Job 6 - Edo Bible (E Baibol Ẹdo) Version 1996

^1-2 E Job keghi wanniẹn wẹẹ, “Akpawẹ a mwa ọlọghọmwa kevbe akhiẹ mwẹ vbe esike,

³ iran gha khua sẹẹ ekhae ni rre okun. Rhunmwuda ọnii, wa ghẹ giẹ etalọ mwẹ yan uwa unuan.

⁴ Osanobua ne Udazi ye ifẹnmwẹ salọ mwẹ nẹ, obi ni rrọ rọn la mwẹ egbe hia, Osanobua tẹn emwi ni mu ohan ọghọe ye uviẹn khẹ mwẹ.

⁵ “Ekẹtẹkẹtẹ gha rri irunmwu, ẹko ghi vuọn ẹn ẹmila i wogho vbe ọ gha rri irunmwu ne ọ kae.

⁶ Sokpan, gha ọ gha sẹtin rri ukhuankhuan kevbe okuhọ? De orhiẹnrhiẹn ne ọ rre ehe nọfua vbe ekẹn ọkhọkhọ?

⁷ Evbare vberriọ i khọn mwẹ, emwi ne I rhirhi a re hia, ọ re ọ ghi si emianmwẹ yọ mwẹ egbe.

⁸ Vbọzẹ ne Osanobua i na rhie emwi ne I nọrẹn mẹ yi? Vbọzẹ ne ẹ i na họn erhunmwu mwẹ yi?

⁹ Akpawẹ ọ gha wa giẹ obọ kẹe ne ọ gbe mwẹ uan nian!

¹⁰ Akpawẹ I rẹnrẹn ighẹ ọ gha ru vberriọ I gha ye oghọghọ san ghe odukhunmwu. Vbene obalọ mwẹ a rhirhi yan kpọlọ sẹ hẹ, mẹ rẹnrẹn wẹ Osanobua huanrẹn, I ma he gbe odan ye ẹmwẹ ọnrẹn ẹdẹ.

¹¹ De ẹtin ne I mwẹ ne I gha na ye gha rre agbọn yi? Vbe i a ghi rre agbọn ba vbe idaehọ i ghi rrọ?

¹² Okuta a ya ma mwẹ ra? Oze ifun egbe mwẹ khin ra?

¹³ Orhiọn i ghi rrọ mwẹ re, ne I gha ya miẹn egbe mwẹ fan! Ehe ne I gha na nọ iyobọ i ghi rrọ.

¹⁴ “Ẹghẹ ọlọghọmwa vbenian, avbe ọse ne ọ guobọmwa ọ re I ho. Adeghẹ I fi iyeke gbe Osanobua ra ẹn o.

¹⁵ Sokpan wa ne avbe ọse mwẹ, wa keghi he mwẹ zẹ vbe ẹzẹ ne ọ kae vbe amẹ ma rhọ.

¹⁶ Isonorhọ kevbe esia ye ẹzẹ zeze.

¹⁷ Sokpan, owowo gha rre, a ghi ho ehia bẹkun. Otọe ẹzẹ ni ghi dihoi rua, ọ ghi kakaa.

¹⁸ Iran ni khian vbe ato ghi gualọ amẹ wirua, iran ghi zozo ua, wulo ye uwu ato.

¹⁹ Ekhẹn ato ni ke Siẹba kevbe Tẹman rre gualọ ẹe.

²⁰ Sokpan, idaehọ iran wulo ye ọkpẹn ẹzẹ ne ọ kae.

²¹ Vbene avbe ẹzẹ ni ye ọre uwa khin mẹ, wa ghi miẹn vbene ọ ye mwẹ hẹ, wa keghi ya ohan lẹ mẹ.

²² Mẹ nọ uwa ne uwa ya emwi mẹ ra? Ra ne uwa zẹ igho odieke ne ọmwa mẹ?

²³ Ra ne uwa wọlọ mwẹ hin obọ oghian ra ekhọe dan rre?

²⁴ “Ọ ma khekherriọ, wa ma mwẹ emwi, wa ta emwi ne i baku ru ma mwẹ. I gha gbẹdọ ne I danmwehọ uwa.

²⁵ Te ẹmwẹ ẹmwata wa la ehọ, sokpan te uwa wa do vbe unu kẹkan.

²⁶ Wa ro ighẹ igbe agbanmwẹ ọ re I ye. Vbọzẹ ne uwa ghi na rhie ewanniẹn ye ẹmwẹ ọmwa ne iro han nẹ?

²⁷ Wa gha sẹtin yan uta ye ọviẹn ne udefiagbọn, wa ghi silo emwi ọse uwa khuankhuaankhuan ya vuọn ẹfe uwa.

²⁸ Wa ziẹn aro yọ mwẹ aro ighẹ I i ta ohoghe.

²⁹ Ehe ne uwa he khian sẹ ni, sẹe. Wa do bọ a i ta ẹmwata yi. Wa ghẹ hu abe mẹ. Mẹ ọ re ọ rria asẹ.

³⁰ Sokpan, wa ro wẹ ohoghe ẹre I ta. Wa ro ighẹ I i sẹtin rẹn emwi ne ọ maa hin e ne ẹ i maa rre.”