Job 2 - Edo Bible (E Baibol Ẹdo) Version 1996

Esu Dọlegbe Danmwẹ E Job

¹ Ọ ghi vbe dọlegbe sẹ ẹdẹ ne avbe ighele ẹrinmwi do ya gha niẹn obọ vbe odaro e Nọyaẹnmwa, Esu kevbe dọlegbe gha rre evba vbe uwu ẹbu iran.

² E Nọyaẹnmwa keghi nọ rẹn wẹẹ, “Vbe uwẹ a ke dee vbọ?” Esu keghi wanniẹn wẹẹ, “I gha hẹ yo hẹ rre, zozo lele otọe agbọn khian.”

³ E Nọyaẹnmwa keghi nọ rẹn wẹẹ, “U ma miẹn ọguọmwadia mwẹ ighẹ Job? Ọrhiọnkpa i rrọ vbe uhunmwu otọ agbọn ne ọ guobọmwẹ kevbe ne ọ vbe maa zẹ vbe ọre. Ọ wa ga mwẹ, ọ keghi vbe hia vbe ẹghẹ hia ne ọ ghẹ ru orukhọ. U nọ mwẹ, I kevbe kue yuẹ ẹre wẹ ne a guẹ hẹ rhu ẹe vbe ne ẹ i na mwẹ emwi rhọkpa ne ọ ru, sokpan, te Job ye guobọmwẹ vbene ọ ka ye dee ẹdẹ.”

⁴ Esu keghi wanniẹn wẹẹ, “Ọmwa sẹtin viọ emwi hia ne ọmwa ya de uhunmwu ẹnrẹn ye agbọn.

⁵ Sokpan, giẹ a kha ighẹ te u kuan irẹn tobọ ẹre egbe banbanna, ọ gha sirra a tie ihẹn ne uẹn.”

⁶ Ẹre Nọyaẹnmwa na tama Esu wẹẹ, “Ọ wa maa, a rhie ẹre yan ruẹn ohọ, sokpan ghẹ gbe ẹe rua.”

⁷ Esu keghi kpao hin odaro e Nọyaẹnmwa rre. Ọ na ya tue erhọn ni ghekpe ku e Job egbe hia, ke atataowẹ ya sẹ uhunmwu.

⁸ E Job keghi ya tota ye otiku, ọ na rhie ebunbunmwẹhẹn ya gha hia erhọn.

⁹ Amwẹ ọnrẹn keghi tama rẹn wẹẹ, “Te u ye sikan mu ẹẹn vbe ne u ye de ẹdẹ, u he tie ihẹn ne Osanobua ne u wu?”

¹⁰ E Job keghi wanniẹn wẹẹ, “Ẹmwẹ oya ọ re ọ ke unu ẹn ladian. Osanobua gha rhie emwi ne ọ maa giẹ ọmwa, ma ghi ye oghọghọ miẹn ẹnrẹn. Vbọzẹ ne a gha na gha gui ẹzọ uwunu a deghẹ ọ giẹ ọlọghọmwa rre?” Vbene ọlọghọmwa na wegbe sẹ, e Job ma fi unu giẹ Osanobua. Avbe Ihua E Job Rre

¹¹ Eha vbe uwu avbe se ne Job mwẹ keghi re, Ẹlifaz ne ovbi ẹvbo ne a tie ẹre Tẹman, e Bildad ne ovbi e Siua kevbe Zofa ne ovbi e Naama. Iran ghi họn vbene emwi ba so e Job hẹẹ, iran na wẹ iran ra ya fu ẹre ẹko rre.

¹² Urria iran he ye vbe iran bẹghe Job sokpan iran ma ghi rẹn ọnrẹn. Ẹghẹ ne iran ghi ya rẹn ọnrẹn, iran keghi gbe akhe eve ua, iran na yanghan ukpọn ye egbe iran ẹkun, iran na gha zẹ ebubẹ fi, iran na gha kpolo ye uhunmwu.

¹³ Iran keghi gu ẹe tota ye otọ vba la avan ihinrọn kevbe asọn ihinrọn vbene iran ma na guan hiehiere rhunmwuda, iran miẹn wẹ obọ ọlọghọmwa ni da ẹe ẹsẹse.