Job 22 - Edo Bible (E Baibol Ẹdo) Version 1996

Imuaẹmwẹ Ne Ogieha

^1-2 Ẹre Ẹlifaz ne ovbi ẹvbo ne a tie ẹre Tẹman na wanniẹn wẹẹ, “Ọmwa ọkpa rrọ ra, giẹ a kha wẹ rẹn ọ ghi wa wan sẹ, ne ọ mwẹ emwi ne ọ ye ne Osanobua?

³ Emwi esi ne u ru vbe zẹ ẹfe ku Osanobua ra, ra, ne u na maa mwẹ emwi ne ọ ru ne ẹẹn?

⁴ Ẹ i re ne u na mu ohan Osanobua ọ re ọ si ẹe ne ọ na zẹ okan muẹn, ọ na tie ruẹ ye erhan ezọ?

⁵ Ẹn o, rhunmwuda ne u na ru orukhọ ne ọ sẹrriọ nọ. Rhunmwuda emwi dan ne u ru hia nọ.

⁶ Ne ọtuẹn miẹn ehe na ha osa ne ọ rriọ re, u keghi miẹn ẹre ukpọn hia, u ma ghi vbe sẹ ọkpa rae nẹ rhie kinnọ ẹkun.

⁷ U ma samẹ ne iran ne egbe wọre wọn, u ma rhie evbare ne ne ohanmwẹ gbe.

⁸ Rhunmwuda ne u na mwẹ ukpo ẹtin ne u ye, u keghi rhan obọ gba otọe hia.

⁹ Ẹ i re u ma ru iyobọ ne avbe ẹgbẹ ọkpa, sokpan deba ọnii, u keghi do avbe emọ ne ẹ i mwẹ erha emwi hẹ, u na gha ru iran khọ.

¹⁰ Eban nian, uye hia lẹga ruẹ, ohan ọbanban ọ re ọ ghi muẹn na.

¹¹ Ebiebi so sẹrriọ wẹ, u i ghi bẹghe odẹ, ẹzẹ lẹ rhuẹ ginna otọ.

¹² Ẹ i re ehe ne ọ yo sẹẹ vbe ẹrinmwi ọ re Osanobua ye, ọ ghi gha ghe avbe orhọnmwẹ ginna otọ, egbe ne iran rhe ya rre ehe ne ọ yo.

¹³ Sevba, te uwẹ ye nọ wẹẹ, ‘De emwi ne Osanobua rẹnrẹn? Ikpakpaiso degue ẹre nẹ, vbe ọ ghi na sẹtin gha bu ohiẹn ima hẹ?’

¹⁴ Te uwẹ ro wẹ ikpakpa iso ne ọ mwẹ imi degue ẹre odẹ ra? Vbe ehe ne ọ na khian vbe uwu ne ọ rre ẹkpo agbọn vbe ẹrinmwi.

¹⁵ “Ẹire te uwẹ ghi wa ta ẹe nẹ nian wẹ, odẹ ne ọmwa dan lele, ọ re uwẹ ra vbe gha la?

¹⁶ Sokpan, orogho lẹ iran gha rrie, vbe ọ ma he sẹ ẹghẹ iran.

¹⁷ Avbe emwa ni he Osanobua ye otọ ọ re ena khin, iran na yayi wẹ ẹ i miẹn emwi ru iran re.

¹⁸ Vbe rriọ Osanobua, ọ re ọ zẹ agbọn ne ọ maa iran, mẹ ma rẹn vbene emwa dan ro iro hẹ.

¹⁹ Emwa esi ghi gha ghọghọ, emwa ni ma rria abe ghi vbe gha giẹ. Vbe iran gha miẹn ighẹ a rri emwa dan oya.

²⁰ A fuẹn emwi hia ne ọmwa dan mwẹ uan, erhẹn keghi giẹn emwikemwi ne ọ te kẹe.

²¹ “E Job, ya dọlọ ne Osanobua ruẹ, ghẹ ghi ka ẹe ye oghian ruẹn; u gha lae vberriọ, ọ gha fiangbe uẹ.

²² Gha ya emwi ne ọ ma ruẹn re ru emwi rhie ẹmwẹ ọnrẹn mwẹ vbe ekhọe ruẹ.

²³ Ẹn, hẹko ya imuegberriotọ werriegbe bu Osanobua. Ne u kie ehia ukpe ighẹ avbe emwi dan ne a ru vbe owa ruẹ.

²⁴ Filo avbe igoru ruẹ kua; hihiẹ avbe igoru ruẹ ni maa sẹẹ ye otọ ẹzẹ ne amẹ i ghi ye.

²⁵ Gie Osanobua ne Oghodua gha re igoru ruẹ ne u vbe giẹ irẹn gha re esiliva ne a si gbo ne uẹn.

²⁶ Ẹghẹ nii, te u gha mu ẹtin yan Osanobua vbe ẹghẹ hia. U ghi do miẹn wẹ obọ ẹre oghọghọ ruẹ kerre.

²⁷ U gha na erhunmwu, ọ ghi họn we ghi vbe gha ha emwi ne u ve.

²⁸ Emwi ne u ru hia ghi dinna odẹ ne uẹn uwan mwẹ ghi gha wan ye odẹ ne u la.

²⁹ Osanobua si ọmwa itengbemu gbe otọ ọ keghi miẹn ne ọ mu egbe rriotọ fan.

³⁰ Ọ gha miẹn ruẹn fan adeghẹ u ma rria a be adeghẹ uyinmwẹ ruẹn gba ẹe.”