Job 26 - Edo Bible (E Baibol Ẹdo) Version 1996

^1-2 Ẹre na wanniẹn wẹẹ, “U miẹn iyobọ ne u ru mẹ na, mẹ ne ogue ne mitanmitan.

³ U ru ibude esi, u kevbe ghae vbe irẹnmwi ruẹn ne akpa vbene I ye na.

⁴ De ọmwa ne uwẹ ro ighẹ ọ gha họn ẹmwẹ uwẹ na hia? Gha ọ gua ekhọe ruẹ kpao ne u ya guan vbenian na?

⁵ “Orhiọn iran ni wulo nẹ gha guọ vbe uwu amẹ ne ọ rre ototọ otọe na.

⁶ Odaro Osanobua ọ re agbọn iran ni wulo nẹ ye. Emwi ne ọ degue ẹre hin ehe ne ọ ye rre i rrọ.

⁷ Osanobua ọ re ọ tan iso ne ọrre odẹ okuọ. Ọ na mu agbọn na rrọ ye ideghedeghe.

⁸ Osanobua ọre ọ ye amẹ vuọn ikpakpa iso, ọ ma vbe giẹ ukhuamwẹ ihẹ ne ọ mu, ya ẹe vẹ ua.

⁹ Ọ rhie uki ne ọ koo urro lẹre ye iyeke okuku amẹ.

¹⁰ Ọ ya uviẹn okhiokhi ne ọ vin ye okun, ọ ma vbe giẹ ukhuamwẹ ihẹ ne ọ mu, ya ẹe vẹ ua, wannọ uwanmwẹ hin ebiebi rre.

¹¹ Ọ gha zẹ aro mu avbe orre ni da iso yi, ohan ghi ya iran gha guọ, vbe gha mian zẹghẹzẹghẹ.

¹² Ẹtin ẹnrẹn ọ re ọ khọnmiotọ okun. Ẹwaẹn ẹnrẹn ọ re ọ ya fuẹn Rehab ne Ugbogiorinmwi.

¹³ Uhiọnrọnmwẹ ọnrẹn ọ re ọ ya iso huan, obọ ẹre ọ re ọ gbe ugbogiorinmwi ne ọ te ra lẹfua.

¹⁴ Sokpan, ẹmwẹ ne ọ ya ha ọmwa ehọ, ọ re ena khin vbe ekpa ẹtin ẹnrẹn. Ewẹwẹwẹ ne ọ fi la ehọ. De ọmwa ne ọ gha sẹtin rẹn vbene ọ gele kpọlọ sẹ he ẹe?”