Job 32 - Edo Bible (E Baibol Ẹdo) Version 1996

Ẹmwẹ Elihu

¹ Rhunmwuda ighẹ ekhọe e Job wa ta ẹe rhuan ma rẹn nẹ wẹ rẹn ma rukhọ, ikpia eheha nii keghi dobọyi vbe ewanniẹn ne iran rhie ye ọre ẹmwẹ.

² Sokpan, orhiọnkpa ne ọ mudia gha ghe ughe, ne a tie eni ẹnrẹn Elihu, ma ghi sẹtin ziengbe ohu ne ọ mu ẹẹn ọvbehe, rhunmwuda ne Job na kha ighẹ rẹn rria asẹ ọ na gha ba Osanobua ifi ẹzọ. (Elihu na, ovbi e Barakel nọ, ovbi uniẹn e Buz, ọ kevbe gha re ẹwae Ram).

³ Ohu avbe ọsie Job kevbe gha muẹn. Iran ma miẹn ewanniẹn rhie ye Job ẹmwẹ, ọ na keghi do yevbe ne a miẹn wẹ Osanobua ọre ọ rria abe.

⁴ Rhunmwuda ne Elihu na re ọvbokhan vbe evba, ọ keghi ziengbe ne emwa hia guan fo nẹ.

⁵ Ọ ghi miẹn wẹ iran eheha ma sẹtin rhie ewanniẹn ne Job, ohu keghi muẹn.

⁶ Ọre ọ na suẹn gha guan, ọ wẹẹ, “Ọvbokhan mẹ khin, eniwanrẹn wa khin, rhunmwuda ọnii, ohan ma gunmwẹ tama uwa vbene imẹ rorẹe yi.

⁷ I kegha ta ẹe ma egbe mwẹ wẹ, ọ kere ne uwa guan, wẹ ọ kere ne uwa ne eniwanrẹn san ibo ma egbe.

⁸ Sokpan, orhiọn Osanobua ne Udazi ọre ọ bu ọmwa rre ọ ghi rhie ẹwaẹn ne iran.

⁹ Ẹ i re a khian enọwanrẹn ọre ọ rhie ẹwaẹn ne ọmwa, ra ne ọ ya emwa rẹn emwi ne ọ gha ẹe.

¹⁰ Rhunmwuda ọnii nian, I ho ne uwa danmwehọ mwẹ, I ho ne I tama uwa vbene imẹ roro ẹe yi.

¹¹ “Te I wa hẹko gbe ekhọe ke otọ gha danmwehọ vbe uwa guan, I keghi mudia vbe uwa ye ekhọe gualọ ẹmwẹ ẹwaẹn na guan.

¹² I kakabọ danmwẹ họ, I keghi họn vbe uwa baeku; wa ma sẹtin rhie ma ighẹ ohoghe ọ re ẹmwẹ ne Job tae khin.

¹³ Vbe uwa ghi na kha hẹ yi ighẹ uwa wan? Osanobua ọ ghi ra zẹ ẹmwẹ wanniẹn e Job, rhunmwuda, wa baeku nẹ.

¹⁴ Wa ọre Job gha gu guan ighẹ ẹ i re imẹ. Sokpan, ẹ i re vbene uwa ta ẹe ni ọ re imẹ gha ya zẹ ẹmwẹ wanniẹn ọẹn.

¹⁵ E Job, iran ma ghi miẹn ẹmwẹ ta, iran ma miẹn ẹmwẹ zẹ wanniẹn ọn.

¹⁶ Te imẹ ghẹ ghi ye gha khẹ ra, ugbẹn vbe iran guẹ unu nẹ? Iran mudia vbe evba, vbene iran i ghi na mwẹ, ẹmwẹ ọkpa ne iran gha ta.

¹⁷ Ẹn o, I gha rhie ewanniẹn obọ mwẹ yọ nian, ne I tama ruẹn vbene imẹ rorẹe yi.

¹⁸ I i ghi sẹtin mudia ne I ghẹ guan I i ghi sẹtin khui ẹmwẹ ni ye unu.

¹⁹ Adeghẹ I ma miotọ na guan, I gha sa fua vbe ọgọ ohian ne a mu ayọn ọmutuo yi.

²⁰ Egbe mwẹ i guae, I gha guan.

²¹ Mẹ i ra gbe ghe obọkpa vbe imuaemwẹ na, mẹ i ra vbe kpe ọmwarhọkpa ye ewọwọ,

²² I gha vbe ru ẹe, te Osanobua rria mwẹ ikhi ẹgiẹgiẹ.