Job 5 - Edo Bible (E Baibol Ẹdo) Version 1996

¹ “Go tie emwa nian, e Job. Ghe ẹre ghe, adeghẹ ọmwa rhọkpa gha khuẹnniẹn? Odibosa ọkpa rrọọ ne u gha lẹgbinna ra?

² Ne ọmwa, rhunmwuda ighẹ emwi sọnnọ ẹn, kpokpo egbe ya uhunmwu yọ, uyinmwẹ ukọnmwẹ akpa vbe abobo ọre nọ.

³ I miẹn avbe akpa eso, ne ọ yevbe ne ẹkun wa sẹ ọre otọ yi. Sokpan, i keghi tie ihẹn udomwurri ye owa iran.

⁴ Ivbi iran i sẹtin gha rrọ vbe a i mwẹ ẹbe; a i miẹn ne ọ mudia gui ẹzọ iran vbe iko.

⁵ Emwa ohanmwẹ ọ re ọ khian rri emwiokọ akpa, ya sẹ egbe avbe ọka ne ọ zọ vbe uwu igban, emwa ne ovbamẹ gbe ghi yaro ye ẹfe ẹre.

⁶ Ọkhọ i zọ vbe otọe, ẹ i re uwu otọ ọ re ukpokpo ke zọ rre.

⁷ Ẹn o! Ọmwa ọ re ọ si ẹti ye egbe ẹre urhu, vbene ogiọnmwẹ erhẹn kpannọ ke uwu erhẹn ladian.

⁸ “Akpawẹ mẹ ọrọre uwẹ, I ghẹ hẹko sikẹ Osanobua I gha gui ẹzọ mwẹ ma rẹn.

⁹ Ma i sẹtin rẹn iwinna nọkhua ne ọ winna, iwinna ọyunnuan ẹnrẹn i vbe mwẹ ufomwẹ.

¹⁰ Ọ ghi rhọ amẹ ye otọe nii. Ọ ghi gbe amẹ khakha uwu oha.

¹¹ Vbe ẹmwata, Osanobua ọ re ọ tọn ọmẹhẹ mu, ọ ghi vbe rhie oghọghọ ne ni khiẹ hia.

^12-13 Ọ ghi duẹ emwamwa emwa ero ua. Ọ ghi ya ifi ne umẹwaẹn khuẹn muẹn sẹrriọ wẹ, a i miẹn ọ dunnaẹn vbe iwinna iran.

¹⁴ Iran ghi gha ye obọ baba odẹ vbe ogiavan.

¹⁵ Sokpan, Osanobua ghi miẹn ovbiogue fan vbe obọ uwu, ọ ghi miẹn ne ẹ i mwẹ fan vbe obọ iran ni zẹ ọre owẹ.

¹⁶ Ọ rhie idaehọ ne ovbiogue. Ọ gue ọmwa dan unu.

¹⁷ “Afiangbe nọ ne ọmwa ne Osanobua dia ye odẹ, ọ gha guẹ gui, ghẹ khiẹkhiẹ egbe yọ.

¹⁸ Osanobua ọ re ọ vbe gba ẹwẹn ne irẹn fiaẹn. Obọ ẹre gha kuan ruẹn, obọ ẹre ọ vbe sinmwi uẹn.

¹⁹ Kugbakẹghẹrẹ ọ re ọ ya miẹn ruẹn fan hin ikuan egbe rre.

²⁰ Ukhunmwu gha rre, ọ gha daa yi ye agbọn, kevbe ẹghẹ okuo, ọ ghi degue ruẹ, hin obọ uwu.

²¹ Osanobua gha miẹn ruẹn fan vbe obọ ovinzẹ, ọ gha miẹn ruẹn fan vbe ọfuan a rre.

²² U gha ye ohanmwẹ kevbe piankhanrhan gbe ogie afianma aranmwẹ akọn i ra vbe fian an.

²³ A i ra miẹn okuta vbe oha ne u na mu ugbo, aranmwẹ akọn i ra vbe guẹ gbinna.

²⁴ Ẹghẹ nii, u ghi gha rre irhu ruẹ vbe ọfumwegbe; u gha ya ghe ohuan ruẹn, u ghi miẹn wẹ emwirhọkpa ma ru iran.

²⁵ Ubunmwẹ ivbi uẹ gha yevbe ebe ni rre oha erria.

²⁶ Zẹ vbe ọka ne ọ wo, ọ te sẹ ẹghẹ emwi orhọ, u gha tọ wirua a.

²⁷ E Job ẹghẹ ne ọ taẹn ọ re u a ya gualotọ ọna miẹn. Ẹmwata nọ, rhunmwuda ọnii, rhan obọ miẹn rẹn.”