Job 23 - Edo Bible (E Baibol Ẹdo) Version 1996

^1-2 E Job keghi wanniẹn wẹẹ, “Te I ye sọtẹ ọre, I na vbe gui ẹzọ ẹre ighẹ Osanobua I i sẹtin dobọ ikhiẹkhiẹ egbe yi.

³ Vbọrrọ nian wẹ I rẹn ehe ne I gha na miẹn ọẹn kevbe wẹ I rẹn vbene a ya sẹ ehe ne ọ ye hẹ.

⁴ Te I gha ya gui ẹzọ mwẹ ma rẹn I gha talọ ẹmwẹ hia ni gha ya ẹzọ mwẹ dia.

⁵ I ho ne I rẹn vbene ọ gha te kha hẹ, kevbe ewanniẹn ne ọ gha te rhie mẹ.

⁶ Osanobua gha te wa ya ẹtin ẹnrẹn hia gunmwẹ gbinna ra? Ẹn o, ọ gha danmwehọ vbe i a gha guan.

⁷ Ekhọe mwẹ ma, I gha te gu Osanobua zẹ iro, ọ gha te bu asẹ mẹ, vbene a na ta ẹe mu olọ yan rẹn.

⁸ “I ya gualọ odẹ Ahọ, Osanobua i rre odọ, I vbe ya gualọ odẹ Orrie, I ma miẹn ọẹn.

⁹ Osanobua winna nẹ vbe odẹ Okuo kevbe Ekẹn, sokpan, mẹ ma he miẹn ọẹn.

¹⁰ Sevba, Osanobua rẹn dọmwadẹ owẹ ni I zẹ vbotọ. Ọ gha danmwẹ mwẹ ghe, ọ gha miẹn wẹ, I i mwẹ iruẹn.

¹¹ Odẹ ne ọ zẹ ye otọ ọ re I wa lele I i vbe ghe obọ na ra obọ nii.

¹² Emwi ne Osanobua tae ọ re I ru vbe ẹghẹ hia; emwi ne ọ ho ọre I ru, ẹ i re ọghomwẹ.

¹³ “Rẹn i fi werriẹ, a i miẹn ne ọ sẹtin gu ẹe vẹn. Ra ne ọ da ẹre obọ emwi ne ọ ho ne ọ ru yi.

¹⁴ Ọ gha mu emwamwa ne ọ mwamwa ye otọ mẹ sẹ. Ọkpa kẹkan vbe uwu emwamwa ni bun ne ọ mwẹ ọre ọnii khin.

¹⁵ Ohan mu mwẹ, I kegha guọ vbe odaro ẹre.

^16-17 Osanobua ne Udazi ya mwẹ khian avbiẹrẹ nẹ, Osanobua ọ re ohan rẹn mu mwẹ ighẹ ẹ i re ebiebi. A gha rhe miẹn wẹ, nene ebiebi rhu mwẹ aro nẹ.”