Job 42 - Edo Bible (E Baibol Ẹdo) Version 1996

¹ Ẹre Job na wanniẹn e Nọyaẹnmwa ẹmwẹ wẹẹ,

² “Nọyaẹnmwa mẹ rẹnrẹn wẹ u mwẹ ẹtin hia, u vbe sẹtin ru emwikemwi ne u ho.

³ U nọ rẹn wẹ vbọzẹ ne imẹ ne ọ ma rẹn na ye, na gbikhaẹn ye ẹmwẹ ẹwaẹn ruẹn? I guan vbe ekpa emwi ne I ma rẹn otọ ẹre vbe ekpa emwi ọyunnuan ne ọ kpọlọ gberra ne I gha sẹtin rẹn.

⁴ U tama mwẹ wẹ ne I danmwehọ vbe uwẹ a gha guan kevbe wẹ ne I hia ne i rhie ewanniẹn ye ọta ne u nọ rẹn.

⁵ Ẹghẹ nii, emwi ne emwa ọvbehe tama mwẹ ọkpa ọre I rẹnrẹn, sokpan, banbanna nian mẹ ye aro mwẹ bẹghe nẹ.

⁶ Rhunmwuda ọnii, ekhue ẹmwẹ ne I talọe hia mu mwẹ. I roiro fiwerriẹ vbe uwu ebubẹ kevbe emuẹn.”

Ufomwẹ Ọnrẹn

⁷ E Nọyaẹnmwa ghi gu e Job guan fo nẹ, ọ keghi khama Ẹlifaz wẹẹ, “Ohu ruẹ kevbe esiọ eveva wa mu mwẹ, rhunmwuda, wa ma guan ẹmwẹ ẹmwata vbe ekpa mwẹ zẹ vbene Job ne ọguọmwadia mwẹ guan rẹn.

⁸ Banbanna nian, mu ẹmila ihinrọn kevbe ogho ihinrọn giẹ Job, ne uwe ẹre ya ẹe zọ ese ne egbe uwa. E Job gha na erhunmwu ne uwa, I gha vbe họn urhu ẹre, I i ghi ra vbe ru uwa vbene ọ te ma uwa. Wa ma ta ẹmwẹ ẹmwata vbe ekpa mwẹ zẹ vbene irẹn ru.”

⁹ Ẹlifaz, e Bildad kevbe Zofa keghi ru zẹ vbene Nọyaẹnmwa tama iran, e Nọyaẹnmwa keghi họn erhunmwu e Job.

¹⁰ Ugbẹn vbe Job ghi na erhunmwu ne esiọ re eheha nẹ, e Nọyaẹnmwa keghi dọlegbe giẹ agbọn ma rẹn, ọ keghi viọ emwi ukhukhu eva ọghe ne ọ te ka mwẹ ne ẹẹn.

¹¹ Avbe etẹn e Job nikpia kevbe nikhuo kevbe avbe esiọ re, keghi do gha tuẹ Job. Iran keghi fu ẹre ẹko rre vbe ekpa ọlọghọmwa ne Nọyaẹnmwa mu yan rẹn. Ọkpọkpa vbe uwu iran keghi rhie igho kevbe oroka igoru ne ẹẹn.

¹² E Nọyaẹnmwa keghi fiangbe okiekie ẹdẹ agbọn e Job sẹ vbene ọ te ka fiangbe omuhẹn ọnrẹn. E Job kegha mwẹ ohuan arriaisẹn iwenẹ (14,000) e kamẹl arriaisẹn ehan (6,000) oghẹn ẹmila arriaisẹn eva (2,000) kevbe ekẹtẹkẹtẹ arriaisẹn (1,000).

¹³ Ọ keghi biẹlẹ emọ ikpia ihinrọn kevbe emọ ikhuo eha.

¹⁴ Ọ keghi he ovbi ẹre nokhuo ne ọdiọn Jamina, ne ukpogieva Kezia kevbe ne ọvbokhan ne ọ rrọọ, Ke rẹn Hapok.

¹⁵ A Ma vbe miẹn ikhuo ni gha mose vbe ivbi e Job vbe uhunmwu otọ agbọn hia. Erha iran keghi vbe gha ukhu ne iran zẹ vbene ọ ghae ne etẹn iran nikpia.

¹⁶ Vbe iyeke ọnọna, e Job keghi ya ukpo ikiọkhọe (140) vbe agbọn ọ keghi tọ sẹrriọ wẹ ọ mu eyẹ kevbe ihiẹnhiẹn.

¹⁷ Ọ keghi wu vbe ọ khian ọmaẹn ne ghẹghẹghẹ nẹ.