gha wee,

²² sokpan, ọ gha fa iran ni khuiwu ruẹ a, a ghi ho owa avbe emwa dan bẹkun.”