Job 21 - Edo Bible (E Baibol Ẹdo) Version 1996

^1-2 Ẹre Job na wanniẹn wẹẹ, “Emwi ne I wẹ ne uwa ya fu mwẹ ẹko rre ọrọre ne uwa danmwehọ ẹmwẹ ne I ta.

³ Wa vbe rhie ẹghẹ ne imẹ ya guan, I ghẹ ghi guan nẹ wa sẹtin gha giẹ.

⁴ “Mẹ vbe ọmwa kẹkan i mwẹ egbe ẹzọ; adeghẹ egbe balọ mwẹ, ọ mwẹ otọ.

⁵ Wa tọn aro mu ghe mwẹ. Ọna ma sẹ ne ọ gha si ọbuaroua ye uwa egbe kevbe ọ gbe obọ gbe unu?

⁶ I gha roro ẹmwẹ emwi ne ọ rruan mwẹ, I ghi gha guọ rrigharrigha.

⁷ “Vbọzẹ ne Osanobua na giẹ emwa dan gha rre agbọn yi, iran ghi tọ, agbọn ghi vbe maa iran?

⁸ Iran biẹlẹe, iran mu eyẹ, iran ghi tọ ne ehia sirra iran wan.

⁹ Osanobua i mu ọfuan rrie owa iran, iran i vbe rre agbọn afianma.

¹⁰ Ẹn, ẹmila iran ghi gha muan yọ, ehia ghi gha biẹlẹ vbene ọlọghọmwa i na rrọọ.

¹¹ Ivbi iran ghi gha ku, san yo san rre vbe ivbi ohuan.

¹² Iran ghi ku ye ulamwẹ akpata kevbe ẹrogbo.

¹³ Iran ghi lo ẹdẹ agbọn iran vbe ọfumwegbe, iran ghi wu hẹkpẹe vbe nẹi na rrioya.

¹⁴ “Emwa dan ghi tama Osanobua wẹ ne ọ sẹ iran rae. Iran i ho ne iran rẹn vbene ọ mwamwa ẹdagbọn iran hẹẹ.

¹⁵ Iran ro wẹ ẹ i mwẹ esa ne a gha ga Osanobua, ra wẹ ọma ọkpa vbe lae dee, wẹ ne a gha na erhunmwu ghe ẹre.

¹⁶ Iran ghi wẹ ẹtin ekuabọ iran ọre iran ya ru dinna odẹ, sokpan mẹ i sẹtin ye egbe ba iran, vbe odẹ ne iran roro emwi hia.

¹⁷ “A he do ukpa ọmwa dan yọ ẹdẹ ra? Osanobua he ya ohu rri ọmwa dan oya ẹdẹ ra?

¹⁸ Ra ne ọ hoho iran gha rrie zẹ vbe ebe ne ọkakae vbe uwu ẹhoho, ra zẹ vbe ebubẹ ne okpẹhoho bi gha rrie?

¹⁹ Wa wẹ, ‘Osanobua rria ọmọ ikhi ye orukhọ erha ẹe.’ Ẹn o, giẹ Osanobua rri emwa orukhọ tobọ iran oya. Gie ẹe rhie ma wẹ rhunmwuda orukhọ iran ọre irẹn na ru ẹe.

²⁰ Gie emwa orukhọ ya uhunmwu mu oya iran. Wa giẹ iran miẹn ohu Osanobua ne Udazi vbe egbe iran.

²¹ Ọmwa gha wu nẹ, ọ gele ye vbe kan irẹn ra adeghẹ agbọn ma ivbi ẹre?

²² Ọmwa gha sẹtin gha ma ẹre emwi ighẹ Osanobua ne ọ bu ohiẹn iran ni gbakhia?

^23-24 Egbe ghi ran emwa eso rhinrin ya sẹ ẹdẹ ne ọ gha wu. Iran ghi wulo hekpẹẹ vbe uwu ọyẹnmwẹ, vbene egbe iran na ye vborovboro.

²⁵ Eso i vbe danmwẹ ọyẹnmwẹ ghe, iran ghi gha rre ekhọe orriara, uwu ẹre ọ re iran vbe wulo yi.

²⁶ Sokpan obọkpa nọ, te ehia wulo, a ghi tọnnọ iran ye otọ, ọkhọe ghi ma rhu iran.

²⁷ I rẹn ekhọe otilua ne uwa mwẹ. Wa ghi wẹẹ, ‘Owa okpọmwa nii ghi vbo nian, ọmwa nii ne ọ yin uyinmwẹ dan?’

²⁸ Wẹ ma he gu ọmwa ne ọ khian ladian gha iyẹn ẹdẹ ra?

²⁹ U ma rẹn iyẹn ne iran do gha na sẹ owa?

³⁰ Ẹdẹ ne ohu gha mu Osanobua, ọ na wẹ rẹn ra rri emwa oya, ọmwa dan ọ re ọ la ban ẹghẹ hia.

³¹ A i miẹn ọmwa ne ọ ba ọmwa dan ifi ẹzọ, ra ne ọ rria ẹre ikhi ye emwi dan hia ne ọ he ru.

³² A gha mu ẹẹn gha rrie itẹ, gha rrie idin ẹnrẹn ne a tan obọ lẹga.

³³ Arriaisẹn vbe inu ihe ne ọkhin ghi bi lele iran ni muẹn rrie itẹ, uhin ighẹ ọghọ ọghọ ọ re ekẹn vbe ya degue ikun ẹnrẹn.

³⁴ Ẹre uwẹ na, na ho ne u gha ya ẹmwẹ nọ ma khian rẹn fu mwẹ ẹko rre, ohoghe ọre ewanniẹn ne u rhie rre hia khin!”