Job 41 - Edo Bible (E Baibol Ẹdo) Version 1996

¹ “U gha sẹtin ya ẹghọe ne a ya gbe ehẹn mu e Leviatan ra? Ra ne u ya irri de ẹre aranmwẹ ginna otọ?

² U gha sẹtin fi irri la ẹre uvun ihue ra, ra ne u fi ẹghọ la ẹre agbanmwẹ?

³ Ọ gha rinmwian wẹ ne u giẹ irẹn gha rrie ra, ra ne ọ rinmwian wẹ ne u tohan irẹn.

⁴ Ọ gha gue ta ẹe ra wẹ ne irẹn gha ga uwẹ ẹdẹdẹmwẹdẹ?

⁵ U gha sẹtin muẹn gba ra zẹ vbe ahianmwẹ ne a koko vbe owa, zẹ vbe emwi eso ne u gha ya gha ku ma eguọmwadia ne ibiẹka ikhuo?

⁶ Avbe ọgbehẹn gha miẹn ive ẹre ra? Ra ne ekpatẹ ya gha giagia ẹe khiẹn?

⁷ U gha sẹtin ye asoro ọgbehẹn vuọn ohian rẹn ra ne u ye ogala ha ẹre uhunmwu?

⁸ Ya ohọ kan rẹn ghe, u i ghi dọlegbe danmwẹ ọẹn ẹdẹ, u i ra vbe mianmian igbinna ni ẹdẹ.

⁹ Ọmwaikọmwa ne ọ bẹghe Leviatan te udu ẹre kpaẹn, ọ ghi de guo ye otọ.

¹⁰ A gha ho ẹre ẹmwẹ te ọ mu ohan, a i miẹn ọmwa ne ọ mudia vbe odaro ẹre.

¹¹ De ọmwa ne ọ gha gu ẹe gbinna, ne ọ gha miẹn uhunmwu? Orhiọnkpa ne ọ gha sẹtin ru ẹe i rre agbọn na.

¹² “Gunmwẹ giẹ owẹ e Leviatan ma ruẹn, ne I vbe giẹ vbene ọ kpọlọ hẹ kevbe vbene ọ wegbe sẹ hẹ ma ruẹn.

¹³ Ai miẹn ọmwa ne ọ gha sẹtin ban ikpakpaọke-ukhunmwu hin ẹre egbe rre, ra ne ọ ha uvun ye ẹwu okuo ne ọ yọ.

¹⁴ De ọmwa ne ọ gha sẹtin yan ẹre agbanmwẹ nii, ne a yọyọ akọn ni mu ohan ni gba?

¹⁵ Iyeke ẹre, asa ọ re a mwamwa ẹre uviẹn ya ru ẹe, a keghi gbalọ ẹe kugbe, iran wegbe vba okuta.

¹⁶ Te a wa kakabọ mama ọkpa ginna nọkpa, ẹhoho i sẹtin la ẹkpo ẹre gberra.

¹⁷ A gba ẹe kankaankan kugbe sẹrriọ wẹ emwi ọkpa ne ọ gha sẹtin wannọ ọẹn i rrọ.

¹⁸ Ọ gha tin ihin, erhẹn ghi kpannọ kua, aro ẹre ghi viẹn zẹ vbe owẹn ne ọ yan rre dee.

¹⁹ Ogidi erhẹn ọ re ọ ke unu ẹnrẹn ladian ogiọnmwẹ erhẹn ghigha tue yọyọyọ ladian.

²⁰ Ighogho ghi gha tue ke ihue ẹre ladian, zẹ vbe ighogho ne ọ ke uwu akhe ne a kun irunmwu yi ladian.

²¹ Ọ gha hiọnrọn erhẹn ghi mu vẹn, aranmwẹ erhẹn ghi gha ke unu ẹnrẹn ladian.

²² Ẹyaẹn rẹn wegbe sẹrriọ wẹ, te orrirri gbe ku emwa ni miẹn ọẹn hia.

²³ Ehe ne ọ khuẹrhẹ i rre ikpakpa ẹre ọ; ọ wegbe, ọ yevbe ematọn ne ẹ i giẹ a vbokho.

²⁴ Ẹkoko udu ẹre ne okuta ma rẹn ohan, ẹ i vbokho ọ wegbe zẹ vbe otọ.

²⁵ Ọ gha guara kpaegbe, udu emwa ni wegbe sẹ ghi kpan fi ẹko. Ohan ghi luẹluẹ iran an.

²⁶ Umozo ne ọ sẹtin fian ẹre ẹwẹn i rrọ. A i miẹn asoro, ra ifẹnmwẹ ra agbada ne ọ gha sẹtin kuan rẹn.

²⁷ Te ematọn ye khuẹrhẹ vbe obọ ẹre zẹ vbe irunmwu oze ye khuẹrhẹkhuẹrhẹ vbe erhan ne ọ kẹkẹe.

²⁸ A i miẹn ifẹnmwẹ ne ọ gha sẹe lẹ na, a gha munọ okuta nekhua gbe ẹe, te ọ yevbe iku irunmwu.

²⁹ Orhokhua, te ọ yevbe abọ irunmwu vbe obọ ẹre, emwa gha filo asoro giẹe, ọ ghi gha giẹ.

³⁰ Te ẹko ẹre yevbe avbe osọnmwehẹn, iran ghi gha wọlọ otọ ekhuọrhọ zẹvbe emwi ne a ya wiẹn ọka.

³¹ Ọ ghi hughu okun vbe amẹ ne ọ ti, ọ ghi giẹe gha ti vbe uwawa ofigbọn.

³² Ọ ghi zẹ uviẹn ne ọ fi wainwain ye odieke ẹre. Ọ ghi ya okun khian okun ne ọ hu.

³³ Emwi ne a ya giẹ ẹre i rre agbọn na; aranmwẹ ne ọ ma rẹn ohan ọre nọ.

³⁴ Te ọ ghe aranmwẹ ne ọ ghi wegbe sẹ silaa; rẹn ọrọre ọba avbe aranmwẹ oha hia.”