Job 34 - Edo Bible (E Baibol Ẹdo) Version 1996

^1-2 Ọre Elihu na kha wẹẹ, “Wa na wa wan ẹsẹse, wa vbe guẹ emwi, wa danmwehọ ẹmwẹ ne I ta nian.

³ A gha danmwẹ evbare, ọ re a na rẹn ne ọ rhiẹnrhiẹn vbọ sokpan a i ya ehọ rẹn ẹmwẹ ẹwaẹn vbe a gha họn ẹn.

⁴ Iwinna ima nọ ne a bu ohiẹn na.

⁵ E Job wẹẹ rẹn i mwẹ abe rhọkpa, wẹẹ te Osanobua ma bu ohiẹn ẹmwata ne irẹn.

⁶ Ọ keghi kha wẹẹ, ‘I gha kha wẹ I rria abe, ohoghe ọre I ta ẹe, obọ da mwẹ gbe sokpan, I ma rukhọ.’

⁷ “Wa he miẹn ọmwa ne ọ ye vbe Job na ẹdẹ ra? Ẹ i da ne Osanobua.

⁸ Ẹbu emwa dan ọ re ọ yẹ ọre, rẹn kevbe emwa orukhọ ọ re ọ gba mu obọ.

⁹ Ọ wẹ uhunmwu agbọn I zẹdẹ rrọ, ne a gha ru emwi esi ne a hia ne a lele vbene Osanobua ho.

¹⁰ “Wa danmwehọ mwẹ, wa ni rẹn otọ emwi, Osanobua ne Udazi gha ru emwi ne ọ ma gba ra?

¹¹ Te irẹn san emwa ẹse emwi ne iran ru, ọ ghi vbe gha ru iran emwi ne ọ maa iran.

¹² Osanobua ne Udazi i ru emwi dan, ẹ i vbe ru ọmwarhọkpa emwi ne ọ ma kei.

¹³ Ọmwa ọvbehe rrọ ne ọ rhie ẹtin ne ọ gue Osanobua ne ẹẹn ra? Ọmwa rrọ ne ọ mu agbọn ne ẹẹn gha gbearoghe ra?

¹⁴ Osanobua gha rhie uhiọnrọnmwẹ arrọọ werriegbe,

¹⁵ te emwa ni rrọ hia gha wulo. Iran ghi dọlegbe khian ekẹn.

¹⁶ Banbanna nian danmwehọ, a deghẹ u gele wan.

¹⁷ Te uwẹ bu abe gbe Osanobua ne ọmwata ra? Te uwẹ ro ighẹ ohiẹn ẹmwata i yẹ ọre ra?

¹⁸ Osanobua ghi gha bu abe gbe avbe ọba kevbe iran ne irriegie, vbe iran a gha re ẹwobi kevbe emwa dan.

¹⁹ Ẹ i ya egbe ba iran ne irriegie, ra ne ọ ye aro esi ghe iran ni fe sẹ ivbiogue, rhunmwuda rẹn ọ re ọ yi emwa hia.

²⁰ Ọmwa sẹtin wa wu uwu udomwurri vbe asọn, Osanobua sẹtin kinmwi emwa fua, iran ghi la ọrhiae rrie, ọmwa ne ọ wegbe i vbe zẹdẹ lọghọ irẹn ugbemwẹ hiehiere.

²¹ Ọ wa ghe owẹ hia ne dọmwadẹ ọghọe zẹ.

²² Ebiebi ne ọ so sẹ ne ọ gha degue ọmwa orukhọ ne Osanobua, ẹ i rrọọ.

²³ Osanobua i vbe bu ẹdẹ yọ ne emwa ya rre ne irẹn bu ohiẹn iran.

²⁴ Ẹ i vbe gualọ ọmwa ne ọ gha gualotọ emwi nẹ, ọ ke rhie ọkaolotu hin rre, ne ọ rhie ọvbehe ye ihe ẹre.

²⁵ Rhunmwuda ighẹ ọ rẹn emwi ne iran ru; asọn gha rre, ọ ghi filo iran gbotọ rẹnkhẹn iran an.

²⁶ Ọ ghi rrie emwa orukhọ oya vbe ehe ne emwa hia gha na miẹn ọẹn,

²⁷ rhunmwuda, iran ma ghi lele ẹe, iran kevbe yangbe uhi ẹre hia.

²⁸ Iran ghi ru ovbiogue ne iran ya tu nọ Osanobua iyobọ, rẹn keghi họn utumwẹ iyobọ, ne iran tu tie ẹre.

²⁹ Osanobua gha kha ighẹ rẹn i zẹdẹ guan yọ, ọmwa ne ọ ra nọ rẹn ẹ i rrọọ. Ọ gha rhie aro ẹre lẹre, ọghe emwa nagbọn fo.

³⁰ Emwi ọkpa ne agbọn uhunmwu ẹvbo ra miẹn ru i rrọ, ne emwa dan ni hin emwa unu, ghẹ ghi khaemwisẹ yan iran.

³¹ E Job, u miẹn orukhọ ruẹ kue ma Osanobua nẹ ra? Ne u vbe yan ne u ghẹ ghi ru ọvbehe.

³² U nọ Osanobua nẹ ra ne ọ rhie abakuru ruẹ ma ruẹn? U vbe kue nẹ ra ne u dobọ emwi dan ne a ru yi?

³³ Vbene uwẹ ghi na gui ye emwi ne Osanobua ru nii nian, wẹ yayi wẹ rẹn gha vbe gha ru egbe emwi ne uwẹ ho? Wẹ ọ re ọ gha ta ne u ho vbọ ẹ i re imẹ, tama ima nian vbene ọ ye hẹ vbe ekhọe ruẹ.

³⁴ Ọmwa ne ọ ghi wan nẹ hiehie gha yobọ yọ, ọmwa ne ọ họn ẹmwẹ ne I ta ẹe gha kha wẹ,

³⁵ a ma rẹn sẹ ọ re Job ya guan, ne ọ gbae ọkpa i vbe rre ẹmwẹ ne ọ ta ẹe.

³⁶ Wa roro ẹmwẹ hia ne Job talọe wa gha miẹn wẹ te ọ guan vbe ọmwa dan.

³⁷ Ọ vbe rhie isọtẹ ba orukhọ ne ọ ru, ọ kevbe sirra ima hia gha ya Osanobua gbe ogiẹ.”