Job 40 - Edo Bible (E Baibol Ẹdo) Version 1996

^1-2 E Job, wẹ ọ re ọ Osanobua ne Udazi evẹn; u gha mu fua nian, ra u gha ye rhie ewanniẹn ne ẹẹn?

^3-4 E Job keghi wanniẹn wẹẹ, “Ẹmwẹ akpa ọ re I guan Nọyaẹnmwa, de ẹmwẹ ne I ra sẹtin wanniẹn? I i ghi ra ye dọlegbe ta ẹmwẹ ọkpa ọvbehe.

⁵ I guan gberra vbene ọ te kei mẹ nẹ.”

⁶ Ẹre Nọyaẹnmwa na dọlegbe ke uwu ẹhoho ẹziza guan giẹ Job wẹẹ,

⁷ “Kpaegbe mudia nian zẹ vbe okpia, ne u rhie ewanniẹn ye ọta ne I nọ rẹn.

⁸ Ẹ i re te u ho ne u rhie maa wẹ, mẹ I ru emwi ẹmwata? Ne u bu ohiẹn gbe mwẹ kevbe ne u bu asẹ ne egbe uẹ?

⁹ Wẹ wegbe vba mwẹ ra? Urhu ruẹ gha sẹtin vanhiẹn vba ọghomwẹ ra?

¹⁰ “Adeghẹ erriọ nọ, kpaegbe vbe ọghọ kevbe ekpẹn ne egbe ruẹ, u ghi ya ohan ọba kevbe uyi han ye egbe.

¹¹ Ghe avbe iran ni tọn egbe mu, hihiẹ okuosu ruẹ yan iran, ne u mu iran egbe rriotọ.

¹² Ẹn, ghe iran ne u silo iran kẹ otọ rẹn rẹnkhẹn ọmwa dan an, ye ehe ne ọ mudia yi.

¹³ Tọnnọ iran hia ye otọ, munọ iran gba vbe ẹvbo emwa ni wulo nẹ.

¹⁴ Ẹghẹ nii mẹ ọrọre ọmwa ne okaro ne ọ gha tian ruẹn, I ghi vbe kha wẹ, wẹ ọ re ọ tobọ ruẹ ya obọ ruẹ khọnmiotọ.

¹⁵ Ghe Behemot ne Ugbogiorinmwi, mẹ ọ re ọ yi ẹe, mẹ ọ re ovbe yi uwẹ. Te ọ rri irunmwu zẹ vbe ẹmila,

¹⁶ sokpan, u miẹn vbe ẹtin ne ọ rre egbe ẹre kpọlọ hẹ; u miẹn vbene ẹtin ne ọ rre inian rẹn kpọlọ hẹ!

¹⁷ Ẹrhunrhun ẹnrẹn ghi mudia kpasi zẹ vbe isida, inian ni rre owẹ ọre wa vbe wegbe.

¹⁸ Ugboloko ẹre keghi wegbe vbe oze owẹ ọre na vbe ye vbe orre ematọn.

¹⁹ “Rẹn ọrọre ne ọ mu ohan sẹ vbe uwu emwi ne I yi hia. Ayi ne ọ yi ẹe ọkpa, ọre ọ gha sẹtin ma rẹn.

²⁰ Irunmwu ne a gha ya gha koko ẹe zọre vbe uhunmwu oke ne avbe aranmwẹ oha na kuu.

²¹ Ọ ghi lovbiẹ vbe ototọ ẹti igban, ọ ghi vbe lẹre ye uwu irunmwu vbe uwu ekhuọrhọ.

²² Ẹti igban kevbe irunmwu ni zọ vbe ọkpẹn ẹzẹ, ọ re ọ rhie irhu ne ẹẹn lẹre yi.

²³ Ohan ẹzẹ ne ọ lẹ ogbigbi zẹ vbene Jọdan ye i muẹn. Ọ ghi hẹko hunwan vbe Jọdan a gha sanmwẹ amẹ ye ọ re aro.

²⁴ De ọmwa ne ọ gha sẹtin rhu ẹre aro ne ọ muẹn? Ra de ọmwa ne ọ gha sẹtin ye ifi mu ẹre ihue?